Jobu îbọkọ Bilidadi otu
9
Jobu onenibọkọ otu ibe:2 “Atikọ, nriọọn̄ ibe ìre ikeya.
Ire, mọmọ ubọk ogwu ebilene môsabe ire ogwu ata irọrọ
me isi Awaji?
3 Ogwu iweek iwuwut ifan̄a melek kan̄,
ìkpokọt ifọọk geege me lek obop idodo.
4 Iriọọn̄-inu kan̄ midọk, unye kan̄ mimin.
Ìre ekene otọ lek me lek kan̄, mè itele ibeben unan?
5 Ọmọ okijujuk ebi kè ogoon̄, me ogoon̄ geege ikariọọn̄ge,
mè ikitọp ema ikana mgbọ ejit isinaan̄ ọmọ.
6 Ọmọ okisisik linyọn̄ ijuuk inan̄a me akpat kan̄,
mè ikirọ atà cha òbebeme linyọn̄ ikiran.
7 Ọmọ okitọ ikọ inyi ura, îra ijit ibubum;
ọmọ okikwek utoon̄ ebi kè ntoronyan̄, inyi ekatoon̄.
8 Îre ọmọ gaalek odut akpabin inyọn̄ inyana,
mè ikije me inyọn̄ ekoon̄ me okwaan̄.
9 Îre ọmọ orom Otâ Ntoronyan̄ mè Ntoronyan̄ Ubọọn̄,
mè Nga Ntoronyan̄ mè ọgbọn̄ ntoronyan̄ agan̄ osiki.
10 Ọmọ okirọ ikpele uyeke uyeke inu echi kpêkọtbe iriọọn̄ irak,
mè owuwa inu ukechieen̄ echi kpebekọt ifuk otu ifuk.
11 Ire iniraka emi me agba lek, ǹkabamun̄,
ire inije iraka inyi isi, ǹkabariọọn̄.
12 Ire ikaan̄ inu ìbojọk ibọkọ, ìre ekene obokọt ikwek?
Sà ìre ekene obokọt ibe ọmọ, ‘Òkirọ keke?’
13 Awaji isinaan̄ ejit, înaan̄ isan̄a;
ikerere ebi ìtatap ubọk inyi Rayabu,
mgbugbo anam ejit okwaan̄ ya,
ìjajak imem me irak ukot kan̄.
14 “M̀bajeje ifọọk ọmọ otu?
Sà ìre m̀bajeje ikọt igọọk ọmọ iwut ifan̄a ikọ?
15 Ubọk geelek ǹkarọ inu geege ìlọ, m̀kpakọt ifọọk ọmọ otu;
inu òkup inyi emi ìre irariaak ọmọ,
Ogwu Oyerebet n̄a, ibe irọ emi nsan.
16 Ìrere ǹgwegwen ọmọ, ichechieek emi,
ǹkachieek ibe ke môgban̄ utọn̄ me ida n̄a.
17 Môsa egwijo ininyiaan̄ emi akpa,
mè irọ unan n̄a iwa isọkọ lek, me nkarọge inu geege ìlọ.
18 Ìkpochechieek emi m̀fuuk efuuk,
ire, ìbotatap ufialek igak emi lek.
19 Ire me lek unye,
ọmọ ore ogwu unye;
ire ibe ìre oyerebet,
ekene obogwen emi melek kan̄ isibi oyerebet me ibot?
20 Ubọk geelek nrebe ogwu ata irọrọ, otu n̄a obotip emi oyerebet;
ubọk geelek ikakaan̄ge inu nlọbe,
Awaji môjeen̄ ibe ke emi nrọ ilọ.
21 Ǹkarọ inu geege ìlọ,
ǹkayaka ìsa ugwem n̄a ìgwen inu geege;
ugwem îjọ emi ejit iluluk.
22 Otutuuk ìre inu yaage; eya orọ ntumube ibe,
‘Awaji ìkikpakpan̄ ogwu ǹkalọ, mè òkpan̄ si ogwu ikpak.’
23 Osusut isisa mkpa ugeen̄ mgbọ inu,
Awaji ìkichachak ufialek òtet ebi kpelọ ikan.
24 Isisa linyọn̄ itap me ubọk ebi ikpak,
Awaji îra ichit ebi oyerebet chieen̄.
Ire ìkare ọmọ okirọ, ìre ekene okirọ ni?
25 “Usen ugwem n̄a îlibi igwat ukot igak ogwu ekot,
ìkiwuwulu iraka, kpunu unwọọn̄ me emen kiban̄.
26 Ema ekiraka yêen̄ kubọk uji osùkut,
kubọk igo owulu isiki fiàm iniben anam.
27 Ire mbe ke mâwuuk nana-lek n̄a,
mè irọ inyi isi n̄a itọn̄ọ, mè ibele ejit,
28 ǹkifefieek si owot me lek ufialek n̄a;
mije, nriọọn̄ ibe ke owu òkpomọnọ emi kubọk ogwu ǹkalọ.
29 Ire ire oyerebet îtip emi,
keke orọ mâkitutuku lek n̄a ichep?
30 Ikerere ǹsasa mun̄ òtotoon̄ isi igwọk lek n̄a itana,
mè isa ìsabi igwọk ubọk n̄a itoon̄,
31 owu òbotọtọp emi itap me ifin,
ire lek, ofọnti n̄a môgọọkbe ilibi emi lek.
32 “Mije, ọmọ ìkare ebilene kubọk emi nrebe,
eyi mâkọtbe ikifọọk ọmọ ikọ,
eyi eji mêkọtbe igbaan̄ ikeke me oyerebet.
33 Mebe îkaan̄ ogwu nteek òkup me etete kiji,
ogwu mokaan̄ unye me lek kiji,
34 ogwu monida m̀gbele Awaji isan̄a emi me lek,
inyi uga ukpook kan̄ ikayaka ìfieek emi owot,
35 kè ntumu ikọ me nkafieekge owot me lek kan̄.
Ire, emi nriọọn̄ me lek n̄a ibe ke ìkare ikeya ke îkup.