Eliyu ìbe Jobu ìkibene lek
34
Eliyu okekitumu ikọ kan̄ ibe,2 “Enyi ebi ìriọọn̄ inu, ìnọ ikọ n̄a;
enyi ebi ìkween̄ inu, ìgban̄ emi utọn̄ me lek.
3 Mije, ike alọm okigban̄ utop eyi inorie,
ikeya si ke utọn̄ okigobo ikọ.
4 Eya orọ, eji enin̄ emen ikọ kan̄
eweek ere ònenen enyi lek kiji;
mè eji egbaan̄ eriọọn̄ inu ònwọnwọn me chieen̄ kiji.
5 “Mije, Jobu ìbe, ‘Ubọk n̄a ìtatana,
ire, Awaji îjit emi unen oyerebet.
6 Ìre mâkan̄ ataak me emen unen n̄a ni?
Unan ònin̄ emi lek îmin ire lek kpebekọt igwa,
ire, ǹkarọ ijo inu geege.’
7 Ìre ekene enerieen̄ obet lek kè Jobu,
ogwu òkibọkọ ochak kubọk ìkinwọ mudim?
8 Ọmọ ìkigọọk ebi ìkirọ ijo inu ije,
mè ikigọọk ebi ikpak igbaan̄ inu irọ.
9 Mije, ọmọ ìkibe, ‘Ene irere unene melek Awaji,
ìkakaan̄ oruru me lek.’
10 “Eya orọ, enyi ebi ìkigobo inu itet,
ìgban̄ emi utọn̄ me lek.
Awaji ìkabokọkọt irọ inu ikpak,
Ogwu Òkaan̄ Unye Geelek ìkpokọkọt irọ ijo inu.
11 Awaji ìkikpe ene mkpukpe igọọk me ubọk ikwaan̄ ene,
mè ikinyi ene geelek inu ògbegbe eru ene okaan̄be.
12 Me atikọ, Awaji ìkakirọrọ inu geege òlọlọ,
Ogwu Òkaan̄ Unye Geelek
ìkakinwunwunu unen oyerebet.
13 Ekene osa Awaji irọ ogwu òkikpulu linyọn̄?
Sà ìre ekene oto ọmọ
ibe ikikpọ chieen̄ me lek otutuuk linyọn̄?
14 Ire Awaji iben me ejit,
itataba ekwukwu kan̄ mè efuuk kan̄ isan̄a,
15 otutuuk ebilene mêgbaan̄ ikwaan̄ isan̄a mgbọ yaage,
ogwu ebilene mônenikana mfuun̄.
16 “Jobu, ire okaan̄ ngobo-ntet, nọ ikọ keyi;
gban̄ ikọ nkitumu.
17 Ìre ogwu ìkakima inu ònenen,
môkọt ikpulu mkpulu ni?
Sà ìre owu môtip Awaji,
ogwu ata irọrọ ogwu òkaan̄ unye, oyerebet ni?
18 Ọmọ okibe ebi ubọọn̄, ‘Enyi kpekup me lek inu geege,’
mè òbe ebi ilile, ‘Enyi ìre ebi ikpak.’
19 Ọmọ ìkakilibi chieen̄ ebi ibot mkpulu,
ìkakima ebi ubọọn̄ ìgak ebi ugbọọn̄,
mije, ema otutuuk ìre ubọk ikwaan̄ kan̄.
20 Ebi ene ekikwaan̄ me ekakpọge chieen̄, me ejit eririeen̄;
Awaji isisisik ema, ugwem kiban̄ îra iraka;
ikerere ebi ilile, ìkisasan̄a isan̄a, ire, ìkare me ubọk ebilene.
21 “Mije, chieen̄ kan̄ ìkikpọkpọ oniin̄ ugwem ene;
ọmọ ìkimumun̄ otutuuk akpat ukot ije kan̄ geelek.
22 Kpunu ekpuk udun geege, kpunu si ufieejit mkpa,
ere ebi ìkirọ inu ikpak ebekọt ilet lek.
23 Mije, Awaji ìkposọkọ ofifi inu me lek ogwu ebilene,
igak ene isisi ikeke me isi Awaji,
inyi isibi oyerebet inyi ọmọ.
24 Ìkikpukpuku ebi ilile igwook, me ikadoge ikọ geege,
mè òbene ebi ofifi ife otoon̄ me irek kiban̄.
25 Me atikọ, îriọọn̄ inu ema ekirọ;
eya orọ, me eririeen̄,
îra isan̄a ema me irek kiban̄ itọọn̄ igwook.
26 Ìkisulu ema osusut mije inu ikpak kiban̄,
me ere otutuuk ene ekimun̄ ema.
27 Mije, ema mînan̄a itele ọmọ,
kpeyaka ikisa otutuuk oniin̄ kan̄ igwen inu geege.
28 Ema mîtutuku ebi ugbọọn̄
ire lek ukpo ebiba etaan̄be orebe isi kan̄,
ọmọ onọnọ ukpo ebi una ubọk.
29 Ire, ire ìkasasan̄a amọn, ìre ekene obofieek ọmọ ikọ?
Ire ilet isi kan̄, ekene obokọt imun̄ ọmọ?
Ire, ọmọ okikpọ chieen̄ me lek ebilene melek ido,
30 inyi ogwu ikariọọn̄ge Awaji ikakpulu,
inyi ikatap ufe ìtet ebi ene.
31 “Ìre îkaan̄ ogwu òtutumu inyi Awaji ibe,
‘Nra ibọkọ osusut, m̀kpayaka ikpọk irọ ijo inu ofifi.
32 Jeen̄ emi ijo inu echi nrọbe, ire, ǹkakọt imun̄;
ire nrọ inu òlọlọ, m̀kpayaka irọ ikeya ofifi.’
33 Ìre òbe Awaji inikpe owu mkpukpe ubọk ejit kwun̄ otọbe ni,
me mgbọ owu ojitbe igwugwu ikom me ijo inu?
Owu obotumu ifieek, ìkare emi;
eya orọ, tumu eyi oriọọn̄be.
34 “Enyi ebi ìkigobo inu itet, ìkpa-nu ìnyi emi,
enyi ebirieen̄ ìriọọn̄ inu, ebi ìnọnọ ikọ n̄a,
ìtumu ìnyi emi-nu ibe,
35 ‘Jobu ìkitumu inu ikariọọn̄ge;
ikọ kan̄ ìkakaan̄ ngobo-ntet.’
36 Kè m̀ma ibe enin̄ emen oyerebet kè Jobu ewọlọ ere okputut,
mije, ìkifọọk otu kubọk ebi ikpak!
37 Îrọ ijo inu, mè ikinye ibot igbaalek,
mè ikup me etete kiji ikibele ejit me lek ijo inu kan̄,
mè ikitumu ogbogbo ikọ itoon̄ Awaji.”