5
“Taan̄ ukpo kpọ-nu, ekene obobọkọ owu otu?Ekene me lek ebi mbuban ke
owu obotet lek iriaak me lek?
2 Unaan̄-ejit okikpan̄ ogwu tuntun,
chieen̄-ile okirọ ogwu mbubut ikwu.
3 Emi me lek n̄a mmun̄ ogwu
mbubut okitibi ugwun̄-ijọn̄,
ire, me ekakpọge chieen̄,
mfefieek otu inyi ere îkiluk.
4 Unyan̄a môjọn̄ọ ere me lek bọn kan̄,
ikọ ìkponwọn ema me oyerebet.
5 Ebi uraafiọọn̄ mêrie inu uko kan̄ isan̄a;
ìrere emen ukpak ke inu cha okup, ebeteteen̄;
ebi urak ebek mênwe chieen̄ inin̄ lek inu ubọọn̄ kan̄.
6 Mije, ukwook ìkakifuku ìsibi me emen achiaan̄,
ufialek ìkakitibi ìsibi me ijọn̄.
7 Ire, ike ntat ukan̄ ìkakilọlọ ikpakpam ifo inyọn̄,
ikeya si, eman ogwu ebilene inyi ufialek.
8 Ire more emi, kè mweek-nu Awaji;
Awaji ke mato ikọ n̄a me isi.
9 Ọmọ okirọ ikpele uyeke uyeke
inu echi kpêkọtbe iriọọn̄ irak,
mè owuwa inu ukechieen̄ echi kpebekọt ifuk otu ifuk.
10 Ọmọ okiria ibot igwook me ijọn̄,
mè ikigwook mun̄ me uko.
11 Ọmọ okibene ebi ijo irek ifo inyọn̄,
mè òbene ebi ìkup me ufieejit
òto me ere mêkaan̄be unyan̄a.
12 Ìkijijaka ekiket ebi ifiọk,
inyi ubọk kiban̄ ikakọt ìrọ inu geege.
13 Ìkitet ebi ìriọọn̄ inu me ifiọk kiban̄,
mè ikirọ inyi otitọt ebi ngan ikakaan̄ ibot.
14 Ema mêchichini udun me egwe ikarek,
mè ikitutun iweek agan̄ me
ejit ikarek kubọk ìre eririeen̄.
15 Awaji ìkinyan̄a ebi una ubọk isibi
me otu oge akọn̄ òkup ema me otu,
mè ubọk ebi unye.
16 Eya orọ, ebi ugbọọn̄ mîkaan̄ ikpọchieen̄,
nlilọ oyerebet ìkayaka ìkaan̄ otu.
17 “Uga ubelejit okup inyi ogwu Awaji okan̄be inu inyi;
eya orọ, kakpọ ikan̄-inu Ogwu
Òkaan̄ Unye Geelek ìsiki chieen̄.
18 Mije, ọmọ okinyiaan̄ ene lek, ọmọ si okibọp,
ọmọ okitap ene unan me lek, ubọk kan̄ si okigwa.
19 Mônyan̄a owu isibi me emen uyọrọlek gweregwen,
me emen uyọrọlek jaaba, unan ìkpore owu lek.
20 Me emen akan̄, ìkpochieek ibe mkpa ikpan̄ owu,
me emen akọn̄, ìkpochieek ibe oge akọn̄ inin̄ owu ebek.
21 Mênyan̄a owu me otu alọm ebi ìkitoon̄ ene ikọ,
owu òkpotet ukpook mgbọ mfufiat isinu.
22 Owu môchak mfufiat mè akọn̄ me imọm,
owu òkpotet ukpook me lek ijo anam oron linyọn̄ keyi.
23 Mije, owu melek ewuuk
òkup me oron mêkaan̄ inyan̄a-ibot,
ebi kè anam oron melek kwun̄ mêkup me esuuk.
24 Owu môriọọn̄ ibe ke uwu kwun̄ ìkup me utelelek;
onu uwu kwun̄, otutuuk inu ìbososo ifuk,
geege ìkpochep.
25 Owu môriọọn̄ ibe ke bọn kwun̄ mîwa,
ke owot iman kwun̄ ìjojot ere
kubọk mbubet òtibi me ijọn̄.
26 Owu môkan sabum ònin̄ udọn̄-ufuun̄,
kubọk akpa ekifaan̄ mgbọ mgbọ kan̄ osobe.
27 “Kpọ, eji mîwọlọ otutuuk inu chi ikpọ, îre atikọ.
Eya orọ, gban̄, mè bọkọ tap nyi lek kwun̄.”