Uriaak òkijeen̄ utoon̄-ejit me lek Awaji
Ìkup inyi ogwu òjeen̄ okwa. Okwa kè Debit.
31
Okumugwem, ubọk kwun̄ ke ntap ibot;kachieek ibe esip itet emi;
owu ìre ogwu ata irọrọ;
soso, nyan̄a emi.
2 Rieen̄ utọn̄ gban̄ emi, soso,
mè nyan̄a emi ugwat ugwat;
re unye ewuuk ilet-lek kwek emi lek,
mè re si unye uwu mgban akọn̄ nyan̄a emi.
3 Owu ore ewuuk òkikwek emi lek,
mè uwu mgban akọn̄ òkikput emi lek;
je me isi n̄a,
mè jeen̄ emi oniin̄ mije erieen̄ kwun̄.
4 San̄a emi sibi me otu ufe etapbe ilet ikikpọ emi,
mije owu ore unye n̄a.
5 Nkana ugwem n̄a itap owu me ubọk;
nyan̄a emi, jei Okumugwem,
Awaji ogwu atikọ.
6 Emi ǹchacha ebi ìkitọbọ ebum inyi mkpọmfaka;
ire, owu ke ntoon̄ ejit me lek.
7 Mâbele ejit, mè inwọọn̄ unwọọn̄,
mije imumechieen̄ kwun̄ òkikup mgbọ geelek;
bak me lek owu omun̄ ukwook n̄a,
mè iriọọn̄ uyọrọlek n̄a.
8 Owu òkasa emi ìtap me ubọk ebi ochicha n̄a;
ire, owu òsan̄a emi ito me ere òwowook,
inyi ǹkaan̄ utelelek.
9 Jei Okumugwem, kaan̄ emi ata ejit me lek,
mije ǹkup me uyọrọlek;
chieen̄ îjat emi inyi ito ufieejit;
efuuk îta emi me owot isan̄a kpai.
10 Ugwem n̄a îta irak inyi ufieejit;
nto mfi abayaage ugwem n̄a îkana mgbidim;
ujaralek îrọ lek n̄a imem;
ukwuuk òkup emi me lek îwọ.
11 Nkana inu ochak inyi ebi ochicha n̄a;
ògak ge, nkana mbuban inu inyi ebi melek n̄a;
nkana ǹdudu inyi ebi ìrọriọọn̄ emi isi;
ebi imun̄ emi me oyet, ekililibi inan̄a.
12 Otutuuk ene mîwuuk emi isan̄a kubọk ogwu òkwukwu;
ǹkup kubọk efeek òbubum ebefifiin̄.
13 Nnọ ikọ owuwa ebi ochicha ekitumu itoon̄ emi;
ukpook kiban̄ îkana emi me ijọn̄;
ema ekinin̄ oru ikana emi,
mè ikitọt ikpakpan̄ emi.
14 Ire, owu ke ntoon̄ ejit me lek, jei Okumugwem;
ǹkitutumu ibe ke owu ore Awaji n̄a.
15 Mgbọ n̄a ìkup me ubọk kwun̄;
nyan̄a emi me ubọk ebi ochicha n̄a,
mè ebi ìkililaba emi.
16 Soso, kaan̄ emi ogwu ikwaan̄ kwun̄ ata ejit me lek;
nyan̄a emi kpọ me lek
imumechieen̄ mgbọ geelek kwun̄.
17 Okumugwem, owu ke nkibọn̄ọ;
kachieek ibe esip itet emi;
ire, tele esip itet ebi ìkpaka ibot inyi owu;
rọ inyi ema eriaan̄ otu me emen udọn̄-ufuun̄.
18 Kpaak otu ebi ataak chit;
ebi ìkigumu lek itumu ijo ikọ ikeme ebi ata irọrọ,
mè ikinwe nkwọọk inyi ema.
19 Ata inu owu osun̄be inyi ebi ìkimin owu
îmin enenen mè iwa isaba iraka.
Me isi bọn ebilene ke owu okirọ ata inu chi
inyi ebi ìnitap ibot me lek kwun̄.
20 Owu òkilet ema me ere nlelet òkup me isi kwun̄,
isan̄a me lek ijo otitọt ebilene,
mè ikilet ema me irak akpatan̄ kwun̄,
isan̄a me otu alọm ebi ìkitoon̄ ene ikọ.
21 Itọn̄ ikup inyi Okumugwem,
mije imumechieen̄ òkup mgbugbo
îkaan̄be me lek n̄a
mgbọ ekpabe ikana emi
kubọk ebi akọn̄ ekpa mbin akọn̄ ikana ama.
22 Nsa ufieek-owot itumu ibe ke olap emi ijọn̄ọ ere me lek kwun̄;
ire, mgbọ ntaan̄be ukpo ibọn̄ọ owu, owu onọ.
23 Ìmun̄ Okumugwem me chieen̄, enyi ebi eyi kan̄;
Okumugwem ìkibebem ebi ìkekeke inye me lek kan̄;
ire ebi ugumulek, ìkisusut ema osusut itoon̄ urot.
24 Ìtet lek ìnye, mè ìkaan̄ ukarajit,
otutuuk kinyi ebi ìkaan̄
ikpọchieen̄ me lek Okumugwem.