Elifaji îtumu ikọ òso mgbọ iba inyi Jobu
15
Elifaji ogwu Teman onenibọkọ otu ibe:2 Ìre ogwu òriọọn̄ inu môsa ukpọk ukpọk ifuk-ibot ifọọk ikọ?
Ìre môtap uyok efet agan̄ mbum-ura ijot owot ikinya igwook?
3 Ìre ìbosa ikọ ikakaan̄ge ibot iwut ifan̄a,
sà ìre ìbosa usem kpunube oruru me lek irọ ni?
4 Iin̄, me atikọ, owu òkayaka ìkaan̄ ukpook Awaji,
òkiweek ibe irariaak Awaji ichep.
5 Ijo inu kwun̄ okijeen̄ otu kwun̄ inu ìbotumu;
òkilaka alọm kubọk ebi ifiọk.
6 Otu kwun̄ gaalek otip owu ikọ, ìkare emi;
ukpọk otu kwun̄ gaalek okeke ata-ikọ ikeme owu.
7 “Ìre owu ore adasi ene emanbe?
Sà ìre osibi inyọn̄ sabum ebi kè ogoon̄ ni?
8 Ìre owu òkekinọ oru Awaji?
Ìre owu gaalek okaan̄ iriọọn̄-inu ni?
9 Keke ke owu oriọọn̄ eyi eji kperiọọn̄?
Kpasi ngobo-ntet ke okaan̄ eyi eji kpekaan̄?
10 Ogwu isọọn̄ ibot mè ogwu òkakan,
mè ikan enenen igak nte kwun̄, òwa me etete kiji.
11 Ìre ukarajit cha Awaji okinyi owu,
mè ikọ echi ekisiki lek itumu melek kwun̄, ìkaso owu?
12 Keke okiwuwọlọ owu ejit,
mè irọ chieen̄ kwun̄ ikinin̄ irio,
13 inyi owu ògwuku unaan̄-ejit kwun̄ òbook me lek Awaji,
mè ojelek ikọ kechi ikinan̄a owu me otu isibi?
14 “Keke ke ene ore, eyi môkọtbe itana me isi Awaji?
Ene enenwaan̄ omanbe, ìborọrọ ire ogwu ata irọrọ?
15 Kpọ, Awaji ìkatoon̄ ejit me lek ebi osat kan̄,a
akpabin inyọn̄ me lek kan̄, ìkatana me chieen̄ Awaji.
16 Ire ikeya, ìre ìbokukup me lek ogwu ebilene òfafiat mè ibubuku,
ogwu òkirọ ijo inu kubọk ekinwọ mudim?
17 “Gban̄, inyi m̀kpa ǹnyi owu;
tele ǹtumu inu mmun̄be ǹnyi owu.
18 Ebi ìriọọn̄ inu ekpa inu yi;
ema kpelelet inu yi ebi nte nte kiban̄ ejeen̄be ema.
19 (Îre ema cha ke enyi ijọn̄ ya,
mgbọ ya kpunu ogwu ichen geege me etete kiban̄.)
20 Ogwu ikpak ìkibọkọ ukwook otutuuk usen ugwem kan̄,
ogwu unye-ejit ìkikup me ukwook
otutuuk otu ifuk acha esun̄be inyi ọmọ.
21 Okput òkifieek ọmọ owot ke utọn̄ kan̄ okinọ;
mgbọ îkikeek ibe ọmọ mônicho efuuk,
ebi inọ afa mîra imeen̄ ọmọ.
22 Ìkakpọ chieen̄ ibe ọmọ mônwọnọ udun eyi ukwook,
mije, oge akọn̄ ìkukup iban ọmọ ikpakpan̄ ọmọ.
23 Ìkinyinyinya ikana ikiweek inorie;
îriọọn̄ ibe usen udun eyi mkpa îre ọmọ ubọk isan̄a.
24 Ufieejit mè ofaak îtet ọmọ ukpook,
mè iweke ọmọ ibot, kubọk ogwu ubọọn̄ akọn̄ okinu me lek.
25 Mije, ọmọ ìnwun akpọ ibosa igọọk Awaji itim etim,
mè ikijeen̄ unye kan̄ me isi Ogwu Òkaan̄ Unye Geelek.
26 Ìkiben agbọ akpọk ile ònyenye,
isa ikije ukaan̄-lek ukaan̄-lek isi akọn̄ me lek Awaji.
27 “Ubọk geelek îtapbe ufuk igak akpa isi,
mè iwak ufuk ikana ebon,
28 ìboluk me ama akọn̄ ogwakbe igwook,
me emen uwu eyatbe itele,
echi òbogbugbugbọ ikana ǹrioon̄.
29 Ìkpoyaka ibọọn̄, inu ubọọn̄ kan̄ ìkpofuk,
inu ǹkaan̄ kan̄ ìkpowa ichit inyọn̄ ijọn̄.
30 Ìkponwọnọ udun eyi mkpa,
alọm ukan̄ môtet nsek agọọk kan̄ ichiaak,
efuuk ònan̄a me otu Awaji ìbobeben ọmọ ije.
31 Ọmọ ikasa inu ikakupge me lek inu geege ìtoon̄ ejit,
mè ìfiaan̄ lek kan̄,
mije, ìkpomun̄ oruru geege.
32 Sabum mgbọ kan̄ ònokem, ọmọ îra ichiaak isan̄a,
agọọk kan̄ ìkpoyaka isek ikup njijoon̄ njijoon̄ ofifi.
33 Ọmọ ìbokup kubọk olik gerep
mfut kan̄ ogen̄be isan̄a mkpukpem,
mè ikup si kubọk uti olifu
ajakajak kan̄ ogen̄be isan̄a me lek.
34 Ebi owot iman urum ebi kperiọọn̄ Awaji ebere ebi ora;
ukan̄ ìbotataka uwu ebi ìkirie ngan iriọk.
35 Ema ekinin̄ owot ufialek, mè eman ijo inu;
akpa gwun̄ kiban̄ ìkisan̄a ofiaan̄ isibi.”