Jobu îbọkọ Elifaji otu
16
Jobu onenifọọk otu ibe:2 “Inu kechi, nra inọ owuwa owuwa;
enyi otutuuk ene ìre ikpak ikpak ebi ìkat ene ejit!
3 Ìre ikọ efet efet ikike ìkakikaan̄ itata ni?
Keke okifiak owu, eyi okpọkpọ itet lek inye ikiwut ifan̄a?
4 Mebe enyi ekup me irek n̄a, emi nkukup me irek kinyi,
emi si, kè ntumu ikọ enyi ekitumu;
kè ntumu ikọ ntoon̄ enyi me ibot,
mè ǹkentọp ibot nnyi enyi.
5 Ire, kè otu n̄a orọ ejit kinyi inye,
mè ikọ ukarajit otu alọm n̄a osuuk enyi lek.
6 “Eyi, ikerere ǹtutumu ikọ, ufiak n̄a ìkasuuk,
ire ǹkatutumu, ìkatetele emi si.
7 Awaji, owu orọ efuuk ita emi me owot;
owu ojijaka otutuuk urum ebi n̄a isan̄a kpai.
8 Owu orọ inyi emi ǹruk ǹchat,
eyi ònenire ata-ikọ ikeme emi;
lek n̄a ògwọgwọọn̄ îkana ata-ikọ ibe ke emi nrọ ijo inu.
9 Awaji îsa me unaan̄-ejit igwak emi iche, mè icha emi;
înaan̄ ejit uyok uyok inyi emi;
ogwu oriara n̄a îyaka chieen̄ igwuun̄ emi me lek.
10 Ebi ene enwenwe otu ibook ikichak emi;
ema ekitap emi ada me agba otu isa ikirọ emi ochak,
mè igbaan̄ lek itọbọ ikirọ ikeme emi.
11 Awaji îyaka emi inyi ebi ijo ife,
mè itọp emi itap me ubọk ebi ikpak;
12 Inu îjaan̄ me lek n̄a, ire, itọtọbọ emi ikpọk;
ìtet emi me okọt ebek, mè inwan emi ikpukpuku.
Îsa emi ito okukọọk,
13 ebi oraan̄ kan̄ ekekeke ikana emi okokop.
Ìkatoto emi njijin, îchim emi ichip me ebon itibi,
mè ifiin̄ olulut n̄a igwook me ijọn̄.
14 Ìlilibi iraak iraak inin̄ emi lek kubọk ogwu akọn̄,
mè igwak emi itibi me irek me irek.
15 “Ekwut ufieejit ke nchim isa ichit akpa lek n̄a,
mè iben ibot n̄a ifuun̄ me ntọn̄.
16 Ito îjiik emi chieen̄,
ito îtap udun ichit emi chieen̄.
17 Ire, ubọk n̄a ìkanin̄ me inu afa,
uriaak n̄a si ìtatana ikup.
18 “Jei ijọn̄, kachit eje n̄a ibe ikato ito;
kè ito n̄a ikata.
19 Ikerere mgbọ keyi, ogwu ata-ikọ n̄a òwa me emen inyọn̄,
ogwu òkitumu ikọ ibot n̄a òwa me akpabin inyọn̄.
20 Ebi une n̄a ekichak emi ochak,
mun̄ ito chieen̄ n̄a ìkigwook inyi Awaji.
21 Jei, mebe ene ge moniteek nteek me etete Awaji melek ebilene,
kubọk ene okitumu ikọ me ibot ogwu unene kan̄.
22 Gaalek acha inen mè inen oboraka,
sabum mâneninan̄a ije eyi ekisi, kpekiyaka ika.