Awaji okitap ubọk inyi emi
Okwa itọn̄. Okwa ekọtbe mgbọ egbanabe Uwu Mbuban. Okwa kè Debit.
30
Jei Okumugwem, mâtumu umin kwun̄ isibi,mije owu odut emi isibi me mkpa;
òkachieek ebi ochicha n̄a esa emi enwọọn̄ unwọọn̄.
2 Jei Okumugwem, Awaji n̄a, ntaan̄ ukpo igwen owu,
owu ogwagwa emi.
3 Jei Okumugwem, owu onyan̄a emi isibi me udọn̄-ufuun̄;
owu orọ emi ǹgat ugwem,
mè nkakwu ìnin̄ emen udọn̄ mkpa.
4 Ìkọt okwa ìtọn̄ Okumugwem,
enyi ebi ìchieek me lek kan̄;
ikawuuk ibe ke ọmọ ìre Ogwu Mbuban.
5 Unaan̄-ejit kan̄ ìkire mgbidim mgbọ gaalek;
ire, ata ejit kan̄ ìkikup ire
otutuuk mgbọ me ugwem ene;
ene môkọt ito ito me eririeen̄,
ire, me ewelegwe kan̄, mônwọọn̄ unwọọn̄.
6 Mgbọ inu ojebe ijaan̄ me lek n̄a,
ntumu ibe, mege ire mgbọ geelek,
ke kpunu inu òbosisik emi.
7 Okumugwem, osinwọn me lek n̄a,
nra ikeke inye kubọk ogoon̄;
ire, osida isi kwun̄ isan̄a me lek n̄a,
ukpook îra inin̄ emi lek.
8 Okumugwem, owu ke ntaan̄ ukpo igwen;
owu ke nriaak uriaak inyi.
9 Kpasi oruru ke mkpa n̄a obonin̄ inyi owu?
Ire mfo udọn̄ mkpa, ìre mônwọn owu me lek?
Ìre ebi ìkwakwaan̄ mîkitọn̄ owu njei?
Sà ìre ema mîkitumu ibe
ke owu ogbe ogwu etoon̄be ejit me lek?
10 Jei Okumugwem, nọ emi ida,
mè rọ emi nsan;
soso, Okumugwem,
tap ubọk nyi emi!
11 Owu oda ufieejit n̄a isan̄a,
mè irọ inyi ǹkenjop okwa;
owu osan̄a emi ekwut ufieejit me lek,
mè iyaka ininyi emi ubelejit.
12 Mije keyi m̀kpariaan̄ otu;
mâkikọt okwa itọn̄ owu;
jei Okumugwem, Awaji n̄a,
mâtọn̄ owu ire mgbọ geelek.