Òta ikọ kè Eliyu
36
Eliyu okekitumu ikọ kan̄ si ibe:2 “Ìkat ejit ìnyi emi sọntiik mgbọ,
ke mâjeen̄ enyi ibe ke owuwa ikọ òwa itutumu me ibot Awaji.
3 Mârọ mè ebi ene me ere òjọjọn̄ọ ere eriọọn̄ ifuk-ibot n̄a;
mâjeen̄ ibe ke Òrom n̄a ìre ogwu òkirọ unen.
4 Me atikọ, ikọ n̄a ìkare ataak;
ogwu òkaan̄ ifuk-ibot òjot òjot okup yi melek kwun̄.
5 “Kpọ, Awaji ìre ogwu unye, ire, ìkakikpọ ene ìsiki chieen̄;
ọmọ îmin me unye-lek melek ngobo-ntet.
6 Ìkakisun̄ ebi ikpak me ugwem,
ire, ìkinyinyi ebi ekitutuku unen kiban̄.
7 Ìkakisan̄a chieen̄ me lek ebi ata irọrọ;
ìkitoto ema me inyọn̄ ogboon̄ melek ebi ubọọn̄,
mè òbene ema, inyi ekebọkọ umin, ire mgbọ geelek.
8 Ire, ire isa mkpọn ibọp ene ikam,
mè isa ufialek ibọp ema ikam kubọk olik,
9 Awaji ìkikpa inu ema erọbe ilọ inyi ema,
ibe ke ema erọ ijo inu cha me ugumulek.
10 Ìkichili ema utọn̄, inyi ema ebọkọ ikan̄-inu,
mè ikinyi ema ida ibe egwu ekom me ijo inu.
11 Ire ema igban̄, mè ikitọbọ ebum inyi Awaji,
usen ugwem kiban̄ ìbore nnwọn-isi nnwọn-isi ire òta,
acha ugwem kiban̄ ìbore utop utop isi ire òta.
12 Ire, ire ema kpegban̄,
ugwem kiban̄ môraka,
ema mêkwakwaan̄ mkpa me una ifuk-ibot.
13 “Ebi kperiọọn̄ Awaji ekitet unaan̄-ejit ikaan̄,
Awaji isibọp ema ito, kpekitaan̄ ukpo iweek ntap-ubọk.
14 Ema ekikwaan̄ mkpa me nsek,
me etete ebi òje oyet isi yọk.
15 Awaji ìkisa ukwook ebi ukwook ekimun̄
isan̄a ema isibi me emen ukwook kiban̄,
mè ikisa ufialek
itumu ikọ itap ema me utọn̄.
16 “Me atikọ, Awaji ìbọkọ owu isibi me ubọk uyọrọlek,
mè isun̄ owu me utelelek, inyi okakaan̄ saasaak,
mè irọ ibe ata inorie ijot inyọn̄ ikasi inorie kwun̄.
17 Ire, mgbọ keyi, oyerebet ebi ikpak ekikaan̄
ke owu okaan̄ òjot òjot,
oyerebet îtip owu,
unen oyerebet ke efieek inyi owu.
18 Gwọk chieen̄, inyi ene geege
ikasa inu ubọọn̄ ìleke owu;
kachieek ibe owuwa ikpoko udun̄ ida owu isan̄a.
19 Ìre inu ubọọn̄ kwun̄,a
mè ìyaka ire unye efuuk kwun̄,
môrọ ibe ukwook ikatet owu ni?
20 Kaweek ibe eririeen̄ inu,
mgbọ ebi ife geelek ekijibi inan̄a itele irek kiban̄.
21 Gwọk chieen̄, da isi san̄a me lek ijo inu,
ukwook okibọkọ ìje me lek keya.”
Eliyu îkeek Jobu ibe ke Awaji îmin enenen
22 “Kpọ, unye Awaji îmin enenen.
Ekene ogwu ijejeen̄ obet lek kan̄?
23 Ekene môkọt ijeen̄ Awaji inu îborọ?
Sà ìre ekene môbe ọmọ, ‘Owu orọ inu ilọ?’
24 Kawuuk itọtọn̄ Awaji me lek inu îrọbe,
echi ebilene ekikọt me lek okwa.
25 Otutuuk ebilene mîmun̄ lek,
ene geelek ìkikup me ujọn̄ọ ere ikpọ.
26 Kpọ, Awaji îmin enenen,
eji kperiọọn̄ ikeke îminbe ire;
kpebekọkọt si iweek otu ifuk acha kan̄ iriọọn̄.
27 “Ọmọ okitaba nseen̄ nseen̄ mun̄ ifo inyọn̄,
mè irọ oruk nseen̄ nseen̄ mun̄ ya ikana ibot.
28 Ọmọ okirọ ibot inan̄a me emen oduku inyọn̄ irep
owuwa owuwa igwook me lek ebilene.
29 Me atikọ, ìre ekene obokọt iriọọn̄
ubọk oduku inyọn̄ okiyiyala ikana isinyọn̄,
mè ubọk isinyọn̄ okisook
me akpabin inyọn̄ ere Awaji olukbe?
30 Kpọ, ìkirọ omumen inyọn̄ imumen ikana ọmọ,
mè itoon̄ ire ijọn̄ me ugwuuk okwaan̄.
31 Echichi ke îkisa ibọọk ebi ene,
mè ikisa inyi ema inorie owuwa owuwa.
32 Ìkitatap omumen inyọn̄ ijot ubọk kan̄,
mè ikitọ ibe isi isook inu geelek îsabe ito okukọọk inyi.
33 Isinyọn̄ isisook, eya ìkijeen̄ ibe ke egwijo òkinu,
ebi kè eriembuuk si mîkirọ
inyi eriọọn̄ ibe ke egwijo îre ijọn̄.