Jobu îtumu ikọ
3
Mgbọ usen cha orakabe, Jobu onenichili otu itumu ikọ, mè ifieek otu inyi usen emanbe ọmọ. 2 Jobu obebe:3 “Kè usen emanbe emi ijijaka ichep,
mè eririeen̄ ya etumube ibe
ke nga n̄a înin̄ owot gwun̄ enerieen̄!
4 Kè usen ya ikana udun;
kè Awaji ikakup me inyọn̄ ìkeek inu ofolek kan̄,
kè utoon̄ egwe ikatoon̄ me usen ya.
5 Kè udun mè ufieejit mkpa ibọkọ usen ya ikaan̄;
kè oduku inyọn̄ ikana ichit ọmọ bùk;
kè ndudun ere itap ukpook igak emen usen ya.
6 Kè ekpuk udun itet eririeen̄ ya ibọkọ me unye;
kè usen ya ikakup me otu ifuk usen acha ya,
kè ọmọ ikanin̄ me otu ifuk usen me onyan̄.
7 Kè ene ekanin̄ owot me eririeen̄ ya;
kè ekanọ ukpo unwọọn̄ geege me emen kan̄.
8 Kè ebi ìrọriọọn̄ ubọk ekifieek otu inyi usen,
ebi ìkigwen mgbugbo anam ejit okwaan̄ ijibi ibene,
efieek otu enyi usen ya!
9 Kè ebi kè ntoronyan̄ agan̄ egwe eririeen̄ usen ya edun;
kè eririeen̄ ya ikup ikikpọ utoon̄ egwe, ire, ikamun̄;
kè usen ya ikamun̄ adasi utoon̄ egwe,
10 mije, ìkachit otu akpa gwun̄ ìkwek emi,
inyi chieen̄ n̄a ikamun̄ ufieejit.
11 “Ìre keke orọ ǹkakwu me emen owot nga n̄a,
inyi eman emi nkwukwu mọnọ?
12 Keke orọ akpatukot ibọkọ emi itoon̄ me inyọn̄ kan̄,
mè ebe ikup eyi esabe ikpukpo emi?
13 Mije, ike mgbọ keyi,
kè ǹkwu nraka, mè ǹkup me utelelek,
kè ǹlaak, mè ǹkup me isiki-efuuk,
14 melek ebi ubọọn̄ mè ebi nteme linyọn̄,
ebi ìnanama ilile inu inyi lek kiban̄,
echi òkakana ǹrioon̄ mgbọ keyi,
15 melek ebi ibot mkpulu ebi ìkakaan̄ alata araran̄,
ebi ìtataak alata okuket ijot uwu kiban̄ gbak.
16 Sà ìre keke orọ ǹkakup kubọk
owot òsibi ene me nlelet eyi kpemun̄,
kubọk nsek nsabọn ekamun̄ge utoon̄ egwe?
17 Me ere ya, ebi ikpak kpekinyi ufialek,
ere ya ke ebi efuuk otabe me owot ekisiki efuuk.
18 Ere ya ke ebi mkpọn ekikaan̄ utelelek;
kpeyaka ikinọ ida ukpo ebi ìkitutuku ema.
19 Me ere ya, ogwu ijija mè ogwu ilile ìre ìkike,
ogwu usun̄ înwọnọ me ubọk nte uwu kan̄.
20 “Keke orọ esabe utoon̄ inyi ebi ukwook,
mè isa ugwem inyi ebi ìkup me ujaralek,
21 ebi ìkikpọ chieen̄ ibe mkpa iniben ema, ire, ìkanu,
ebi ìkiweek mkpa kubọk eweek inu ubọọn̄ òlelet,
22 ebi ìkinwọọn̄ unwọọn̄,
mè ikibele ejit mgbọ ema isinin̄ udọn̄-ufuun̄?
23 Keke orọ esabe utoon̄ inyi ogwu ikariọọn̄ge agan̄ îkije inin̄,
ogwu Awaji owakbe ogọ ikwek?
24 Mije, itoto mfi, ọmọ ore inorie nkirie;
ike mun̄ okigbuk, ikeya ke nkigwuku mfi.
25 Inu ntetbe ukpook me lek, îre emi lek,
inu mfieekbe owot me lek, îrọ emi.
26 Ǹkakup me esuuk, ǹkamun̄ utelelek,
ǹkakaan̄ isiki-efuuk, ire, ufialek ìkpọkpọ ikinu.”