Uriaak ibebeek ntap-ubọk
Okwa kè Debit.
28
Jei Okumugwem, owu ke ngwen;ewuuk òkikput emi lek, kariaan̄ emi;
ire òkabọkọ emi otu,
mâkana ikup kubọk ebi ìfofo udọn̄ mkpa.
2 Nọ ida mbeek nkitaan̄ ukpo ibeek owu
mgbọ mbenebe ubọk ikiriaak uriaak,
mè iyaka isi ijeen̄ agan̄ Uwu Mbuban.
3 Kagbaan̄ emi melek ebi ikpak mè ebi ìkirọ ijo inu
ìtip oyerebet;
ife chi ekaan̄ ijo ejit me emen kiban̄,
mè ifiaan̄ ikitumu ikọ esuuk melek ebi ene.
4 Nyi ema osusut kpọ me lek inu ema erọbe,
mè ubọk ijo inu kiban̄ ofieekbe ire;
nyi ema osusut kpọ me lek ijo ubọk ikwaan̄ kiban̄.
5 Ema kpesa ikwaan̄ Okumugwem orọbe igwen inu;
inu îrombe si ìkanin̄ ema chieen̄;
eya orọ, Okumugwem môgwak ema kubọk ekigwak uwu;
ìkpoyaka inama ema ofifi, mege ire mgbọ geelek.
6 Itọn̄ ikup inyi Okumugwem,
mije ọmọ înọ ida uriaak n̄a!
7 Okumugwem ore unye n̄a mè agbọ n̄a;
ọmọ ke ntoon̄ ejit me lek,
itatap ubọk inyi emi;
eya orọ, unwọọn̄ ìjojot emi ejit;
ikeya ke nkọt okwa isa itọn̄ ọmọ.
8 Okumugwem ore unye ebi eyi kan̄;
ọmọ ore ere unyan̄a mè uwu mgban akọn̄
inyi ogwu ubọọn̄ îtọkọbe aran̄ me ibot.
9 Okumugwem, nyan̄a ebi eyi kwun̄,
mè gbana ebi mêriebe ìrot kwun̄;
bọọk ema,
mè kpukpo ema si re mgbọ geelek.