17
“Ekwukwu n̄a îwulu ichep,usen n̄a îta,
udọn̄-ufuun̄ ìkikukup iban emi.
2 Me atikọ, ebi ochak ekakana emi okokop,
mè ikiweek emi ikọ ujat ujat, ǹkakọt ìsan̄a ema chieen̄ me lek.
3 “Jei Awaji, owu me lek kwun̄ bọkọ emi me ata-ikọ ma.
Ire ilọ owu, ekene obonyana ubọk itet emi ni?
4 Owu ogon ema ejit ichit, inyi ekakaan̄ ngobo-ntet,
eya orọ, kachieek ibe ema etim ekpan̄ emi.
5 Ogwu ijit ebi une kan̄ bak me lek ikpoko,
chieen̄ bọn kiban̄ môchit me useen̄.
6 “Awaji îsa emi irọ ogwu ekisa irọk urọk,
mè ogwu ekicho ataak itọbọ me isi.
7 Chieen̄ n̄a îdun bak me lek ufieejit,
otutuuk unye nriro lek n̄a îniniin̄ ichep kubọk ogugo.
8 Ufialek n̄a yi îke chieen̄ ebi ìkirọ unen,
ogwu ǹkalọ okekinaan̄ ejit ikeme ebi kperiọọn̄ Awaji.
9 Ogwu ata irọrọ ìtetet inye ibe ọmọ ìre ogwu ata irọrọ,
lek ogwu ubọk otanabe ìbokpọkpọ ikinye.
10 “Ire, otutuuk kinyi, ìgwu ìkom, ìnikpọk ìtumu ikọ kinyi!
Nriọọn̄ ibe m̀kpamun̄ ene ge òriọọn̄ inu me etete kinyi.
11 Usen n̄a îta, otitọt n̄a geelek îlọ isan̄a,
inu mbenbe me ejit irọrọ îfieek ichep.
12 Ebi une n̄a ebe ke eririeen̄ ìre ikarek,
emi me emen udun nkupbe, ema ebe ke îre utoon̄.
13 Ire mkpọ chieen̄ ibe ke udọn̄-ufuun̄ ore uwu n̄a,
mè ire nto mkpilaak n̄a me emen udun ilaak;
14 ire ntumu inyi udọn̄ ibe,
‘Owu ore nte n̄a,’
mè ibe mkput,
‘Owu ìre nga n̄a mè ngwan̄ n̄a enenwaan̄,’
15 ìre ikpọchieen̄ n̄a ìkup me owa ni?
Ekene obokọt imun̄ ikpọchieen̄ n̄a?
16 Ìre ikpọchieen̄ chi môgọọk emi inin̄ udọn̄?
Ìre eji mêgbaan̄ igele isiki inin̄ achiaan̄ ni?”