14
“Ene, îre enenwaan̄ oman;usen ugwem kan̄ ìre gaalek mgbidim, ufialek ufialek ojot.
2 Ìkitibi isibi kubọk ajakajak, mè ògen̄ òsan̄a;
ìkigwat lek iraka kubọk ogugo, ìkakifuk.
3 Ìre emi ogwu òkup ikeyi ke okigwuun̄ chieen̄ ikikpọ?
Ìre owu òborọ emi ǹgọọk owu ǹnin̄ oyerebet ni?
4 Ìre ekene obokọt isan̄a inu kpunube mbuban me lek
isibi me lek inu òkaan̄ mbuban me lek?
Kpunu ogwu òbokọt!
5 Eyi owu odọmọbe usen ugwem ene isun̄ isan̄a,
mè idọmọ otu ifuk onyan̄ kan̄ ifieek,
mè itap okike mgbọ inyi ugwem kan̄, ìkpokọt isaba iraka.
6 Eya orọ, da chieen̄ san̄a me lek kan̄, inyi ikaan̄ utelelek,
mè irọ ikwaan̄ kan̄ me usen me usen isan̄a kubọk ogwu ọkọ.
7 “Eyi kè uti înwọn, uti îkaan̄ ikpọ chieen̄;
ire ifieek ito, môkpọk isek,
ayaya agọọk kan̄ cha ìkpolọlọ ititibi.
8 Ire ugwun̄-ijọn̄ kan̄ ikan me emen ijọn̄,
mè ebon kan̄ ikwu me emen achiaan̄,
9 isinọnọ olu mun̄, îra itibi oduuk,
mè igwook agọọk kubọk ke ewowop.
10 Ire, ogwu ebilene isikwu, unye kan̄ îta,
isifuuk òta efuuk kan̄, ìyaka ikup me ere owa ni?
11 Ike mun̄ okichiaak ita me nria,
mè okolo òchat òsan̄a, mè ojijaka,
12 ikeya ke ene okilaak, ìkayaka ìkinan̄a ìkeke okup;
mege isinyọn̄ oraka òsan̄a, ene ìkpobolo chieen̄ me ilaak,
kpebekọkọt si itimi ọmọ me ilaak kan̄.
13 “Jei, kè ònwọn ire owu molet emi me ama ekwukwu,
mè ilet emi mege unaan̄-ejit kwun̄ môrakabe!
Kè ònwọn ire owu mosun̄ okike mgbọ mâkupbe me ere ya ire,
mè iyaka inikeek emi mgbọ mgbọ ya isiso!
14 Ire ene ikwu, ìre môyaka ikpọk igat ugwem ni?
Mâkup otutuuk usen ikwaan̄ n̄a
mege ogwu òbonibọkọ irek n̄a mônube,
inyi ǹkaan̄ utelelek.
15 Owu môgwen emi, mâchechieek owu;
inu ubọk kwun̄ orombe mônenilọk owu.
16 Mije, owu môfuk ukot ije njibibe,
òkpoyaka ikiruk chieen̄ ikpọ ijo inu n̄a.
17 Owu môtap nrọ-nlọ n̄a me emen akpa itobo otu ichit,
mè ichiọọk ijo inu n̄a ininimi.
18 “Ire, ike ogoon̄ okigbugbọ, mè ikpukpuku igwook,
mè ike ewuuk okifan̄a inan̄a me akpat,
19 ike mun̄ okigwọk ewuuk isip,
mè ike agbugbuk okigwọk achiaan̄ ijọn̄ isan̄a,
ikeya ke owu okijijaka ikpọchieen̄ ogwu ebilene igwook.
20 Òkisa unye kwun̄ isulu ọmọ ito ire mgbọ geelek,
ọmọ îra ikwu ifo;
owu òkisa mkpa inwene isi kan̄,
mè iria ọmọ isibi me linyọn̄.
21 Ire bọn ebirieen̄ kan̄ ibọkọ umin, ọmọ ìkariọọn̄;
ire ema iben esip, ọmọ ìkamun̄.
22 Ufiak eyi akpalek kan̄ gaalek ke îkinọ me lek,
mè ikifieek ejit inyi lek kan̄ gaalek.”