40
Okumugwem onenibe Jobu:2 “Ìre ogwu òkigana ere
môkọt igbini ikọ melek Ogwu Òkaan̄ Unye Geelek ni?
Ogwu òkiwut ifan̄a melek Awaji,
ifọọk ma!”
Jobu îfọọk Okumugwem otu
3 Jobu onenifọọk Okumugwem ibe:
4 “Emi misip ma, keke ke mbafọọk owu?
Nsa ubọk ichit otu n̄a.
5 Ntumu, mè ikpọk itumu, ire, m̀kpafọọk otu,
m̀kpayaka ije inyi isi.”
Okumugwem îkpọk itọ Jobu ubọk me isi
6 Okumugwem onenikup me emen egwijo ikpọk itumu ikọ inyi Jobu ibe:
7 “Tobo ekwut nye me ebon kubọk enerieen̄;
inyi ǹdo owu ikọ,
mè owu òfọọk emi.
8 “Ìre owu môgwak unen oyerebet n̄a?
Ìre owu môtip emi oyerebet,
inyi òsa me ikeya ònwọn lek kwun̄ ikọ?
9 Ìre oguga kwun̄ înye kubọk eyi Awaji ni?
Sà ìre ida kwun̄ môkọt ikisook kire eyi kan̄?
10 Ire ikeya, sa-nu umin ubọọn̄ mè ulibi bala lek kwun̄,
mè sa ujamgbugbo mè òrirọ tap chit lek kwun̄ nu!
11 Gbuku-nu uyok uyok unaan̄-ejit kwun̄ gwook;
kpọ-nu ebi ubenelek geelek, mè gele ema siki-nu;
12 kpọ ebi ubenelek geelek, mè da-nu to me ijọn̄,
mè jak-nu ebi ikpak kpukpuku me ere kiban̄.
13 Gbaan̄-nu otutuuk kiban̄ fuun̄ tap me achiaan̄;
tap ema mkpọn me ama ekwukwu nu.
14 Osikọt irọ otutuuk inu chi, emi me lek n̄a si mânenitọn̄ owu,
mè ichieek ibe ke ubọk ulom kwun̄ môkọt inyan̄a owu.
15 “Kpọ, ke omun̄ mgbugbo anam beyemot,a
emi nrom ọmọ, mè irom owu;
ìkitaka mbubet kubọk eriembuuk.
16 Kpọ-nunu, unye îkaan̄be me igbo edim kan̄,
mè unye îkaan̄be me lek ufuk owot kan̄!
17 Edim kan̄ ìnye kubọk uti olik,
nlik ukwuuk ebon kan̄, elọlọk ifit.
18 Ukwuuk kan̄ ìnye kubọk ekwe ofok emen,
sà ukot kan̄ obet lek okwukwut ukut lek.
19 Ọmọ ore anam òmimin ichit eyi Awaji orombe,
ogwu òrorom ọmọ gaalek
okikọt iben oge akọn̄ inin̄ ọmọ lek.
20 Mbubet îkitaka ìkitibi me inyọn̄ orioon̄,
ere ya si ke ebi kè anam oron ekifit ifit.
21 Ìkilaak me irak uti lotọs,
mè ikilet me etete anyiaan̄ me emen nria.
22 Uti lotọs cha okekisa ogugo kiban̄ ilet ọmọ,
uti wilo òkup me agba okolo okekikana ọmọ ichit.
23 Mun̄ okwaan̄ ikelilibi inye ukot, ìkakifieek owot;
mun̄ okwaan̄ Jodan ikegbugbuku inin̄ otu,
ìkakisisik ọmọ lek.
24 Ekene obokọt itet ọmọ ichim chieen̄ ibum,
mè ìre isa ufe itet igon inwọm itibi?