24
“Keke orọ Ogwu Òkaan̄ Unye Geelekìkasun̄ mgbọ oyerebet ìnyi ebi ikpak?
Keke orọ ebi ìchechieek me lek kan̄
kpebemun̄ usen oyerebet kan̄ kecha?
2 Ebi ikpak mîjujuk ewuuk okike ijọn̄;
ema mîchichim urum arọọn̄,
mè ikikpukpo ikana eyi kiban̄.
3 Ema ekitaba inyinya akpan ogwu kpà-nte isa ije,
mè ifum eriembuuk ogwu nwakpa
me lek urieek îkaan̄be ema.
4 Ema ekisa lek lek ida ebi una isan̄a me lek oniin̄,
mè ikisa unye irieen̄ otutuuk ebi ugbọọn̄ me linyọn̄,
inyi esi elet lek kiban̄.
5 Eya orọ, ebi ugbọọn̄ ekisisaan̄ ikana ere ikirọọn̄ inorie,
kubọk inyinya akpan oron okirọ me emen èwê;
emen èwê ke ema ekirọọn̄ inorie inyi bọn kiban̄.
6 Ema ekisi ititen̄e inu geelek
ebikaan̄ uko ekpulube isik,
mè ikisi irọọn̄ gerep me uko gerep ebi ikpak.
7 Mije una ekwut, ema ekikup njak me eririeen̄;
kpekaan̄ ekwut geege
esabe ikikwek utọọk me lek kiban̄.
8 Ibot lek ogoon̄ ìkidedek ema lek isan̄a,
ema ekikana ewuuk ikat igọm,
mije kpunube ere ema ekikwek lek.
9 Ebi ikpak ekisik gwun̄ kpà-nte
isan̄a me otu ebe ogwu uga;
ema ekifum gwun̄ ogwu ugbọọn̄ me lek urieek.
10 Ebi ugbọọn̄ ekije njak njak ikana,
mije, kpekaan̄ ekwut,
mè ikisa ukpọk owot ibeme akpa me uko inyi ebi ubọọn̄.
11 Ema ekikup me etete mgban kiban̄ ichimi aran̄ olifu;
ema ekijak gerep isan̄a miin̄, ire, mè ikirak ebek.
12 Me emen ama ile, ebi ìkikwakwaan̄ mêkito mfi,
ebi unan osakbe mêkitaan̄ ukpo ibeek ntap-ubọk.
Ire, Awaji ìkagana ere ìnyi ene geege
ebi ìkirọ inu cha.
13 Îkaan̄ ebi kpema utoon̄ egwe,
kperiọọn̄ oniin̄ eyi utoon̄,
kpekimama si ikukup me oniin̄ utoon̄ okupbe.
14 Egwe isifit, ogwu òkpan̄ ene îra inan̄a ikeke,
mè òsi òkpan̄ ebi ugbọọn̄ mè ebi una;
isire eririeen̄, îra isibi isi ichiin̄ inọ.
15 Chieen̄ ogwu ugan-nwa ìkigwọk ikpọ udun ikakwun̄;
mgbọ ya ke îkilileek isi kan̄,
mè ikibe, ‘Ene geege ìkpomun̄ emi.’
16 Ebi inọ ekibum uwu ene me irak udun,
isire ikarek, ema mîra ichit me uwu kiban̄;
utoon̄ ikarek ìkakire inu geege me lek kiban̄.
17 Ekpuk udun ìre ikarek me lek kiban̄ otutuuk,
ukpook udun ìkakitet ema kubọk ge.
18 “Ire, ema ekup kubọk awo me inyọn̄ isi mun̄,
ikafiat mgbọ, mîniniin̄ ita;
Awaji îfieek otu inyi ijọn̄ kiban̄,
eya orọ, kpunu ogwu òkisi
irọ ikwaan̄ me uko gerep kiban̄.
19 Ike uyok ura melek una ibot ekilaka mbat irak,
ikeya si ke ama ekwukwu
okikpulu ebi ìrọ ijo inu imeen̄.
20 Owot òman ogwu ikpak môwuuk ọmọ,
ìkpoyaka ikpọk ikeek ọmọ ofifi;
ebi kè mkput mêtaka ọmọ inọ utop,
mêtaka ọmọ ikpukpuku kubọk uti echobe ito.
21 Mije, ọmọ ìkitutuku ogwu ora ikakaan̄ge gwun̄,
ìkakaan̄ ata ejit me lek nwakpa.
22 Ire, Awaji ìkisa unye kan̄ idut ebi unye isan̄a;
ema ikebebene lek,
kpunu ikpọchieen̄ ibe ke ema mêgat ugwem.
23 Awaji môkọt inyi ema utelelek,
ema mêkekeek ibe ke ema mînwọnọ;
ire, chieen̄ kan̄ ìkakinan̄a me akpat ukot ije kiban̄ geege.
24 Ema mêtaan̄ etip sọntitiik mgbọ, mè ininiin̄ ichep,
ema mêchiaak, mè igen̄ igwook kubọk ajakajak,
mêfefieek ema isan̄a kubọk ekifieek akpa.
25 “Ire ìkare ikeya, ìre ekene obokọt ijeen̄ ibe ke emi ìre ogwu ataak,
mè ijeen̄ ibe ke ikọ n̄a ìkare atikọ?”