Eliyu îkeek Jobu unen oyerebet Awaji
35
Eliyu okekifọọk si otu ibe,2 “Eyi owu okibe, ‘Ubọk n̄a ìtatana me isi Awaji’,
ìre òkikeek ibe ke eya înen ni?
3 Owu odo Awaji ibe,
‘Kpasi nnwọn ke ijo inu n̄a oborọ inyi owu?
Kpasi oruru ke emi nkaan̄ me nkarọge ijo inu?’
4 “Mâfọọk owu otu,
mè ifọọk si ebi une kwun̄ ìkup melek kwun̄.
5 Bene-nu chieen̄ me akpa isinyọn̄,
inyi òmun̄;
riọọn̄ ubọk kpọ-nu oduku inyọn̄ cha
òbebene ichep me inyọn̄ ibot kwun̄.
6 Ire orọ ijo inu, eyi owa ogbaan̄ Awaji me lek?
Ire ijo kwun̄ iwa, ìre eya ìborọ ọmọ keke me lek?
7 Ire owu ore ogwu ata irọrọ, keke ke onyi ọmọ?
Sà ìre keke ke îbọkọ owu me ubọk?
8 Inu ikpak kwun̄ ìkikeme ebilene kubọk kwun̄;
ata irọrọ kwun̄ ìkinwọn inyi bọn ebilene.
9 “Tukutuku isilobo igak ene, mîra itaan̄ ukpo;
etaan̄ ukpo iweek ntap-ubọk,
inyi enwọnọ me emen ubọk ebi unye.
10 Ire, kpunu ogwu òkido ibe,
‘Mọmọ Awaji Ogwu Òrom emi,
ogwu òkirọ inyi ekekọt okwa me eririeen̄,
11 ogwu òkijeen̄ eji inu iwa
igak ubọk îkijeen̄ ebi kè anam oron,
mè ikirọ eji eriọọn̄ inu egak ebi kè unọn òwulu me inyọn̄?’
12 Ema isikitaan̄ ukpo, Awaji ìkakibọkọ otu,
mije ubenelek kiban̄ melek inu ikpak kiban̄.
13 Me atikọ, Awaji ìkpogban̄ ukpo ikike kiban̄;
Ogwu Òkaan̄ Unye Geelek
ìkakisa ukpo kiban̄ ìgwen inu geege.
14 Ire ire ikeya, ìre ọmọ môsa owu igwen inu ni,
mgbọ owu obe ke òkamun̄ ọmọ,
ke ikọ kwun̄ ìkup me isi kan̄,
ke owu môkup ikikpọ ọmọ?
15 Ògak ge, mgbọ keyi,
owu òbe ke unaan̄-ejit Awaji
ìkayaka ìkirọ ene inu geege,
ke ìkakikpọkpọ si chieen̄ me lek inu ikpak mgbọ geege.
16 Eya orọ, Jobu ìkichili otu ibook itumu ikọ ikike;
mè ikitumu ogbogbo ikọ ikakaan̄ge iriọọn̄-inu.”