Jobu îbọkọ Elifaji otu
23
Jobu onenibọkọ otu ibe:2 “Ikerere chereyi, nana-lek n̄a ìre ujat ujat;
ǹsasa ubọk n̄a ikeme nana-lek n̄a ikaan̄.
3 Jei, mebe nriọọn̄ ere mbaweek Awaji imun̄,
kè ǹsi ere îkikup!
4 Kè mkpa ikọ n̄a m̀wele me isi kan̄,
mè ntumu ikọ ǹtọn̄ọ lek n̄a.
5 Kè nriọọn̄ inu ìbofọọk emi,
mè ngobo inu ìbotumu inyi emi ǹtet.
6 Ìre Awaji môsa otutuuk unye kan̄ igbini ikọ melek n̄a ni?
In̄-in̄, ìkporọ, môgban̄ ikọ mâtumube.
7 Me ere ya, ogwu ata ene
môkọt ikpa ikọ kan̄ iwele melek kan̄,
Awaji ogwu òkisibi oyerebet n̄a
mônwọn emi ikọ ire mgbọ geelek.
8 “Ire, ire nsi me agan̄ mbum-ura, ọmọ kpunu me ere keya,
ire nsi me agan̄ ichep-ura, m̀kpamun̄ si ọmọ.
9 Mgbọ îkirọ ikwaan̄ me agan̄ inyọn̄, ǹkakimun̄ ọmọ;
isikana inyi agan̄ osiki,
ǹkakirieen̄ ọmọ chieen̄ me lek.
10 Ire, ọmọ îriọọn̄ oniin̄ nkije;
isiroon̄ emi ikpọ, mâkitoon̄ kubọk alata araran̄.
11 Ǹkito ukot n̄a me akpat ukot kan̄,
oniin̄ kan̄ ke nkije, ǹkagwaka ìtele.
12 Ǹkatele isusun̄ ikan îsabe otu kan̄ itap;
mben ikọ otu kan̄ me ejit igak inorie nkirie usen geelek.
13 “Ire, ọmọ ìkeke ọkpọkpọ, ekene obokọt inwene ọmọ ejit?
Inu òkup me ejit kan̄ ke îkirọ.
14 Môrọ inu îdọmọbe ibak emi iso;
ntọt kecha îtọtbe iban emi,
îkaan̄ si ojelek kan̄ owuwa owuwa.
15 Eya orọ ukpook okitet emi me isi kan̄;
nsikikeek inu yi, ukpook kan̄ îra ikitet emi.
16 Awaji îrọ emi ǹkana ogwu ukpook owot,
Ogwu Òkaan̄ Unye Geelek îtap emi ukpook me lek.
17 Ire, udun ìkachit emi otu nu,
ọmọ îchit ekpuk udun isan̄a emi me isi.