Eliyu îtumu ikọ ikpọ Jobu isi
33
“Mgbọ keyi, Jobu, nye lek gban̄ ikọ n̄a,mè gban̄ utọn̄ me lek otutuuk usem n̄a.
2 Îkem, mânichili otu n̄a isan̄a amọn,
ikọ n̄a ìkup emi me otu alọm.
3 Ikọ n̄a ìnan̄a me ata ejit,
otu n̄a ìkitumu inu nriọọn̄be me atikọ.
4 Ekwukwu Awaji orom emi;
efuuk Ogwu Òkaan̄ Unye Geelek okinyi emi ugwem.
5 Ire ke owu môkọt ifọọk emi otu, fọọk;
tutuun̄ lek kwun̄, mè sibi kweek emi.
6 Emi melek kwun̄ ìre inu yaage me isi Awaji;
arika si ke esa irom emi.
7 Eya orọ, ukpook lek n̄a ikafieek owu owot,
m̀kpasa ulobo n̄a ikeme owu.
8 “Jobu gban̄, owu otumu ikọ me utọn̄ n̄a,
nnọnọ ikọ otumube ibe,
9 ‘Ǹtatana ikup, ǹkarọ ijo inu geege;
ǹtatat ikup, ǹkarọ inu geege ìlọ.
10 Ire, Awaji ìkiweek emi ikọ;
ìmọnọ ibe ke emi ìre ogwu ochicha kan̄.
11 Îsa mkpọn ibọp emi ukot igọm;
ìkasan̄a chieen̄ me agan̄ geelek njebe inin̄.’
12 “Ire, ǹkitumu inyi owu ibe, me lek ikọ keyi, owu orọ ilọ,
mije, Awaji îmin enenen igak ebilene.
13 Keke orọ okisa ifan̄a isi lek Awaji,
ibe ke ìkakifọọk otu ikọ ebilene ekido ọmọ?
14 Awaji ìkitumu ikọ mgbọ ge,
mè òkpọk otumu owuwa mgbọ,
ire, ebilene kpekitet ibot me lek.
15 Awaji ìkisa mun̄umun̄ ilaak
mè ilaak ọkpọchieen̄ me eririeen̄
itumu ikọ inyi ene,
mgbọ ilaak onwọnọbe ene idọk,
mgbọ ene olaakbe idek me inyọn̄ mkpilaak kan̄.
16 Mgbọ ya ke îkitumu ikọ itap ene me utọn̄,
mè ikisulu ema osusut
isa ikitap iman̄ òriọọn̄ me lek nteme înyibe ema.
17 Awaji ìkirọ ikeya isa ikikput ene irọrọ ijo inu,
mè isa ikigban ene igugumu lek.
18 Ìkisa irọ ene ikakwu ìnin̄ udọn̄ mkpa,
mè ugwem kan̄ ikaraka ìfo ama ekwukwu.
19 Ìkekisa orukan̄ òkito ene me ijọn̄ inyi ene osusut,
mè osa si ufiak ukwuuk òkiyok ene ìkakiwọ,
20 eyi òkirọ inorie irook ene irerie,
mè atalek inorie ene okima ijọ ene ejit.
21 Anam akpalek kan̄ îra itak ita,
ukwuuk kan̄, mgbọ òlelet cha, îra ikisibi ikeke.
22 Ọmọ îra ikikpat igbet udọn̄ mkpa,
ugwem kan̄ îra ikijuuk igbet lek ebi ìkikpan̄ ene.
23 “Ire, ire ogwu osat ge me lek obop obop ebi osat Awaji,
ikup me agba lek kan̄ kubọk ogwu nteek,
mè initumu inyi ọmọ inu ònenen ibe irọ,
24 mè inito ọmọ njijin, mè initumu inyi Awaji ibe,
‘San̄a ọmọ san̄a, inyi ikasi ìnin̄ udọn̄ mkpa,
mweek inu mêsabe inwene ọmọ ibot imun̄.’
25 Mije keya, anam akpalek kan̄ mônenikana ikup
kubọk eyi sọntiik gwun̄,
mè ikisek
kubọk mgbọ ọmọ orebe nsabọn irieen̄.
26 Ọmọ isiriaak uriaak, Awaji îra ibọkọ itap;
ọmọ îra ikinu initọbọ ebum inyi Awaji me ubelejit,
mije, Awaji îyaka ata irọrọ kan̄ ikpọk inyi ọmọ.
27 Ọmọ môkekikpa inyi ebilene ibe,
‘Nrọ ijo inu, mè ikana inu ònenen itap me inu òlọlọ,
ire, Awaji ìkarọ emi me lek unye unye ike îgbebe.
28 Kpan̄asi ikeya, inyanyan̄a emi isibi me udọn̄ mkpa,
inyi mâkup me ugwem ikimun̄ utoon̄.’
29 “Me atikọ, Awaji ìkirọ otutuuk inu chi
kpa mgbọ kpa mgbọ inyi ebilene,
30 isa ikigwu ene ikom, inyi ikasi ìnin̄ udọn̄ mkpa,
inyi ikinọ utop ugwem me emen utoon̄.
31 “Jobu, riọọn̄ ubọk nọ, gban̄ ikọ n̄a;
riaan̄ ere, inyi ǹtumu ikọ ǹnyi owu.
32 Ire okaan̄ inu obotumu, fọọk emi otu;
tumu eyi kwun̄,
mije, ǹkiweek irọrọ inye ibe ke owu òkirọ inu ònenen.
33 Ire òkakaan̄, gban̄ eyi n̄a;
riaan̄ ere mè ǹjeen̄ owu iriọọn̄-inu.”