Awaji îfo isi ikitọ Jobu ubọk me isi
39
“Ìre owu oriọọn̄ mgbọ ebot oron inyọn̄ ogoon̄ okimaan̄ bọn?Sà ìre okikpọ uman ogaan̄ me mgbọ îkiman gwun̄?
2 Ìre owu okifuk onyan̄ ema ekiben bọn me owot?
Ìre oriọọn̄ ibot mgbọ ema ekimaan̄ bọn?
3 Ema ekisisiki isọọk, mè imaan̄ bọn kiban̄ igwook,
ufiak uman kiban̄ îra ita.
4 Bọn kiban̄ ekikup me oron imiin̄, mè inye lek;
ema isitele nga kiban̄,
kpekiyaka igwu ikom ika igọọk.
5 “Ekene okinyi inyinya akpan oron utelelek?
Sà ìre ekene okitọn̄ọ ọmọ ito?
6 Emi nnyi ọmọ emen èwê ibe ire uwu kan̄,
mè inyi ọmọ ijọn̄ òkup uchi uchi ibe ire ere nluk kan̄.
7 Ọmọ ìkichachak okput ekikput me emen ama;
ìkakinọ ukpo ogwu òkọp inyinya okitaan̄
mgbọ îkisa ọmọ irọ ikwaan̄.
8 Ìkijijen̄e ikana inyọn̄ ogoon̄ kubọk ijọn̄ urie kan̄,
mè ikiweek njijoon̄ inwan̄ geelek ibotaka.
9 “Ìre orie eriembuuk oron
môchieek irọrọ ikwaan̄ inyi owu?
Sà ìre môlaak me uwu anam kwun̄ me eririeen̄ ni?
10 Ìre owu môkọt itobo ọmọ olik me lek
isa ibak ijọn̄ uko?
Sà ìre môkọt irọ inyi ọmọ itaba okwukwut
ikpukpuku achiaan̄ me uko kwun̄ ni?
11 Ìre owu môkọt itoon̄ ọmọ ejit me lek
mije ikpele unye îkaan̄be?
Ìre owu môtele unye ikwaan̄ okaan̄be inyi ọmọ irọ?
12 Ìre owu môtoon̄ ejit me lek kan̄
ibe ke môbeme akpa kwun̄ inu me uwu,
mè inikpulu ititiin̄ me ere igen̄ akpa kwun̄?
13 “Uwop wukuwuku ìkiwuwum alọm alọm,
ire, kpebesa itọ me lek akukọ melek
uwop aba mbese me iwuwulu.
14 Wukuwuku ìkito nkwa kan̄ me ijọn̄,
mè itele ibe achiaan̄ ijọn̄ ikitet iyok.
15 Ìkakikeek ibe ke ukot inu geelek môkọt ikeme ikpukpuku,
ke anam oron môkọt ijak ibak.
16 Ìkirọ inu me lek ebi bọn unye unye,
kubọk kperere echi kan̄;
ìkakitet ukpook ibe ke ubọk ikwaan̄ kan̄ môchep.
17 Mije, Awaji ìkanyi ọmọ iriọọn̄-inu,
ìkacheche si ngobo-ntet ìnyi ọmọ.
18 Ire, isijibi lek ibene ililibi ekot,
ìkisasa inyinya mè ogwu òkikọp irọ inu ochak.
19 “Ìre owu onyi inyinya unye îkaan̄be;
sà ìre owu otap ọmọ mfu òkakana
igwook ọmọ me inyọn̄ ebek?
20 Ìre owu orọ inyi ọmọ ikirama iwulu
kubọk akaka ituuk,
mè ikikwut inwọm
me oniin̄ òkigwook ene ukpook me lek?
21 Unye kan̄ okibele ọmọ ejit,
îra isa ukot ikigwak ijọn̄ emen iteke,
mè ikiwulu inan̄a isibi isi akọn̄
isi ichichini melek nroon̄ akọn̄.
22 Ìkichachak ukpook me imọm;
ìkakifieek owot me lek inu geege;
ìkakilibi ìnan̄a me otu oge akọn̄.
23 Akpa oraan̄ ìkitaan̄ wọkọ wọkọ wọkọ me inyọn̄ udun̄ kan̄,
otunwa mè òtọbọ okekimumen.
24 Mgbọ otita akọn̄ isikitaan̄, ìkakikọt ìkeke;
îra isa uran-lek mè unaan̄-ejit
igwak ijọn̄ ilibi efuuk efuuk ikinin̄.
25 Otita akọn̄ isitataan̄, îra ikibele ejit ikwut inwọm;
ìkikup me ujọn̄ọ ere inọ olu akọn̄,
mè ida ukpo ebi ibot akọn̄, mè ida okput akọn̄.
26 “Ìre sa me iriọọn̄-inu kwun̄ ke mkpukpo okiwulu,
mè ikiwele uwop iwulu ifo agan̄ osiki?
27 Ìre owu okitọ ikọ inyi igo ibe
iwulu ichep me akpabin inyọn̄,
mè inama uwu kan̄ me inyọn̄ ogoon̄ òbebene?
28 Ìkiluk me inyọn̄ ogoon̄ òbebene,
mè òkolaak me ere ya me eririeen̄,
inyọn̄ ibot ngigo ogoon̄ òkup kpunukpunukpunu
ore ere ikwek-lek kan̄.
29 Ìkikup me ere ya imun̄ inu ìbotet isa irọ inorie,
chieen̄ kan̄ ìkimọmọọn̄ inorie kan̄ me ujọn̄ọ ere.
30 Ere nkwukwu ene okupbe, ere keya ke îkikup;
bọn kan̄ ekinwọ eje.”