Jobu îbọkọ Sofari otu
12
Jobu onenifọọk otu ibe:2 “Atikọ, enyi ìre ife ìsibi isi,
enyi isikwaan̄, iriọọn̄-inu môkwukwu.
3 Emi si nriọọn̄ inu kubọk enyi eriọọn̄be,
ǹkasiki ìgak enyi.
Ìre ekene ikariọọn̄ge otutuuk inu chi geelek?
4 Emi, ene òkigwen Awaji, mè Awaji ochieek,
nkana ogwu ebi une n̄a ekichak ochak,
emi ogwu ònenen, mè ire ogwu ǹkalọ,
nkana inu ochak ikike.
5 Ebi inyọn̄ onwọnbe ekikpọ ufialek chieen̄ isiki;
ufialek ìkinu inyi ebi ìwuwuuk lek ikup me ufialek.a
6 Uwu ebi inọ afa ìkup me esuuk;
ebi ìkirọ Awaji inaan̄ ejit ekup me utelelek,
eyi Awaji okisa me ubọk kan̄ ijet ema.b
7 “Do-nu ebi kè anam, ke mêjeen̄ owu;
si lek ebi kè unọn òwulu me inyọn̄, ke mêkpa inyi owu;
8 tumu nyi linyọn̄, ke môjeen̄ owu,
ebi kè irin̄ òkup me okwaan̄ mêkpa inyi owu.
9 Eyi owa me lek otutuuk inu chi ikariọọn̄ge
ibe ke inu yi ìnan̄a me ubọk Okumugwem?
10 Ugwem otutuuk inu geelek òkifuuk efuuk ìkup ọmọ me ubọk,
mè efuuk ugwem ebilene geelek.
11 Ike alọm okigban̄ utop eyi inorie,
ikeya si ke utọn̄ okigobo ikọ.
12 Iriọọn̄-inu ìkikup me etete ebi ìkakan,
ebi ìluluk ugwem ijọn̄ọ ekikaan̄ ngobo-ntet.
13 “Awaji okaan̄ iriọọn̄-inu mè unye,
nteme mè ngobo-ntet ìre echi kan̄.
14 Inu îgbugbọbe igwook, kpebekọt ikpọk inama;
ogwu îtapbe mkpọn, kpebekọt isan̄a isibi.
15 Ọmọ isitet ibot ikaan̄, ere îra ichat isan̄a;
isida ibot igwook, ijọn̄ îra ijijaka.
16 Ọmọ okaan̄ unye mè ntim-mkpan̄,
ogwu efiaan̄be mè ogwu òfafiaan̄ ekup me irak ubọk kan̄.
17 Ọmọ okibọkọ iriọọn̄-inu isan̄a me ibot ebi nteme,
mè ikirọ ebi ibot oyerebet ekana mbubut.
18 Ọmọ okitọn̄ọ fanti mkpulu isan̄a ebi ubọọn̄ me ebon,
mè ikitobo ema ekwut ebi usun̄ me ebon.
19 Ọmọ okibọkọ unye isan̄a me ubọk ebi ngwugwa,
mè ikisan̄a ebi ìkibia me irek ilile ito me ijọn̄.
20 Ọmọ okitap ebi nteme etoon̄be ejit me lek mbuuk,
mè ikibọkọ iriọọn̄-inu isan̄a me ibot ebi ugane.
21 Ọmọ okisa esip itet ebi ilile,
mè ikibọkọ unye isan̄a me ubọk ebi unye.
22 Ọmọ okichili udọk udọk inu me emen udun ibook,
mè ikitap utoon̄ me emen ufieejit mkpa.
23 Ọmọ okibene ido ifo inyọn̄, ọmọ si okijijaka ido;
ọmọ okirọ inyi ido imin, ọmọ si okiyiyala ido.
24 Ọmọ okibọkọ ifuk-ibot isan̄a me ibot ebi ibot me linyọn̄,
mè ikirọ inyi ema ekenyinya ekana emen èwê ere kpunube oniin̄.
25 Ema ekekitutun iweek agan̄ me emen udun, kpunu utoon̄,
mè ikigbugbe kubọk ebi miin̄ osabe.