10
“Ugwem n̄a îrook emi;eya orọ, m̀kpakọt itele ininina lek n̄a;
mâtumu ikọ ikpọ me lek ubọk ejit ofieekbe emi ire.
2 Mâtumu inyi Awaji ibe: ‘Katip emi oyerebet,
ire, kpa ibot ikọ kwun̄ melek n̄a nyi emi-nu.
3 Ìre înwọn ibe owu òtutuku emi ni?
Ìre îgbe ibe owu òjit ubọk ikwaan̄ kwun̄ òtele,
mè òkobele ejit me lek ijọ otitọt ebi ikpak ni?
4 Ìre chieen̄ ebi anam akpalek ikike ke owu okaan̄?
Sà ìre owu òkimọọn̄ inu kubọk ebilene ekimọọn̄?
5 Ìre usen ugwem kwun̄ ìgbidim kubọk echi ebilene,
sà ìre acha ugwem kwun̄ ìse kubọk echi ogwu ebilene,
6 eyi owu okiruk chieen̄ iweek nrọ-nlọ n̄a,
mè ikiwọlọ ijo n̄a,
7 àya, owu oriọọn̄ isan̄a ibe ǹkarọ ijo inu geege,
ke kpunu si ogwu òbokọt inyan̄a emi isibi me ubọk kwun̄?
8 “ ‘Îre ubọk kwun̄ olilọkọ emi, mè irom emi.
Ìre owu môyaka inijijaka emi isan̄a ni?
9 Kawuuk ibe ke òsa arika ibot emi.
Ìre owu môkọk emi ikana achiaan̄ mgbọ keyi ni?
10 Ìre owu òkatọkọ emi ìtap me owot nga n̄a
kubọk etọkọ mun̄ ebe,
mè ìrọ inyi ǹkam kubọk mun̄ ebe akakam okikam,
11 mè ìsa akpa mè ufuk ìkana ìchit emi,
mè ìgbaan̄ ukwuuk mè nlik ìsa ìlọk emi ni?
12 Owu onyi emi ugwem, mè ikaan̄ ata ejit me lek n̄a,
mè isa ata ubọk kwun̄ ibem ebek ugwem n̄a.
13 “ ‘Ire, owu olelet inu chi me ejit kwun̄;
nriọọn̄ ibe inu yi ìkukup owu me ekiket.
14 Ire marọ ijo inu, kè owu òkokpọ emi;
owu kpomochieek ibe emi nkabọkọ osusut ijo inu n̄a.
15 Ire nrọ inu ilọ, njijin lek n̄a òwa!
Ikerere ǹrọrọ ata irọrọ, kpamakọt ibene isi,
mije, esip ìjojot emi isi,
ukwook ìmemeen̄ emi kubọk mun̄ ile.
16 Ire mbene oguga ikigugo lek,
owu òbochichim emi kubọk egbe àtat,
mè isak emi unan isa ijeen̄ uyeke uyeke unye kwun̄.
17 Owu òkpọkpọ ikisa ebi ata-ikọ kwun̄ inu me lek n̄a,
mè ikitap inu isọkọ me lek unaan̄-ejit kwun̄ me lek n̄a;
owu òkiria ufialek me ukpa me ukpa ijet emi,
kubọk aya isi ebi akọn̄ ekinu ininwene ebi oka.
18 “ ‘Keke orọ osan̄abe emi me akpa gwun̄ isibi inyọn̄?
Mebe nkwu sabum chieen̄ ene ònomun̄ emi, kè ònwọn.
19 Meben emi me akpa gwun̄ isi itap me udọn̄-ufuun̄,
manikup kubọk ogwu ìkasisibi inyọn̄.
20 Sọn̄ usen inen mè inen eyi ugwem n̄a îtata isan̄a ma!
Da isi san̄a emi me lek, inyi isi n̄a itọn̄ọ-nu sọntiik,
21 sabum mbasi ere kpekisi mè iyaka ika,
òrere ama ugwuuk mè ufieejit mkpa,
22 ama òdudun kubọk udun me lek kan̄,
ama ufieejit mkpa, ere inu geege ikakupge me onineen̄,
ere utoon̄ orebe udun.’ ”