Bilidadi îtumu ikọ inyi Jobu
8
13 Bilidadi ogwu Suwa onenitap otu ibe:2 “Mgbọ owa ke obotumu ikọ kechi ire?
Ikọ otu kwun̄ ìbet lek unye efet egwijo.
3 Ìre Awaji îkinwunwunu unen oyerebet?
Sà ìre Ogwu Òkaan̄ Unye
Geelek îkinwunwunu inu ònenen ni?
4 Ire bọn kwun̄ irọ ọmọ ilọ,
ikeya ke îyaka si ema itap me ubọk ijo inu kiban̄.
5 Ire, ire owu osa otutuuk ejit kwun̄ iweek Awaji,
mè ibeek Ogwu Òkaan̄ Unye Geelek mbeek me ubọk,
6 ire owu otana, mè inen,
ọmọ ìkpolọlọ itọtọbọ ijibi
mgbọ yaage bak me lek kwun̄,
mè irọ ibe inu ikpọk ije ijaan̄ me uwu kwun̄
me mkpukpe ata irọrọ kwun̄.
7 Me ibebene, irek kwun̄ ìre sọntiik,
ire, me mgburudun̄, ìbomimin enenen.
8 Do ukot ebi ìraraka cha nu,
mè week riọọn̄-nu inu ebi nte nte kiban̄ eweekbe isibi;
9 mije, eji ebi emanbe iyakwut gaalek,
kperiọọn̄ inu geege,
ògak ge, usen ugwem kiji me linyọn̄ ìbet lek ogugo.
10 Me atikọ, ema mêjeen̄ owu inu, mè ikpa inu inyi owu;
ema mêchili ejit itumu ikọ inyi owu.
11 Ìre osùkut môkọt itibi ijọn̄ọ me ere kpunube nria?
Sà ìre anyiaan̄ môjaan̄ lek me ere kpunube mun̄ ni?
12 Mgbọ îkupbe nsek nsek, kpefefieek-nu,
ọmọ okidasi ichiaak sabum mbubet geelek.
13 Ikeya ke îbokup inyi ebi ìwuwuuk Awaji,
ikpọchieen̄ ebi burubut ekaan̄be ìbochechep.
14 Inu ema esabe ikat ejit ìkup ǹnyieen̄ ǹnyieen̄,
inu esabe itoon̄ ejit ìkup kubọk njin olọnjin.
15 Ema iyaka lek ibieen̄ me lek, ojene;
itet ubọk inye me lek, ogbeme.
16 Ìbet lek njijọọn̄ uti ura okigwook me lek,
eyi òtitibi agọọk isan ichit emen uko;
17 eyi òtatap ugwun̄-ijọn̄ kan̄ ililọkọ ikana èdọ ewuuk,
mè ikaan̄ ebon kan̄ me emen ewuuk.
18 Isijibi ọmọ isan̄a me ere îkupbe,
ere ya îra ijit ọmọ, mè ibe, ‘Ǹkararak ìmun̄ owu!’
19 Otutuuk unwọọn̄ eyi uti keya ire eya,
ebi kè ofifi uti mêneninan̄a
me akpat ijọn̄ ya itibi isibi.
20 Kpọ, Awaji ìkakijit ogwu ǹkalọ,
ìkakitatap si ubọk ìnyi ebi ikpak.
21 Môtap imọm ijot owu otu,
mè itap ukpo unwọọn̄ ijot owu emen ebek.
22 Esip môchit ebi ochicha kwun̄ lek kubọk ofọnti,
mêjijaka uwu ebi ikpak inọọn̄ ijọn̄.”