7
“Ìre ìkare akọn̄ okup inyi ogwu ebilene me linyọn̄?Ìre usen ugwem kan̄ ìkafat ìkup ukwook ukwook
kubọk echi ogwu ọkọ?
2 Ike ogwu usun̄ okikpọ ibe ikakwun̄ ire,
mè ike ogwu ọkọ okikpọ chieen̄ ibọbọkọ mkpukpe kan̄,
3 ikeya ke edọmọ owuwa onyan̄ ikakaan̄ge oruru inyi emi,
mè idọmọ si ufieejit inyi emi eririeen̄ geelek.
4 Nsiyaka lek imaan̄, nra ikikeek ibe,
‘Mgbọ owa ke mbanan̄a ikeke mọnọ?’
Eririeen̄ ìkidududulu,
nra ikitama ikana mege ire obum egwe.
5 Mkput mè okpa ojot akpalek n̄a,
akpa n̄a îbak isan̄a, mè ikirọn̄ọ mun̄.
6 “Usen ugwem n̄a îgwat igak alaga ichak-ekwut,
mè ikiraka me kpunube ikpọchieen̄.
7 Jei Awaji, keek si ibe ke ugwem n̄a ìre gaalek efuuk ge;
chieen̄ n̄a ìkpoyaka ikpọk irieen̄ me lek ata inu ofifi.
8 Chieen̄ geelek òkimun̄ emi mgbọ
keyi ìkpoyaka imun̄ emi ofifi;
owu môsa chieen̄ kwun̄ iweek emi, ire, m̀kpayaka ikup.
9 Ike oduku inyọn̄ okikpọk iyat, mè ichieen̄ ita,
ikeya si, ogwu ònin̄ udọn̄-ufuun̄, ìkakiyaka ìka.
10 Ìkpoyaka igwu ikom ika inu uwu kan̄ ofifi,
ere kan̄ ìkpoyaka iriọọn̄ ọmọ ofifi.
11 “Eya orọ, emi si, m̀kpachit otu,
m̀batutumu ikọ ikpọ me lek
ubọk îkifiak emi me ekwukwu n̄a,
mè inina lek ikpọ me lek ubọk îkijat emi me ibot ejit n̄a.
12 Ìre emi ìre okwaan̄, sà ìre
mgbugbo anam ejit okwaan̄ ni,
eyi chieen̄ kwun̄ ìkanan̄a emi me lek?
13 Nsikeek ibe ke inyọn̄ mkpilaak n̄a môkat emi ejit,
ke inyọn̄ ufo n̄a môrọ ufiak n̄a isuuk,
14 mgbọ ya ke okisa ijo ilaak initap emi ufieek-owot,
mè isa ilaak ọkpọchieen̄ itap emi ukpook me lek.
15 Eya orọ, mma ibe enwan emi ekpan̄, mè ǹkwu,
igak ukwuuk ukwuuk yi eyi nrebe.
16 Ugwem n̄a îrook emi,
ǹkaweek iluluk ugwem ire mgbọ geelek.
Juuk emi tele,
ke usen ugwem n̄a ìre inu ikike.
17 “Ogwu ebilene ìchubọk ire keke,
eyi owu omọnọbe ọmọ ilile ilile,
ejit kwun̄ ìkakinanan̄a ọmọ me lek;
18 owu òkiwọlọ ọmọ ikpọ ewelegwe geelek,
mè ikitọ ọmọ ikpọ nkikek mgbọ geelek?
19 Ìre owu òkpodada chieen̄ kwun̄ isan̄a emi me lek,
mè ìnyi emi sọntitiik mgbọ ǹsa m̀memen ataak ni?
20 Ire nrọrọ ijo inu, ìre keke ke emi nrọ owu,
jei Ogwu Òkiruk Chieen̄ Ikpọ Ebilene?
Keke orọ osabe emi ito okukọọk inyi lek kwun̄?
Ìre ǹkakana ukwook inyi owu ni?
21 Ìre keke orọ òkatele nrọ-nlọ n̄a,
mè ìsan̄a ubọk me lek ijo inu n̄a?
Sọntiik mgbọ, mânin̄ me achiaan̄;
Owu môweek emi igak, ire, m̀kpayaka ikup.”