Jobu îfọọk Okumugwem otu
42
Jobu onenifọọk Okumugwem ibe:2 “Nriọọn̄ ibe ke owu môkọt irọ otutuuk inu geelek;
kpunu nkeek kwun̄ geege òbolọlọ irọrọ iso.
3 Owu odo emi ibe, ‘Ìre ekene ire ogwu,
ogwu òkitap udun ichit otitọt n̄a
me ikakaan̄ge ifuk-ibot?’
Me atikọ, ntumu inu echi nkariọọn̄ge ibot,
inu òkup uyeke uyeke echi emi ǹkariọọn̄.
4 Owu obe emi, ‘Gban̄ utọn̄ nu,
inyi ǹdo owu ikọ,
mè owu òfọọk emi.’
5 Mgbọ òraraka, ǹkinọ inu ofolek kwun̄ me utọn̄ utọn̄,
ire, mgbọ keyi, ǹsasa chieen̄ n̄a imun̄ owu.
6 Eya orọ, esip lek n̄a îtet emi, nnwene otu,
mè ikup me emen achiaan̄ mè ntọn̄ igwu ikom.”
Awaji îbene Jobu igwuun̄
7 Mgbọ Okumugwem otumube inu chi inyi Jobu isan̄a, inenibe Elifaji ogwu Teman, “Nnaan̄ ejit inyi owu melek ebi unene iba kwun̄ chi, mije, enyi kpetumu atikọ ibak emi kubọk ogwu ikwaan̄ n̄a, Jobu, otumube. 8 Eya orọ, ìsa orie eriembuuk jaaba mè orie arọọn̄ jaaba ìsi lek ogwu ikwaan̄ n̄a, Jobu, inyi isa igwa ngwugwa ewọwọp me ibot kinyi. Ogwu ikwaan̄ n̄a, Jobu, môriaak enyi uriaak me ibot. Mije, mâkaan̄ ejit nsan me lek kan̄. Sa me ikeya, m̀kparọ enyi inu ikpọ me lek mbubut kinyi. Enyi kpetumu atikọ ibak emi kubọk ogwu ikwaan̄ n̄a, Jobu, otumube.”
9 Elifaji ogwu Teman mè Bilidadi ogwu Suwa mè Sofari ogwu Nayama erọrọ inu Okumugwem obe ema erọ. Okumugwem okakaan̄ ejit nsan me lek kè Jobu, mè ibọkọ uriaak kan̄ itap.
10 Mgbọ Jobu oriaakbe uriaak inyi ebi unene kan̄ isan̄a, Okumugwem orọrọ ibe inu ikpọk ije ijaan̄ me lek kè Jobu, mè inyi ọmọ otutuuk inu îwuukbe lek ikaan̄, irek iba iba. 11 Otutuuk ebi ngwan̄ kan̄ ebirieen̄ mè ebibaan̄ mè ebi geelek ìwuwuuk lek iriọọn̄ ọmọ, enunu uwu kan̄ inigọọk ọmọ igbaan̄ irie inorie, mè ito ọmọ nsan, mè ikat ọmọ ejit me lek otutuuk ufialek Okumugwem osabe ikeme ọmọ. Ema, me ene me ene, echeche ikpoko alata okuket ge ge mè mkpọtubọk alata araran̄ ge ge inyi ọmọ.
12 Okumugwem onenigbana Jobu me mgburudun̄ mgbọ igak adasi mgbọ. Jobu onenikaan̄ akọp mè obop arọọn̄ ini, mè obop aligọ gweregwen, mè obop mgbugbak eriembuuk, mè obop inyinya akpan. 13 Îkaan̄ si bọn ebirieen̄ jaaba mè bọn ebibaan̄ ita. 14 Adasi gwun̄ enenwaan̄ kan̄ ke îgwen Jemima, ogwu òso iba ore Kejaya, sà ogwu òso ita ore Keren Apuk. 15 Kpunu ebibaan̄ geege me otutuuk lek ijọn̄ ya ìjajaan̄ uja ibet lek bọn ebibaan̄ kè Jobu. Nte kiban̄ oneninyi ema ìrot kubọk înyibe ebi ngwan̄ kiban̄ ebirieen̄.