13
“Kpọ, chieen̄ n̄a îra imun̄ otutuuk inu chi,utọn̄ n̄a si îra inọ, mè igobo itet.
2 Inu enyi eriọọn̄be, emi si nriọọn̄;
ǹkasiki ìgak enyi.
3 Ire, emi m̀batumu ikọ inyi Ogwu Òkaan̄ Unye Geelek,
ǹkiweek itutumu ikọ ibot n̄a melek Awaji.
4 Ire, enyi ekikan̄ ataak isa ichit inu enyi ekariọọn̄ge,
enyi otutuuk ene ìre ebi ofia kpekikọt igwa ene.
5 Mebe enyi mîriaan̄ ere, kpesan̄a amọn geege,
eya monijeen̄ ibe ke enyi mîkaan̄ iriọọn̄-inu.
6 Ìgban̄-nu ibot ibot ikọ n̄a,
mè ìnọ ibot ikọ nto-lek nkitumu.
7 Ìre ikpak ikpak ikọ ke enyi ebetumu me otuchieen̄ Awaji,
mè itumu ikọ ofiaan̄ ofiaan̄ me ibot kan̄ ni?
8 Ìre enyi ebetumu ikọ ulibi-chieen̄ me ibot kan̄ ni?
Ìre enyi ebebọkọ ikọ ibot kan̄ itumu?
9 Ire ọmọ iwọlọ enyi ikpọ, ìre eya môsa nnwọn ijet enyi?
Ìre enyi mêkọt ifiaan̄ ọmọ kubọk ekifiaan̄ ebilene?
10 Ire enyi ilibi ene chieen̄ me nlelet,
ọmọ ìkpolọlọ ikakan̄ inu inyi enyi.
11 Ìre umin ubọọn̄ kan̄ ìkpotet enyi ukpook?
Sà ìre mbiribọ kan̄ ìkpogwook enyi me lek?
12 Ìkpọ, ikọ iriọọn̄-inu kinyi cha ìre urọk ebegegen̄ ifiin̄ kubọk ntọn̄,
ikọ enyi ekisa ikput lek cha ìre agbọ arika òkikpukpukpuku.
13 “Ìchit otu kinyi-nu, inyi ǹtumu ikọ;
ikaan̄ inu òborọ emi, irọ.
14 Keke orọ ni? Mâtap olik me ebek,
mè isa ubọk n̄a ikpan̄ lek n̄a.
15 Ọmọ môkọt ikpan̄ emi, ǹkayaka ìkaan̄ ikpọchieen̄ geege,
ubọk geelek si, m̀batutumu ikọ ibot n̄a me isi kan̄.
16 Eyiyi si môrọ inyi ǹkaan̄ unyan̄a,
mije, ogwu ijo ebilene ìkponu me isi kan̄.
17 Ìriọọn̄ ubọk ìgban̄ ikọ n̄a,
ìsa utọn̄ kinyi ìkpebe inu nkitumu.
18 Kpọ, nra ineen̄ ikọ n̄a isun̄ isan̄a,
nriọọn̄ ibe ke mêmun̄ ibe ke kpunu inu nlọbe.
19 Ìre ekene obonigwen ikọ itoon̄ emi me ibot?
Ire ikọ ifieek emi, mâchit otu, mè ikwu.
20 “Jei Awaji, rọ inu iba kechi nyi emi,
inyi ǹkọt ǹsan̄a lek n̄a ǹsibi me isi kwun̄:
21 San̄a ubọk osusut kwun̄ jọn̄ọ ere me lek n̄a,
mè kayaka ìsa ukpook kwun̄ ìtap emi ufieek-owot.
22 Osirọ, gwen emi, ke mâchieek,
mè ìyaka ire, tele emi ǹtumu ikọ, mè owu òfọọk.
23 Nrọ-nlọ n̄a mè ijo inu n̄a ìwawa ikup?
Rọ mè ǹriọọn̄ ere njebe ilọ, mè ijo inu nrọbe.
24 Keke orọ okilet isi kwun̄ me lek n̄a,
mè imọnọ emi kubọk ogwu ochicha kwun̄?
25 Ìre emi, nchat inwan̄ efet okiwut ije, ke okitap ukpook me lek?
Ìre emi, mfufe akpa ikike, ke okililaba?
26 Mije, owu oge inu òjajat ikeme emi,
mè irọ ijo inu mgbọ nsabọn irieen̄ n̄a itoon̄ emi me ibot.
27 Owu osa mkpọn ibọp ukot n̄a iba igọm,
mè ikiruk chieen̄ ikpọ otutuuk ukot ije n̄a,
mè itap emi iman̄ me akajit ukot, inyi òkosa òriọọn̄ akpat ukot n̄a.
28 Eya orọ nkitak ita kubọk inu òjọjọ,
kubọk ofọnti nkarankat otakabe igwak.