27
Jobu okekitumu ikọ kan̄ ifo isi ibe:2 “Kè lek ugwem Awaji
ogwu òjijit emi unen oyerebet;
kè lek Ogwu Òkaan̄ Unye Geelek
ogwu òrọrọ ibot ejit n̄a imun̄ ujat,
3 otutuuk mgbọ nkifuuk efuuk ugwem,
otutuuk mgbọ efuuk Awaji okupbe me inwọm n̄a,
4 otu n̄a ìkabotumu ijo ikọ,
ikọ ofiaan̄ ìkabonan̄a me otu alọm n̄a isibi.
5 Emi ǹkabachechieek mgbọ geege ibe ke ikọ kinyi înen;
mege ǹkwu, ǹkabatele itutumu ibe ke emi ǹkalọ.
6 M̀batetet ata irọrọ n̄a inye, m̀kpatetele ubọk me lek;
ejit n̄a ìkpofieek emi ikọ geege mege ǹkwu.
7 “Kè ogwu ochicha n̄a ibọkọ osusut kubọk ogwu ikpak,
mè ogwu òkirọ ikeme emi ibọkọ osusut
kubọk ogwu ijo irọrọ!
8 Kpasi ikpọchieen̄
ke ogwu ikariọọn̄ge Awaji oyaka ikaan̄
mgbọ Awaji isifieek ọmọ ifiin̄,
mgbọ Awaji isisan̄a ugwem kan̄ isan̄a?
9 Ìre Awaji mônọ ida ukpo kan̄
mgbọ ufialek otetbe ọmọ ni?
10 Ìre inu Ogwu Òkaan̄ Unye
Geelek môtop ọmọ me lek ni?
Sà ìre ọmọ môkigwen Awaji mgbọ geelek ni?
11 “Mâjeen̄ enyi inu ofolek unye Awaji,
emi m̀kpalet inu Ogwu Òkaan̄ Unye Geelek
odọmọbe isun̄ me ejit kan̄.
12 Enyi otutuuk ene mîsa chieen̄ kinyi imun̄.
Ire, keke orọ enyi ekitumu ikọ kpunube ibot me lek?
13 “Inu Awaji osun̄be iban ogwu ikpak,
mè ìrot ogwu òkitutuku ene okikaan̄
me ubọk Ogwu Òkaan̄ Unye Geelek ìre ikeyi:
14 Ike geelek bọn kan̄ ewabe ire,
mênin̄ isan̄a me otu oge akọn̄,
bọn kan̄ kpebemun̄ inorie irie ijot owot.
15 Ọmọ isikwu inan̄a,
bọn kan̄ ebi ìsisik me udun̄ kan̄ ebekwakwaan̄ mkpa,
ebi nwakpa kiban̄ kpebeto ito mkpa kiban̄.
16 Ikerere ibe ọmọ ìtititiin̄
alata okuket isun̄ me èdọ kubọk achiaan̄,
mè ikaan̄ ekwut itutọmọ ijot ere kubọk ntitaak,
17 ekwut cha îtitiin̄be isun̄, ogwu ata irọrọ obonikwun,
alata okuket kan̄ cha,
ebi ekalọge inu geege
ebenikpulu iche inyi lek kiban̄.
18 Uwu ogwu ikpak onamabe ìbet lek uwu olọnjin,
mè atanga ogwu òban egwe onamabe, ìkpofuk.
19 Ọmọ môsiki ilaak kubọk ogwu ubọọn̄,
ire, ìkpoyaka ire ikeya ofifi;
isibolo chieen̄, inu kan̄ cha ìbotata isan̄a kpai.
20 Uga ukpook mônu ọmọ me uwuuk lek kubọk mun̄ ile,
egwijo eririeen̄ môsik ọmọ isa ije.
21 Efet agan̄ mbum-ura môben ọmọ isan̄a,
ọmọ môkwukwu ifo;
ìbokwọkọ ọmọ isan̄a isibi me uwu kan̄.
22 Efet ya môbieen̄ ọmọ ijo ijo,
ìkpokaan̄ ọmọ nsan me lek,
ọmọ ìbolibi njak njak
iweek inwọnwọnọ me ubọk efet ya.
23 Ìbobet lek efet ya ìkikwakwak
ubọk igọọk ọmọ ikirọ ọmọ ochak,
mè ikikput, mè ikinunuun̄
ikirieen̄ ọmọ isibi me uwu kan̄.