Ida Awaji me emen egwijo
Okwa kè Debit.
29
Ìtọn̄ Okumugwem, enyi ebi osat ìkup me emen inyọn̄;ìtọn̄ ọmọ mije ujamgbugbo kan̄ mè unye kan̄!
2 Ìnyi Okumugwem umin ògbegbe erieen̄ kan̄;
ìtọbọ ebum ìnyi ọmọ,
mije, ọmọ îkup mbuban me oniin̄ òkup òrirọ òrirọ.
3 Ida Okumugwem îtaan̄ me isi mun̄ okwaan̄;
Awaji ogwu òkaan̄ ujamgbugbo
îsook ida kubọk isinyọn̄;
ida Okumugwem îsook kubọk isinyọn̄
me owuwa okwaan̄.
4 Ida Okumugwem îkaan̄ unye;
ida kan̄ îkup mgbugbo.
5 Ida Okumugwem îgbugbọ uti olik;
iin̄, Okumugwem îgbugbọ uti olik me ido Lebanọn.
6 Ida kan̄ îrọ ebi kè ogoon̄ Lebanọn eraan̄ ewulu
kubọk bọn eriembuuk,
mè irọ ogoon̄ Siriọn irama iwulu
kubọk orie gwun̄ eriembuuk.
7 Ida Okumugwem îsook,
mè irọ omumen-inyọn̄ imumen.
8 Ida Okumugwem îsisik èwê;
Okumugwem îsisik èwê agan̄ Kades.
9 Ida Okumugwem îrọ uti ilip inwunwunu,
mè irọ inwan̄ igen̄ ita me ibot uti me oron;
ire, me emen Uwu Mbuban, otutuuk ene ekibe,
“Umin ikup inyi Awaji!”
10 Okumugwem me inyọn̄ ogboon̄ ubọọn̄ kan̄ okupbe
ikitọ ikọ inyi mun̄ ile;
ọmọ ìkup me inyọn̄ ogboon̄ ubọọn̄
ikikpulu ire mgbọ geelek.
11 Okumugwem înyi ebi kan̄ unye;
îrọ mè ema ekaan̄ utelelek mè esuuk.