Bilidadi îtumu ikọ òso mgbọ iba inyi Jobu
18
Bilidadi ogwu Suwa onenibọkọ otu ibe:2 Mgbọ owa ke enyi ebetumu ikọ chi ifieek?
Ìtet otu ìkaan̄ mè ìgban̄, inyi eji ekọt etumu ikọ.
3 Keke orọ ekimun̄ eji kubọk anam?
Keke orọ eji ekupbe me chieen̄ kinyi kubọk ebi tuntun?
4 Owu ogwu òsa me unaan̄-ejit itap unan me lek kwun̄,
ìre eyat etele linyọn̄ enyi owu ni?
Sà ìre mêbak me lek kwun̄ ijibi ewuuk isan̄a me akpat?
5 “Mêwut mkpukan̄ ogwu ijo ene iniin̄ dìp dìp,
alọm ukan̄ kan̄ ìkpoyaka ilomo.
6 Utoon̄ emen uwu kan̄ môkana udun,
mkpukan̄ òkup me agba lek kan̄ môniin̄.
7 Unye ukot ije kan̄ môwọ,
ekiket kan̄ môben ọmọ itọbọ me ijọn̄.
8 Ukot kan̄ oben ọmọ isi itap me lek njin,
ikwakwala inin̄ me ufe.
9 Ufe îgọbọ ọmọ me ibot ukot,
olik ufe otetet ọmọ ikam.
10 Mîlet olik ufe me ijọn̄ iban ọmọ,
mè itip ufe ito me oniin̄ îkije.
11 Ukpook uwuuk-lek îkana ọmọ me agan̄ geelek,
mè ikigọọk ọmọ me akpat ukot.
12 Unye kan̄ îta isan̄a mije uraafiọọn̄,
ùrioon̄ ìkukup ikikpọ ọmọ ibe inan̄a irọn̄.
13 Orukan̄ îtaka akpa kan̄ usini ere ijibi,
ijo orukan̄ mkpa îrie ọmọ nriro lek igwak.
14 Mîdut ọmọ isibi me uwu kan̄ ere îkaan̄be utelelek,
mè isa ọmọ ije ijet mkpa,
òrere ogwu ubọọn̄ òkitet ene ukpook.
15 Ebi kpere ebi kan̄ mêluk me uwu kan̄,
mîfiaak biridọni ichit ere nluk kan̄.
16 Me agan̄ irak, ugwun̄-ijọn̄ kan̄ îkwaan̄ isan̄a,
me agan̄ inyọn̄, agọọk kan̄ îchiaak isan̄a.
17 Kpunu inu mêsabe ikikeek ọmọ me linyọn̄,
erieen̄ kan̄ îchep me oyet dìp dìp.
18 Mîrieen̄ ọmọ isibi me utoon̄ itap me udun,
mè ilap ọmọ isan̄a me linyọn̄.
19 Ìkakaan̄ gwun̄ mè ìre gwun̄ gwun̄ me etete ebi kan̄,
ìkakakaan̄ si ogwu òsisik me ere îlukbe.
20 Ebi agan̄ ichep-ura mîtet ukpook mije inu òrọrọ ọmọ,
ebi agan̄ mbum-ura mîriki.
21 Me atikọ, eya ore inu òkukup inyi ebi ikpak,
mè ikup si inyi ebi kpekinyi Awaji umin.”