37
“Nsikikeek inu chi, ejit îra ikifieek emi,ejit n̄a îra ikiwulu inan̄a me akpat.
2 Ìgban̄! Ìgban̄-nu ubọk ida Awaji okigbugbut kubọk isinyọn̄,
ìgban̄ ubọk îkinunuun̄ me otu kan̄ isibi.
3 Awaji ìkiria omumen inyọn̄
ibe ikikebe iso otutuuk akpa isinyọn̄,
mè ikimumen itoon̄ ire ntutun̄ ere geelek me linyọn̄.
4 Ida kan̄ îra ikigbugbut igọọk;
ọmọ îra ikisook ida unye unye.
Otutuuk mgbọ ida kan̄ okinunuun̄ ije,
inyọn̄ ìkimumumen igọọk.
5 Ida Awaji ìkiseme me uyeke uyeke oniin̄;
Awaji okirọ ikpele inu echi eji kpekikọt igobo itet.
6 Ọmọ okibe ibot awo, ‘Rọn̄ọ gwook me ijọn̄,’
mè òbe nseen̄ nseen̄ ibot, ‘Rep kana uga ibot.’
7 Ìkirọ ikeyi isa ikirọ inyi ebilene etet ubọk ekaan̄,
mè ekayaka ìsi ikwaan̄,
inyi otutuuk ene eriọọn̄ ubọk ikwaan̄ kan̄.
8 Ebi kè anam oron mîra ililiin̄ inin̄ okpot,
mè ibia me udọn̄ kiban̄.
9 Egwijo ìkinan̄a me ere îkikup me agan̄ osiki isibi inu,
sà utọọk okinan̄a me emen unye efet agan̄ inyọn̄ inu.
10 Awaji isifuuk efuuk, mun̄ îra ibot ikana mun̄ ewuuk,
èdọ mun̄ ile îra inye ikup akakam akakam.
11 Ọmọ okitap ibot ilobo me emen oduku inyọn̄,
mè ikiyat omumen inyọn̄
ikana emen oduku inyọn̄ cha.
12 Sa me ida kan̄, ema mîra ikigba iyak ikana
otutuuk ere geelek me linyọn̄,
ikirọ inu geelek îtọbe ibe ema erọ.
13 Awaji ìkisa ema isulu ene osusut,
mè osa ònoreke ijọn̄,
mè osa òjeen̄ ene nnwọn kan̄.
14 “Jobu, gban̄ eyi nu;
tet kaan̄-nu, mè keek-nu uyeke inu Awaji orọbe.
15 Ìre oriọọn̄ ubọk Awaji okitọ ikọ inyi oduku inyọn̄,
mè ikirọ omumen inyọn̄ kan̄ ikikebe ni?
16 Ìre oriọọn̄ ubọk oduku inyọn̄ osabe ikite me isinyọn̄,
òrere uyeke inu
Ogwu Òrọriọọn̄ Inu Isan̄a orọbe?
17 Owu ogwu uyok ofọnti obokilet efuuk,
mgbọ efet agan̄ osiki okiwut ere ikup kpùk me linyọn̄,
18 ìre owu môkọt igọọk ọmọ iyat akpabin inyọn̄ iwele,
mè irọ ibe inye kubọk umọọn̄ esabe alata itọkọ?
19 “Jeen̄ eji inu eji mêtumube inyi Awaji ma,
mije, eji kpebekọt ineen̄ ikọ kiji,
bak me lek ibot kiji ìre ukpọk ukpọk.
20 Ìre mêtumu inyi Awaji ibe
ke mweek itutumu ikọ melek kan̄ ni?
Ire ene itumu ikọ, me atikọ, Awaji ìbokpakpan̄ ene ya.
21 Kpunu ogwu òbokọt ikpọ ura
mgbọ efet isiwut oduku inyọn̄ isan̄a me lek,
inyi iriọọn̄ ubọk ikitoon̄.
22 Awaji òkinan̄a me agan̄ inyọn̄ ikinu òrirọ òrirọ
kubọk alata araran̄;
umin ubọọn̄ kan̄ îgwook ene mbiribọ me lek.
23 Ogwu Òkaan̄ Unye Geelek, eji kpebekọt ire lek kan̄,
unye kan̄ îmin ibene isaba iraka;
me unen oyerebet kan̄ melek ikpele ata irọrọ kan̄,
ọmọ ìkakitutuku ene.
24 Eya orọ, ebilene ekitetet ukpook me lek kan̄;
ebi ìkimọnọ ibe ema mîriọọn̄ inu, ìkakinyi ema isi.”