Òta ikọ kè Jobu
29
Jobu okekitumu ikọ kan̄ ifo isi ibe:2 Jei, kè m̀ma ikukup ubọk nkupbe me onyan̄ òraraka cha,
me usen cha mgbọ Awaji okibem emi,
3 mgbọ utoon̄ okitoon̄ isaba emi ibot kubọk mkpukan̄,
nkekisa utoon̄ kan̄ imọọn̄ inu ije itibi emen udun!
4 Jei, usen kecha mgbọ nrebe nsabọn irieen̄,
mgbọ Awaji orebe unene ibot ejit n̄a,
mè ikikpọ chieen̄ me lek uwu n̄a,
5 mgbọ Ogwu Òkaan̄ Unye Geelek okupbe si melek n̄a,
bọn n̄a si egbagban ikana emi okokop.
6 Mgbọ ya, ubọọn̄ ìdudun̄u emi olu me lek,
aran̄ olifu okekigbuk igwook inyi emi
me lek ewuuk ere ichimi aran̄.
7 “Nsisibi isi otunchit ere ama ekititiin̄,
mè isiki ikweek irek me oyet ama,
8 nsabọn irieen̄ isimun̄ emi,
mîra inan̄a me oniin̄,
ebi ugane isimun̄ emi,
mîra inan̄a keke inyi emi umin;
9 ebi ibot mkpulu isimun̄ emi,
mîra itet usem kiban̄ ikaan̄,
mè esa ubọk èchit otu kiban̄;
10 ebi isi ene mîra iriaan̄ ere,
mè ègba otu egọm.
11 Ebi geelek ìnọnọ ikọ n̄a mîra ikitumu ata ikọ ibak emi;
ebi geelek ìmumun̄ emi mîra ikitọn̄ emi.
12 Mije, ǹkekinyan̄a ebi ugbọọn̄
ìtataan̄ ukpo iweek ntap-ubọk,
mè ikinyan̄a ebi kpà-nte ebi kpekaan̄ ebi ntap-ubọk.
13 Ogwu ufieejit obokpan̄, nnyan̄abe, ìkitọtọn̄ emi,
ntap-ubọk n̄a orọ ejit nwakpa ibele, mè ikọt okwa.
14 Ntap ata irọrọ kubọk ofọnti,
ichichit emi lek kubọk ekwut;
unen oyerebet ore ofọnti inyọn̄ n̄a mè akisi ibot n̄a.
15 Emi nkana chieen̄ inyi ebi ǹnàan̄,
mè ikana ukot inyi ebi akọọk.
16 Emi nre ute inyi ebi una,
mè ikiwọlọ emen oyerebet ebi ichen, inyi mfeen̄ ikakup.
17 Emi mfaan̄ ejeek me otu ebi ikpak,
mè isik ebi ema eloon̄be ibọkọ isan̄a me otu ejeek kiban̄.
18 “Nkekikeek ibe,
‘Acha ugwem n̄a môwa kubọk nkwukwuuk achiaan̄,
m̀bakwu ilaak me uwu n̄a me utelelek.
19 Emi ǹkup kubọk uti ugwun̄-ijọn̄ kan̄ otibibe ire lek mun̄,
mbat okekireke agọọk n̄a otutuuk eririeen̄.
20 Umin ìbokpọkpọ ikinu inyi emi,
aya unye ìbokpọkpọ ikinin̄ emi emen.’
21 “Ebi ene ekekigban̄ ikọ n̄a, mè èkup èkekpọ emi,
mè èkeriaan̄ ere egban̄ nteme n̄a.
22 Nsitumu isan̄a, ema kpekitap otu;
ikọ n̄a îra ikisiki ema lek kubọk òfiik mun̄.
23 Ema ekikukup ikpọ emi kubọk ekikup ikpọ ibot,
mè ikibọkọ ikọ n̄a itap kubọk ijọn̄ okimeen̄ aya otu ibot.
24 Nsikichak imọm melek kiban̄,
ema kpekichieek ibe ke ene òbet lek n̄a
mâkọt ichak imọm melek kiban̄;
ubelejit òkup me isi n̄a,
ema kpekichieek ibe inan̄a irọn̄ me ijọn̄.
25 Emi nkijeen̄ ema oniin̄,
mè ire ogwu ibot inyi ema,
mè ikup me etete kiban̄
kubọk ogwu ubọọn̄ okup me etete ebi urum akọn̄ kan̄;
ǹkup kubọk ogwu òkisiki ejit
ebi ufieejit.”