Elifaji îtumu ikọ inyi Jobu
4
Elifaji ogwu Teman onenibọkọ otu ibe:2 “Ìkpọkpọ iyọt ikọkọt itumu ikọ melek kwun̄,
eyi owu okakaan̄ge efuuk geege me emen,
mè iyaka iyọt si ikpọkpọ iriaan̄ ere.
3 Kpọ, owu ojeen̄ owuwa ene inu,
owu orọ owuwa ubọk òwọwọ inye.
4 Ikọ kwun̄ îbene ebi ìberọrọn̄ igwuun̄;
owu orọ owuwa akpatukot òmemem inye.
5 Ire, mgbọ keyi îrebe owu lek, owu òkayaka ìkat ejit;
îtoon̄ owu gbài, lek kwun̄ osisisik.
6 Ìre ìkare ukpook Awaji okitet ya ore utoon̄-ejit kwun̄?
Ìre ìkare ugwem ǹkalọ kwun̄ ya ore ikpọchieen̄ kwun̄?
7 “Riọọn̄ ubọk keek-nu,
ìre ekene ogwu ikariọọn̄ge ijo inu ochep?
Ìre îkaan̄ ere ejijakabe ogwu ata ene?
8 Ubọk emi mmun̄be, ebi ìkibak ijọn̄ itap ijo inu,
ekirọkọ ijo inu,
ubọk yaage si, ebi ìkiwop ufialek, ekirọkọ si ufialek.
9 Awaji isifuuk efuuk igwook ema me lek, ema mîra ijijaka,
efet ònan̄a me inwọm kan̄ okichep ema isan̄a dìp dìp.
10 Ebi kè egbe àtat mêkọt ikigbin mè ikigọt,
ire, ejeek bọn egbe àtat cha îfaan̄ isan̄a.
11 Ire egbe àtat ìkamun̄ anam ìchim, ìbokwukwu,
bọn uman egbe àtat mîra iyiyala isan̄a.
12 “Îkaan̄ etip ònunu inyi emi me nlelet,
utọn̄ n̄a onwenween̄ lek ikpebe.
13 Mun̄umun̄ ilaak mmun̄be
fukufukufuku me eririeen̄,
mgbọ uga ilaak okikeme ene,
14 îtet emi ukpook, mè iran emi lek,
mè isisik otutuuk ukwuuk n̄a iso.
15 Ekwukwu ge oraka emi me isi fîọọn̄,
inwọọn̄ lek n̄a onanan̄a ikeke.
16 Ọmọ oyayaka ikeke,
ire, ǹkarọriọọn̄ ubọk îkupbe.
Ogugo inu ge okekeke me isi n̄a;
ere okukup yarak,
Nneninọ ida ge okitumu ibe:
17 ‘Ìre ogwu ebilene môre ogwu ata irọrọ igak Awaji ni?
Sà ìre ene môtana igak Ogwu Òrom ọmọ ni?
18 Ire Awaji ìkatoon̄ ebi ikwaan̄ kan̄ ejit me lek,
mè ire ifieek ebi osat kan̄ ikọ ibe mîrọ ijo inu,
19 ìre ìbonikukup me lek ebi ìkiluk me uwu ntitaak,
ebi ọdọ ugwem kiban̄ okupbe me achiaan̄,
ebi ìkup mfufet ikọkọt
ikpukpuku iriọk igak mwuwu?
20 Ekikpukpukpuku ema iriọk,
ibene me ewelegwe ire ikakwun̄;
ema mîra ichieen̄ ita ire mgbọ geelek,
ene geege ìkakpọ chieen̄.
21 Isitaba olik uwu ọfọ kiban̄ ikpọk,
ema mîra ikwaan̄, kpekaan̄ iriọọn̄-inu.’