Jobu îbọkọ Elifaji otu
6
Jobu onenibọkọ otu ibe:2 “Jei, mebe mîtọ ujaralek n̄a imun̄ ulobo,
mè igwook ufialek n̄a geelek
me inyọn̄ otitọ ikpọ ike îlobobe ire,
3 kpomolọlọ ilolobo igak achiaan̄ òkup me agba awaji.
Eya orọ ikọ n̄a okupbe ǹraan̄ ǹraan̄.
4 Oraan̄ Ogwu Òkaan̄ Unye Geelek înin̄ emi lek,
iwot otu oraan̄ cha înin̄ igak emen ekwukwu n̄a;
uga ukpook Awaji îgban ikana emi,
ikikpọ mgbọ ìbojibi inin̄ emi lek.
5 Ìre inyinya akpan oron îkisan̄a
amọn mgbọ îmun̄be mbubet?
Ìre eriembuuk îkitaan̄ ukpo
mgbọ egwọbe mbubet inyi?
6 Ìre mêkọt irie inorie ìbe, ire kpetap uchi me lek?
Ìre agan̄ okuket emen nkwa unọn ìkekitop ni?
7 Inorie kecha ìkakire emi otu,
ìkidedek emi ejit.
8 “Jei, mebe mbọkọ inu nkido,
mebe Awaji înyi emi inu nkikpọ chieen̄,
9 mebe môneme Awaji ikpukpukpuku emi,
mè iwuwọk ubọk me lek n̄a, mè icho emi ifiin̄,
10 kè ejit n̄a si osiki,
kè emi mbele ejit, ubọk geelek ufiak n̄a ìkakitata,
ibe ke ǹkajijit ikọ Ogwu Mbuban.
11 “Mọmọ unye nkaan̄be isasa ikup ikikpọ,
mọmọ inu mbabak me lek ikikat ejit ikup?
12 Ìre unye nkaan̄be ìre eyi ewuuk?
Ìre anam akpalek n̄a ìre ekwe?
13 Kpasi unye ke nyaka ikaan̄ isasa inyan̄a lek na?
Unyan̄a geelek îjọn̄ọ emi ere me lek.
14 “Îgbe ibe ebi unene ekaan̄ ata ejit
me lek ogwu unene kiban̄ òkup me ukwook,
ikerere ibe ke ene ya ìkayaka ìkaan̄
ukpook Ogwu Òkaan̄ Unye Geelek me emen kan̄.
15 Ire, ebi ngwan̄ n̄a emin ofiaan̄ me lek kubọk mun̄ emen nria,
kubọk òkpuku mun̄ òbabaak ijot,
16 eyi mun̄ ewuuk òkitọtọk
onwenebe isi ikup afuk afuk,
eyi ibot awo òkitọtọk orọbe inyi ibaak ibene.
17 Ire, isire mgbọ ura, ìkayaka ìkigbuk,
mgbọ uyok isinu, îra ichat ita kpai.
18 Ebi ije emen èwê isigwaka itele oniin̄ mije ebek mudim,
mîra ichieen̄ ita me emen èwê, mè èkwaan̄ èta.
19 Ebi Teyima ìkije ije me emen èwê mîweek mun̄,
ebi Sieba ìkije ije me emen
èwê mîkpọ chieen̄ imumun̄ mun̄.
20 Ema mîre ere ya, kpemun̄ mun̄,
ema efefieek ejit, mije, mîkpọ chieen̄ ibe ke mun̄ òwa.
21 Ikeya ke enyi ekup me lek n̄a,
enyi imumun̄ inu òkup ukpook ukpook,
owot ofefieek enyi.
22 Ìre îkaan̄ mgbọ mbe enyi eche inu ge enyi emi?
Sà ìre îkaan̄ mgbọ mbe enyi esa inu ubọọn̄ kinyi
erie udun̄ me ibot n̄a?
23 Ìre ntumu ibe enyi enyan̄a emi
esibi me ubọk ogwu oriara?
Sà ìre mbe enyi efaka emi
esibi me ubọk ebi ìkitutuku emi?
24 “Ìjeen̄ emi ere nrọbe ifieek;
ìtumu, ke mâriaan̄ ere ikigban̄.
25 Ata ikọ ìkijajat!
Ire, ifan̄a kinyi ìsibi keke?
26 Ìre enyi ekiweek inenen̄e ikọ ntumube itat,
mè imọnọ inu ogwu
ikakaan̄ge ikpọchieen̄ otumube
kubọk ìre efet ikike?
27 Chieen̄ mmun̄be enyi,
enyi mêkọt iroon̄ nriroon̄ me ibot gwun̄ kpà-nte,
mè itumu ewe inyam unene kinyi.
28 “Ire, mgbọ keyi, ìnye lek ìkpọ emi isi nu,
ìre mâkan̄ ataak me isi kinyi ni?
29 Igele ubọk nu, ikafieek nlilọ oyerebet,
ìkpọk ìkeek, mije, ata irọrọ n̄a ìkekeke inye.
30 Ìre îkaan̄ ijo ikọ ntumube?
Ìre emi m̀kpakọt iriọọn̄ lek ata inu mè ijo inu ni?