Awaji okaan̄ iriọọn̄-inu
28
“Alata okuket, îkaan̄ ere ekirọkọ,alata araran̄, îkaan̄ ere ekikala.
2 Ekisan̄a okwukwut me emen ijọn̄,
mè èkala ekwe esibi me lek ewuuk.
3 Ene ìkisi iwọlọ irak irak ejit ijọn̄
ikiweek ewuuk ekwe me emen ekpuk udun;
mè ikiben mkpukan̄ isa ikirieen̄ udun isan̄a.
4 Ìkitibi udọn̄ inin̄ ejit ijọn̄ ida ibọkọ me ere ene ekiluk,
me ere ukot ene ikajakge,
mè ikije me lek olik igele isiki, ijọn̄ọ ere me lek ebi ene,
mè ikididen̄, mè ikinyinyọn̄ọ ikirọkọ ewuuk.
5 Inyọn̄ ijọn̄ ke inorie okinan̄a isibi,
ire, irak kan̄ îwuwọlọ isan̄a kubọk ke esa ukan̄ ikala;
6 emen ewuuk kan̄ ke safaya,
ewuuk oluku oluku, okinan̄a,
emen ntọn̄ kan̄ ke alata araran̄ okikup.
7 Unọn òben unọn geege ìkariọọn̄ oniin̄ udọn̄ ya,
akwanakwa geege ìkarerieen̄ chieen̄ me lek.
8 Ebi kè anam afa kpechachak ukot me oniin̄ ya,
egbe àtat geege ìkakijijen̄e me agan̄ ya.
9 Ene ìkisi ibak ewuuk unye isi,
mè ikirọkọ ebon ogoon̄ itama ikook.
10 Ọmọ ìkibum okolo itibi me emen ewuuk;
chieen̄ kan̄ îra ikimun̄
inu unye otu ewe geelek me ere ya.
11 Ìkigwugwuk mgban ikwek ibot mun̄,
inyi mun̄ ikayaka ìlibi ìsibi,
inyi inu òkup nlelet isibi utoon̄.
12 “Ire, ìre owa ke ebeweek iriọọn̄-inu imun̄?
Sà ìre ere owa ke ngobo-ntet okup?
13 Ogwu ebilene ìkariọọn̄ otu ewe iriọọn̄-inu;
kpebeweek imun̄ me linyọn̄ ebi ìkup me ògat ugwem.
14 Ugwuuk okwaan̄ ìbe, ‘Ìkakup me emen n̄a.’
Okwaan̄ ile ìbe, ‘Ìkakup me ubọk n̄a.’
15 Kpebekọt isa atalek atata alata araran̄ ilep,
kpebekọkọt si itọ alata okuket isa ikpe ewe kan̄.
16 Kpebekọt isa alata araran̄ ònan̄a me Ofiri ilep,
ikerere ewuuk unye otu ewe onikisi mè ìre safaya,
kpebekọt isa ilep.
17 Kpebekọt isa alata araran̄ mè ìre umọọn̄ itọ me lek,
kpebekọkọt si isa ugọn̄ alata araran̄ inwene.
18 Kpebechak otu me lek akalari mè ìre alọ, ìkagbe;
otu ewe iriọọn̄-inu îbene igak otu ewe ewuuk rubi.
19 Ewuuk topaji eyi Etiopia ìkanin̄ ògbo me lek,
kpebekọt isa atalek atata alata araran̄ ilep.
20 “Ìre ere owa ke iriọọn̄-inu onan̄a ni?
Sà ìre ere owa ke ngobo-ntet okup?
21 Elelet isan̄a me chieen̄ inu geelek òkiluk ugwem,
mè ilet si isan̄a me lek ebi kè unọn òwulu me inyọn̄.
22 Ebi ìkup me ere mfufiat mè ama ekwukwu ekibe,
‘Ukpatu kan̄ îre eji utọn̄.’
23 Awaji gaalek oriọọn̄ oniin̄ ekije ire lek,
ọmọ si oriọọn̄ ere îlukbe.
24 Mije, ọmọ okimọọn̄ ntutun̄ ere geelek me linyọn̄,
mè ikimọọn̄ inu geelek me irak isi ura.
25 Mgbọ Awaji onyibe efet unye,
mè ikisa otitọ itọ okike mun̄,
26 mgbọ înyibe ibot ikan ike ìbokirep,
mè itọ oniin̄ inyi ewuuk isinyọn̄ ikije,
27 inenimun̄ iriọọn̄-inu, mè itọp ibot,
mè iwọlọ ikpọ, mè inen̄e isun̄.
28 Awaji onenitumu inyi ogwu ebilene ibe,
‘Ìkpọ, itetet ukpook me lek Okaan̄-ene,
ọmọ ore iriọọn̄-inu,
isasan̄a lek me ijo inu, ọmọ ore ngobo-ntet.’ ”