Eliyu înaan̄ ejit, mè isan̄a amọn
32
Ebi ene ita cha erariaan̄ ere, kpeyaka ibọkọ Jobu otu, bak me lek Jobu okpọkpọ itet otu inye ikitumu ibe ke ọmọ ìre ogwu ata irọrọ. 2 Ire, Eliyu gwun̄ kè Baraken ogwu Buju, ònan̄a me owot iman kè Ram, ònanaan̄ ejit inyi Jobu. Unaan̄-ejit kan̄ ìre ke Jobu ìbe ke ìnen me ubọk kan̄ mè ilọ me ubọk Awaji. 3 Eliyu înaan̄ ejit si inyi ene ita ebi unene kè Jobu cha, mije, ema kpekọt ifaan̄ ikọ kè Jobu, ire, ekpọkpọ ifieek Jobu ikọ. 4 Eliyu ìtetet ikọ ìbotumu melek kè Jobu ikaan̄-nu, mije, Jobu mè ebi melek kan̄ mîkan igak ọmọ. 5 Ire, mgbọ îmun̄be ibe ke ebi ene ita cha kpeyaka ikaan̄ ofifi ikọ ebefọọk, inanaan̄ ejit.6 Eya orọ, Eliyu gwun̄ kè Baraken ogwu Buju onenitumu ibe:
“Emi ìre sọntiik gwun̄,
enyi ìre ebi ugane;
eya orọ, mfieekbe owot,
mè itet ukpook itutumu inu nriọọn̄be inyi enyi.
7 Ǹkeek me lek n̄a ibe ke îre ebi ìkakan ebetumu ikọ,
ke îre ebi ugane ebejeen̄ iriọọn̄-inu.
8 Ire, îre Ekwukwu Awaji òkup ene me emen,
òrere efuuk Ogwu Òkaan̄ Unye Geelek,
okinyi ene ngobo-ntet.
9 Ìkare ebi ìkakan gaalek ekiriọọn̄ inu,
ìkare si ebi ugane gaalek ekigobo inu ònenen itet.
10 “Eya orọ m̀be enyi, ìgban̄-nunu,
ke emi si mâtumu eyi nriọọn̄be.
11 Ǹkukup ikikpọ enyi etumu ikọ kinyi,
mè ikigban̄ ubọk ifan̄a kinyi okije;
mgbọ enyi ekiwọlọ ikọ enyi ebetumu,
12 ǹrọriọọn̄ ubọk isiki utọn̄ ikigban̄ enyi.
Ire, ene geege me lek kinyi
ìkakọt ìjeen̄ ibe ke Jobu îrọ ilọ;
kpunu ogwu òkọkọt ida ikọ kan̄ ito.
13 Ìgbala chieen̄, inyi enyi ekatumu ibe,
‘Eji mîweek iriọọn̄-inu imun̄.
Awaji obofọọk Jobu otu,
ìkare ebilene.’
14 Jobu ìkatumu ikọ kan̄ ìkpọ emi isi,
emi si, m̀kpasa ikọ kinyi ifọọk ọmọ otu.
15 “Jobu, otu ebi une kwun̄ îbuk,
kpeyaka ikaan̄ inu ebetumu;
ikọ îta ema me otu isan̄a kpai.
16 Ǹkukup ikikpọ ema mege ema eriaan̄be ere,
mè ikeke ikeya, kpeyaka ibọkọ owu otu.
17 Emi si mâbọkọ otu,
mâtap otu eyi n̄a,
mâtumu eyi emi nriọọn̄be.
18 Mije, ikọ ìjojot emi otu,
ekwukwu n̄a si ìkibebieen̄ emi ibe emi ǹtumu ikọ.
19 Ikọ òkup emi me emen ìbet lek miin̄ echitbe otu igọm,
ìbet lek aya miin̄ òborama ogbokot ibum,
ire kpechili otu.
20 Mâtumu ikọ, inyi lek isiki emi,
mâchili otu ifọọk ikọ.
21 M̀kpalibi chieen̄ ene geege,
m̀kpatutumu si ene geege imin.
22 Mije, emi ǹkariọọn̄ ubọk ekitumu ene imin,
mebe nriọọn̄, kè Ogwu Òrom n̄a
îra imọnọ emi isan̄a me ikafiatge mgbọ.