Elifaji îtumu ikọ òso mgbọ ita inyi Jobu
22
Elifaji ogwu Teman onenibọkọ otu ibe:2 “Ìre ogwu ebilene mônin̄ Awaji oruru?
Ìre ogwu òriọọn̄ inu môsibi oruru inyi ọmọ ni?
3 Ire owu ore ogwu ata irọrọ,
ìre kpasi ubelejit ke eya obonyi
Ogwu Òkaan̄ Unye Geelek?
Ire owu ore ogwu ǹkalọ,
ìre kpasi oruru ke eya obonin̄ inyi ọmọ?
4 “Ìre bak me lek okitet ukpook me lek kan̄
ke îkikan̄ inu inyi owu,
mè igwen ikọ itoon̄ owu me ibot?
5 Ìre ijo inu kwun̄ ìkafat ìwa ìgana?
Ìre ijo irọrọ kwun̄ îkaan̄ okputut?
6 Owu ogen ibak ifum inu ngwan̄ kwun̄ me lek urieek,
mè itet ebi ene ekwut ibọkọ, mè isun̄ ema njak.
7 Owu ojit inyinyi ebi lek owọbe mudim enwọ,
mè itet inorie ikaan̄ ibe ebi uraafiọọn̄ ekarie.
8 Ogwu unye okaan̄ ijọn̄,
sà ogwu egobobe isi okiluk me lek ijọn̄ ya.
9 Owu orieen̄ ebi nwakpa isibi ukpọk ubọk,
mè itutuku ebi kpà-nte.
10 Eya orọ ufe okanabe owu okokop,
ọmọ orọ si uga ukpook otetbe owu me uwuuk lek,
11 mè itap udun, inyi owu okamọọn̄ inu,
mè isa mun̄ ile inimeen̄ owu igen.
12 “Ìre Awaji ìkabene ìchep me akpabin inyọn̄?
Kpọ ubọk ntoronyan̄
echi òbebene ichit cha obenebe ire!
13 Ire, owu okekibe, ‘Awaji ìriọọn̄ keke?
Ìre ìbokup me emen ekpuk udun
òchichit ọmọ isan̄a me chieen̄ ene
ikisibi oyerebet ni?
14 Oduku inyọn̄ òdudun îkwek ọmọ isi, ìkpomọọn̄ ere,
ọmọ ìkije ikana me lek okwuun̄ isinyọn̄.’
15 Ìre owu môje me oka oniin̄ yaage
ebi ikpak ejebe ni?
16 Ema mîkwaan̄ sabum mgbọ mkpa kiban̄,
mkpa ìkpulu ema ije
kubọk agbugbuk orọkọ uwu me ebon ito.
17 Ema ekitumu inyi Awaji ibe, ‘Nan̄a eji me lek!
Ogwu Òkaan̄ Unye Geelek ìbokọt irọ eji keke?’
18 “Ire, îre Awaji otap ata inu geelek ijot uwu kiban̄;
eya orọ, emi ǹkije ǹsọn ǹsọn me lek nteme kiban̄.
19 Ebi ata irọrọ mîmun̄ ùrioon̄ òkekeme ebi ikpak,
mè ikibele ejit,
ogwu ǹkalọ okekichak ema ochak, mè ikibe:
20 ‘Me atikọ, mîjijaka ebi oriara kiji isan̄a kpai,
ukan̄ îtaka inu ubọọn̄ kiban̄ òsisik iriọk.’
21 “Jobu, gọọk Awaji nen̄e sun̄,
inyi owu òkup me esuuk melek kan̄;
ire orọ ikeya, inu môje ijaan̄ owu me lek.
22 Bọkọ nteme otu kan̄ tap,
mè sun̄ ikọ kan̄ me ejit kwun̄.
23 Ire ogwu ikom inu me lek Ogwu Òkaan̄ Unye Geelek,
ọmọ môtap ichit inyi owu;
ire osan̄a ijo inu isan̄a me uwu kwun̄,
24 mè imọnọ alata araran̄ kubọk ke ìre achiaan̄,
mè imọnọ atalek alata araran̄ ònan̄a me Ofiri
kubọk ke ìre bọn ewuuk eden̄ okolo,
25 Ogwu Òkaan̄ Unye Geelek
mônenire alata araran̄ kwun̄,
mè ire si alata okuket eyi atata inyi owu.
26 Inu Ogwu Òkaan̄ Unye Geelek mônenikitop owu me lek,
owu mônenikikọt ibene isi ikikpọ Awaji.
27 Mgbọ ya, osibeek ọmọ mbeek, ọmọ mônọ mbeek kwun̄,
owu mônenirọ inyan̄a-ibot onyan̄abe inyi ọmọ iso.
28 Inu geelek otumube ifieek, eberọrọ,
oniin̄ kwun̄ geelek ìbokitotoon̄.
29 Ebi ofifi ene isinan̄a irọn̄, owu môbebe ke îre mije ugumu,
mije, Awaji ìkinyan̄a ebi ìsisiki lek.
30 Mônyan̄a ogwu ikarege ogwu ǹkalọ,
ìbonyan̄a ọmọ sa me ubọk kwun̄ òtatana.”