Sofari îtap otu
11
Sofari ogwu Nayama onenitap otu ibe:2 “Ìre kpebebọkọ otu owuwa ikọ kechi ni?
Ìre itutumu ogbogbo ikọ îkirọ ibe oyerebet inwọn ene ni?
3 Jobu, ìre wọlọwọlọ ikọ kwun̄ môrọ ibe ene ikasan̄a amọn ni?
Ìre kpebekan̄ inu inyi owu me lek ochak chi okirọ ene?
4 Owu otumu inyi Awaji ibe, ‘Inu nchieekbe me lek ìtatat,
emi si ǹkarọ inu geege ìlọ me isi kwun̄.’
5 Kè ònwọn ibe Awaji itumu ikọ,
mè isa otu kan̄ itumu ikọ ikeme owu,
6 mè ijeen̄ owu nlelet inu òkup me emen iriọọn̄-inu,
mije, iriọọn̄-inu ìkup agan̄ iba.
Riọọn̄ ibe ke osusut Awaji onyibe owu îsiki igak ijo inu kwun̄.
7 “Ìre owu môkọt iweek udọk udọk inu Awaji iriọọn̄?
Sà ìre môkọt iriọọn̄ otutuuk inu geelek
òfo me lek Ogwu Òkaan̄ Unye Geelek?
8 Inu cha îbene igak akpabin inyọn̄, keke ke owu obokọt irọ?
Ema mîdọk igak ama ekwukwu, keke ke owu obokọt iriọọn̄?
9 Ujọn̄ọ kiban̄ îjọn̄ọ igak linyọn̄,
uwele kiban̄ îwele igak okwaan̄.
10 “Ire Awaji ije iraka, mè itet owu igon ikam me mkpọn,
mè ititiin̄ uwu oyerebet, ekene obokọt igban ọmọ?
11 Me atikọ, ọmọ îriọọn̄ lek ebi ofiaan̄;
mè ikimọọn̄ si ijo inu,
ìre ìkpokaan̄ ekiket ofolek ni?
12 Ike inyinya akpan eyi oron ìkpokọt iman gwun̄ ebilene,
ikeya si, ogwu mbubut ìkpokọt ikana ogwu òriọọn̄ inu.
13 “Ire owu osa me otutuuk ejit kwun̄ igọọk ọmọ,
mè ibene ubọk ikiriaak uriaak inyi ọmọ,
14 ire owu osan̄a ubọk me emen ijo inu,
mè òkachieek ibe ijo inu ikup me uwu kwun̄,
15 mgbọ ya, owu môbene isi, esip ìkpotet owu,
owu môkeke inye, ukpook ìkpotet owu.
16 Owu môwuuk ufialek kwun̄,
owu môkikekeek ema kubọk ìre mun̄ òlilibi iraka.
17 Usen ugwem mônenikitoon̄ igak utoon̄ ikarek,
udun mônenikana ikikup kubọk otu ewelegwe.
18 Owu môkaan̄ utoon̄-ejit, mije, ikpọchieen̄ ọmọ òwa,
owu môkpọ ere ikana, mè isiki ilaak me utelelek.
19 Owu môlaak, ene geege ìkporọ owu òfieek owot,
owuwa ene mêsa ata otu iniweek nnwọn me ubọk kwun̄.
20 Ebi ikpak kpebekọt imọọn̄ inu òborọ ema,
kpebemun̄ agan̄ ebelibi itap ibot inwọnọ,
otutuuk inu òbokup inyi ema ìre mkpa gaalek.”