Jobu îbọkọ Bilidadi otu
26
Jobu onenibọkọ otu ibe:2 “Jei, owu otap ubọk inyi ogwu ikakaan̄ge unye onọ!
Unyan̄a onyan̄abe ogwu ubọk ikanyege ìkare sọntiik!
3 Jei, owu onyi ogwu una iriọọn̄-inu nteme onọ!
Atalek ikpele ifuk-ibot ire eya owu ojeen̄be!
4 Ìre ekene otap ubọk inyi owu mè òtumu ikọ chi?
Sà ìre ekene otumu itap owu me otu?
5 “Ebi ìkwukwu ekup me uga ujaralek,
ebi ìkup me irak mun̄,
mè inu geelek òkup me emen mun̄ ekup me ujaralek.
6 Ama ekwukwu ìkup njak me chieen̄ Awaji,
ere mfufiat ya ìkakaan̄ okwukwek.
7 Awaji otaba isinyọn̄ agan̄ inyọn̄ inyana
me inyọn̄ ofok akpabin inyọn̄,
mè isun̄ linyọn̄ ikididen̄,
ìkajeen̄ me lek inu geege.
8 Ọmọ osa oduku inyọn̄ kan̄ ikat ibot isun̄,
ire, ulobo ibot cha ìkakọt ìrama oduku inyọn̄ cha ìbak.
9 Ìchichit isi ikasi ubọọn̄ kan̄,a
mè ikisa oduku inyọn̄ kan̄ iwele ikwek.
10 Îsa okwuun̄ inyọn̄ itap iman̄ ikana isi mun̄ okokop,
mè isa itap oke me etete utoon̄ melek udun.
11 Awaji îrama ogoon̄ cha òkibeme isinyọn̄ kubọk atà,
ukpook otetet ema, ema ekekiran.
12 Îsa unye kan̄ isuuk okwaan̄,
mè isa iriọọn̄-inu kan̄ itọbọ Rayabu,
mgbugbo anam ejit okwaan̄ ya, ikpukpuku.
13 Îre efuuk kan̄ owut inyọn̄ itoon̄,
ubọk kan̄ ochichim ijijinu ya òkije nèèn̄ ikpan̄.
14 Otutuuk kechi ìre echi asasa me lek ikwaan̄ îrọbe;
otutuuk ikọ cha eji ekinọ ofolek inu îkirọ
ìre gaalek nweenween̄ ikọ!
Achubọk unye kan̄ ya ònye kubọk nsook-isinyọn̄,
ekene obokọt igobo itet?”