Jobu înyan̄a ibot ibe ubọk kan̄ ìtatana
31
“Nnyan̄a ibot melek chieen̄ n̄a,ibe ke ǹkabakpọ obaak enenwaan̄ ikaan̄ ulọk me lek.
2 Mije, ìre keke ke ene obokaan̄ me ubọk Awaji
òkup me inyọn̄?
Sà ìre kpasi ìrot ke ene obokaan̄
me ubọk Ogwu Òkaan̄ Unye Geelek
ogwu òkup me ere òbebene?
3 Ìre ìkare mfufiat okup inyi ebi ikpak?
Sà, ìkare ùrioon̄ okup inyi ebi ìkirọ ijo inu?
4 Ìre Awaji ìkakimun̄ oniin̄ nkije,
mè ìriọọn̄ ifuk otutuuk akpat ukot ije n̄a geelek?
5 “Ire ke nluluk ugwem ataak ataak,
mè ifet ukot ikirọ inu ofiaan̄ ofiaan̄,
6 kè Awaji isa okwukwut itọ-inu ònenen itọ emi ikpọ,
mè iriọọn̄ ibe ke emi ǹkarọ inu geege ìlọ.
7 Ire, ire njeje ikwala lek oniin̄ kan̄,
mè ire chieen̄ n̄a isasa ejit n̄a ije ilọ,
mè ìre ǹtatap ubọk me ijo inu,
8 kè ofifi ene irie inu mwopbe,
mè ejim mfut uko n̄a esan̄a nsek nsek.
9 “Ire ejit n̄a isisi lek nwa ogwu melek n̄a,
mè ìre ǹkililileek ikana isotu uwu kan̄,
10 tele kè nwa n̄a inin̄ usun̄ ikọk akpa inyi ofifi ene,
kè ofifi ebirieen̄ egọọk ọmọ elaak.
11 Igagan nwa ene ìre inu ikpak òfefieek lek,
îre ijo inu ekisisibi oyerebet me lek.
12 Îre ukan̄ òkitaka ene ire ama ekwukwu,
kè òtaka inu geelek mwopbe me uko òriọk.
13 “Ire njijit isisibi unen oyerebet
inyi ogwu usun̄ n̄a enerieen̄ mè ìre enenwaan̄,
mgbọ ema melek n̄a egugọlọbe,
14 keke ke mbarọ mgbọ Awaji
isinan̄a ikeke inu oyerebet?
Sà ìre keke ke mbafọọk mgbọ isido emi ibot inu nrọbe?
15 Ìre ìkare Awaji ogwu òrom emi me emen owot
orom ema?
Sà ìre ìkare Awaji yaage obot eji
me emen akpa gwun̄ ebi nga kiji ni?
16 “Ire njijit ebi ugbọọn̄ inu ema eweekbe,
mè ìre ǹtetele itatap ubọk inyi ogwu nwakpa
òkikpọ chieen̄ ibe emi mâtap ubọk inyi ọmọ;
17 ire nlelet inorie n̄a ikup irie emi gaalek,
ǹkakpọkọ ìnyi gwun̄ kpà-nte,
18 mije, akarake nsek kan̄,
emi mkpukpo ọmọ kubọk nte kan̄,
mè ikpọ ogwu nwakpa chieen̄ me lek otutuuk ugwem n̄a.
19 Ire mmumun̄ ogwu òkikwukwu bak me lek una ekwut,
mè ìre ogwu ugbọọn̄
ikakaan̄ge ofọnti ìsa ìkwek lek,
20 mè ire ọmọ ìkabele ejit, mè ìtọn̄ emi,
mije ekwut esabe inwọọn̄ arọọn̄ n̄a irom oyokbe ọmọ lek,
21 ire ntọtọ ubọk me isi gwun̄ kpà-nte ibe ke mômun̄,
mije ke nkaan̄ isi me ere oyerebet,
22 kè ubọk n̄a ijene me lek ukwuuk oguga irọn̄,
mè ifan̄a isan̄a me lek usọk akpatubọk.
23 Mije, ukpook ùrioon̄ ònan̄a me ubọk Awaji ìkitetet emi;
mije umin ubọọn̄ kan̄,
emi m̀kpakọt irọ ojelek inu kecha.
24 “Ire nsasa alata araran̄ itoon̄ ejit,
mè ìre ǹtutumu inyi atalek alata araran̄ ibe,
‘Owu ke nsa ibem lek,’
25 ire mbebele ejit mije ubọọn̄ mbọọn̄be enenen,
mè ìre mije owuwa ikpoko nsabe ubọk n̄a ibọm,
26 ire mkpọkpọ ura me mgbọ îkitoon̄,
mè ìre m̀kpọkpọ onyan̄ me
mgbọ îkije ije kan̄ òrirọ òrirọ,
27 ire lek îbonileke ejit n̄a ifo lek
itọtọbọ ebum inyi me nlelet,
mè iyaka ubọk n̄a ichak me otu
isa itọbọ ebum inyi ema,
28 kè echichi si ore ijo inu echi ekisisibi oyerebet me lek,
mije, eya kè more emi ijijit Awaji òkup me inyọn̄.
29 “Ire emi mbele ejit mije ufialek òtetet ogwu ochicha n̄a,
mè ire nnwọọn̄ unwọọn̄ mgbọ ùrioon̄ otoon̄be ọmọ;
30 emi ǹkafieek otu ìnyi ogwu ochicha n̄a ibe ikwu,
mè ìsa me ikeya ìsa otu n̄a ìrọ ijo inu.
31 Me atikọ, ebi uwu n̄a kpekilọlọ itutumu ibe,
‘Ekene ikatakage anam kè Jobu ìjot owot?’
32 Kpunu ogwu ichen òlalaak me lek oniin̄,
mije, isotu n̄a ìkibobook inyi ogwu ije.
33 Ire nlelet ijo n̄a kubọk ebi ene ekirọ,
mè ìre m̀beben nrọ-nlọ n̄a ilet me ejit,
34 mije ufieek-owot ibe ke urum ebi ene mêlo emi,
mè ukpook ibe ke ebi uwu mêchak emi ochak,
mè igọọk me ikeya mè iriaan̄ ere, ǹkasibi oyet.
35 Jei, ìre ekene obogban̄ usem n̄a mọnọ!
Ngon iman̄ òriọọn̄ n̄a me lek ikọ ibot n̄a!
Kè Ogwu Òkaan̄ Unye Geelek ifọọk emi otu;
kè ogwu melek n̄a ekaan̄be ikọ
ige ikọ îtoon̄be emi isibi me emen ikpa.
36 Me atikọ, kè m̀ben njeen̄ me oguga, inyi ene ekemun̄,
mè ntoon̄ me ibot kubọk okpibot ubọọn̄.
37 Kè ntumu inu geelek nrọbe nnyi Awaji;
kè nje ukama ukama
kubọk ogwu ibot mkpulu ǹnin̄ ọmọ lek.
38 “Ire ijọn̄ n̄a itoto ito ikeme emi,
mè otutuuk okpurukpu kan̄ ireke inyi ito,
39 ire nrerie mfut ònan̄a me lek ijọn̄ ya, ǹkakpe ewe,
mè irọ ebi ìluk me lek ijọn̄ ya ekwaan̄ eta,
40 kpan̄asi akpa wit otibibe me uko n̄a, abọm egbe itibi,
kpan̄asi akpa balì otibibe, ijo mbubet itibi,”
Ikọ kè Jobu îta.