Okumugwem îtumu ikọ itọ Jobu ubọk me isi
38
Okumugwem onenikup me emen egwijo ifọọk Jobu otu ibe:2 “Ìre ekene ire ogwu,
ogwu òkisa ikọ ikakaan̄ge
ifuk-ibot ikitap udun ichit otitọt n̄a?
3 Tobo ekpuk ekwut kwun̄ nye me ebon kubọk enerieen̄;
inyi ǹdo owu ikọ,
mè owu òfọọk emi.
4 “Ìre owu òkup me ere owa mgbọ ntọbọbe ọdọ linyọn̄?
Tumu nyi emi nu, ire ogobo itet.
5 Ìre ekene otap okike linyọn̄? Me atikọ, owu oriọọn̄ ma!
Ìre ekene otaba olik me mgbọ ekitọ okike linyọn̄?
6 Ìre etọbọ ọdọ linyọn̄ itoon̄ me inyọn̄ keke?
Sà ìre ekene orieen̄ ewuuk ibot usọk linyọn̄
7 me mgbọ ebi kè ntoronyan̄ otu ewelegwe
ekigbaan̄ ikọt okwa,
mè mgbọ ebi osat ekitaan̄ ukpo unwọọn̄?
8 “Ekene ogwuk afọn̄ ikwek okwaan̄ ibe ikameen̄ ijọn̄,
mgbọ îbumbe isibi
kubọk gwun̄ obum isibi me akpa gwun̄?
9 Emi nsa oduku inyọn̄ itap ọmọ kubọk ofọnti,
mè isa ekpuk udun ikat ọmọ kubọk ekwut.
10 Emi ntap okike inyi,
mè igọbọ afọn̄ ikwek,
11 mè itumu inyi ibe, ‘Je yaka me ere keyi, karaka;
ere keyi ke ekoon̄ kwun̄ cha
òkigumu lek obokifaan̄ igwook.’
12 “Akarake osibibe inyọn̄,
ìre orak itọ ikọ inyi egwe òkiwewele,
sà ìre orak ijeen̄ obum egwe irek ikwaan̄ kan̄,
13 inyi ikibene me ntutun̄ linyọn̄ ikiwele inu,
mè isa utoon̄ inililaba
ebi ijo ife isibi me ere ema ekilileek?
14 Egwe ìkirọ linyọn̄ isibi ikeke
kubọk iman̄ òriọọn̄ egonbe me lek arika;
ngwugwat linyọn̄ îra ikisibi ikeke
kubọk ngwugwat lek ekwut.
15 Egwe ìkirieen̄ udun̄, òrere utoon̄ ebi ikpak, isan̄a;
lek ebi ikpak îra iwọ ibebene ubọk irọ ikpak.
16 “Ìre orak ije ire ere ibot mun̄ emen awaji okigbuk isibi,
sà ìre orak ikijijen̄e ije
me emen udọk udọk ugwuuk okwaan̄?
17 Ìre mîrak ichili otunchit ekiraka
inin̄ ama mkpa ijeen̄ owu?
Sà ìre orak imun̄ otunchit
ekitibi isi ndudun ere mkpa?
18 Ìre oriọọn̄ ubọk linyọn̄ osabe iwele iyaka?
Ire oriọọn̄ otutuuk inu chi, kpa nyi emi-nu.
19 “Mọmọ oniin̄ òkisi ere utoon̄ olukbe?
Ìre ere owa ke udun okikup?
20 Ìre owu môkọt isa ema isi ere kiban̄?
Sà ìre owu môkọt iriọọn̄ oniin̄ uwu kiban̄?
21 Owu oriọọn̄ ma,
mije, me ike mgbọ ya,
mîra imaman owu iraka!
Acha ugwem kwun̄ îwa enenen!
22 “Ìre orak inin̄ uwu ere ekisun̄ ibot awo,
sà ìre orak inin̄ uwu ekisun̄ ibot mgbọlọ,
23 echi nsun̄be iban mgbọ uyọrọlek,
iban usen etim mè usen akọn̄?
24 Ìre oniin̄ eyi owa okisi
ere omumen inyọn̄ okinan̄a ikpọk ichit ere,
mè ere efet agan̄ mbum-ura okinan̄a iyiyala iso linyọn̄?
25 Ekene obum okolo inyi agbugbuk mun̄ ibot,
mè ichili oniin̄ inyi egwijo
òje melek omumen inyọn̄ mè nsook-isinyọn̄,
26 ibe ikireke ijọn̄ ere ene kpeluk,
emen èwê ere ene geege ikakupge?
27 Ekene otap mun̄ igak
nchat emen èwê ere inu geege ìkakitibi,
inyi mbubet igwook ichit?
28 Ìre ibot îkaan̄ ute ni?
Sà ìre ekene ore nte ke mbat òkirọrọn̄ọ?
29 Owot ke ekene ke mun̄ ewuuk okinan̄a isibi?
Sà ìre ekene oman senesene mun̄ ewuuk
òkinan̄a me akpabin inyọn̄,
30 mgbọ mun̄ okinye kubọk ewuuk,
mgbọ isi mun̄ okwaan̄ okibot?
31 “Ìre owu môkọt ikwọọk Nga Ntoronyan̄ igbaan̄ ibọp?
Sà ìre owu môkọt ikpọk olik
isan̄a me lek Ntoronyan̄ Ubọọn̄?
32 Ìre owu môkọt isan̄a ugbọ ebi kè ntoronyan̄
isibi me mgbọ kiban̄,
sà ìre owu môkọt isa Ntoronyan̄ Egbe
eyi uga mè echi asasa kan̄ ikije ni?
33 Ìre owu oriọọn̄ ikan òkikpulu inu me akpabin inyọn̄?
Ìre owu môkọt irọ ikan cha ikaan̄ unye me ijọn̄?
34 “Ìre owu môkọt itaan̄ ukpo itọ ikọ inyi oduku inyọn̄,
inyi ibot irep ibọn̄ owu kubọk mun̄ ile?
35 Ìre owu môkọt iria ebi kè omumen inyọn̄ isibi,
mè eje,
mè enebe owu, ‘Kpọ eji ire ebi’?
36 Ekene otap iriọọn̄-inu me emen emen ejit ene?a
Sà ìre ekene otap ngobo-ntet me emen ibot ene?b
37 Ekene okaan̄ iriọọn̄-inu
isasa ifuk otu ifuk oduku inyọn̄?
Sà ìre ekene obokọt ida ema me akpabin inyọn̄ igbuku
kubọk ugọn̄ mun̄,
38 inyi irep, mè irọ mè mfuun̄ inye ikana ibat,
mè achiaan̄ òkup okpukpuk okpukpuk igba igọm?
39 “Ìre owu okichim anam inyi uman egbe àtat,
mè ikinyi ebi bọn inorie erie ejot owot,
40 mgbọ ema ekituun̄ me emen okpot kiban̄,
mè ìre ilileek me m̀bubaka oron ikikpọ anam?
41 Ekene okinyi ùgọọk inorie,
mgbọ bọn kan̄ ekitaan̄ ukpo inyi Awaji,
mè ikinyinya ikana mije una inorie?”