41
“Ìre owu môkọt isa ukọọk itaba mgbugbo anam ejit okwaan̄,asà ìre môkọt isa olik ibọp alọm kan̄ ikam?
2 Ìre owu môkọt itap olik itibi ọmọ inwọm,
sà ìre môkọt isa ukọọk ichim uga kan̄ itibi?
3 Ìre ọmọ môkpọkpọ ikiriaak owu ibe owu òtele ọmọ ifo?
Sà ìre môtumu ikọ ususuk ususuk isa irireek owu ejit ni?
4 Ìre mônyan̄a ibot melek kwun̄,
ibe ọmọ mônin̄ usun̄ inyi owu ire mgbọ geelek ni?
5 Ìre owu môkọt isa ọmọ ikifit ifit kubọk ofut,
sà ìre môkọt itobo ọmọ ito,
inyi nsabọn ibaan̄ uwu kwun̄ esa ekechak imọm?
6 Ìre ogbo ebi mbọm irin̄ mêchieek ewe kan̄ ni?
Sà ìre ebi ewe mêbak ọmọ inyam?
7 Ìre owu môkọt itọọn̄ òtọbọ inwunwan̄ ijot akpa kan̄,
sà ìre môkọt isa otunwa itọọn̄ ibot kan̄ itibi?
8 Si chak ubọk me lek kan̄ kpọ,
owu òkpowuuk akọn̄ òbosibi;
òkpoyaka ikpọk irọ si ofifi mgbọ!
9 Ene geelek òkekeek ibe ke ọmọ môkọt itet mgbugbo anam ejit okwaan̄ ya
ìkifiaan̄ lek kan̄;
ogwu itoon̄ chieen̄ me lek,
ibot ejit kan̄ îra iwulu,
îra inan̄a irọn̄ me ijọn̄.
10 Kpunu ogwu afa geege òbokat ejit ije inin̄ lek isi isisik.
Ire ikeya, ìre ekene obokọt ikeke ida emi?
11 Ekene obe ke emi nkaan̄ ọmọ urieek, inu, ke mâkpe.
Otutuuk inu geelek òkup me irak isinyọn̄ ìre eyi n̄a.
12 M̀kpalọlọ itutumu ikọ ofolek ukot mgbugbo anam ejit okwaan̄ ya,
mè unye kan̄ mè ubọk lek kan̄ ojaan̄be.
13 Ekene obokọt inyiaan̄ akpa inyọn̄ kan̄ isan̄a
kubọk ekiwọọk ofọnti?
Sà ìre ekene obokọt ichim
ofọnti akọn̄ akpọk iba kan̄ itibi?
14 Ekene obonye ejit isi ikama uga kan̄,
eyi ejeek kan̄ cha òkup nriki nriki ogbanbe ikana.
15 Ikpọk kan̄ cha òbet lek agbọ
echi egbaan̄be igọm ikam me onineen̄ me onineen̄,
ọmọ ore inu îkisa igugo lek.
16 Ge îriaak me lek ge enenen,
efet ìkakitibi agbagba kiban̄.
17 Ema egugugọbọ inye, ge mè ge;
mè igba lek kiban̄ ikam, kpebekọt ikama.
18 Mgbugbo anam ejit okwaan̄ isisen esen, utoon̄ îra ikisook isibi;
chieen̄ kan̄ îra ikinin̄ kubọk utun otu ewelegwe.
19 Alọm ukan̄ îra ikisibi ọmọ me otu;
ntat ukan̄ îra ikiraan̄ isibi.
20 Oduku îra ikibumu isibi me inwọm kan̄
kubọk oduku òkisibi me otin̄
òkiriak me lek ukan̄ anyiaan̄.
21 Efuuk kan̄ îra ikirọ ukan̄ ilomo,
alọm ukan̄ îra ikisibi ọmọ me otu.
22 Unye kan̄ ìkup me ebek kan̄,
ebi ene ekililibi inan̄a me isi kan̄ mije ukpook.
23 Ufuk kan̄ ìbet lek etọtọkọ igba igọm,
ìnyenye, kpunu ijijibi.
24 Ejit kan̄ ìnye kubọk ewuuk,
ìbet lek ewuuk ikọk-akpa eyi irak.
25 Ọmọ isijibi lek ibene, ebi unye ekifefieek owot,
isikibọn̄ mun̄, ema mîra ikililim igwu ikom.
26 Oge akọn̄ ire lek kan̄, ìkititip;
ubọk yaage si ke îkup me lek otunwa
mè oraan̄ mè òtọbọ.
27 Me lek kan̄, okwukwut ìre nsisip,
ekwe ìre njijọ uti.
28 Sa oraan̄ sook,
ìkabolibi;
sa olik-mgbọlọ sook,
mgbọlọ cha ìkibet lek mfurufu me lek kan̄.
29 Me lek kan̄, m̀gbele ìre okpot akpa;
esa otunwa itọbọ, ìkichachak.
30 Irak owot kan̄ ìkup nkikek nkikek kubọk bọn okpọkọ ugọn̄,
mè ikigwak ibat isibi akpat
kubọk okwukwut ibọn̄ akpa.
31 Irọn̄ me okwaan̄, ugwuuk okwaan̄ îra iriak ifuuk
kubọk otin̄ oriak me ukan̄,
okwaan̄ îra ikitim kubọk otin̄ aran̄.
32 Akpat mun̄ ere îrọn̄be ìkitatana igọọk ọmọ me udun̄,
îra ikikup kubọk okwaan̄ ìtitibi isọọn̄.
33 Kpunu inu geege me linyọn̄ òbet lek kan̄,
ọmọ ìre inu erombe eyi ìkakitet ukpook.
34 Anam geelek òkibene lek, ìkikpọkpọ chieen̄ isiki;
ọmọ ore ogwu ubọọn̄ inyi anam geelek òkibene lek.”