Itotoon̄ ejit me lek Awaji
Okwa kè Debit.
27
Okumugwem okinyi emi utoon̄, mè ikinyan̄a emi;ìre ekene ke mbatet ukpook me lek?
Okumugwem okibem ugwem n̄a;
ìre ekene ke mbafieek owot me lek?
2 Mgbọ ebi ijo ife mênin̄be imeen̄ emi inenigwak emi iche,
ebi ochicha n̄a mè ebi ìkikọp emi cha,
ema mêkwaak,
mè irurọn̄ọ.
3 Ìrere urum akọn̄ okpa ikana emi,
ǹkabafieek owot;
ikerere akọn̄ ke ejibi inu emi lek,
ejit n̄a ìbonyenye.
4 Inu ge ke mbeek me ubọk Okumugwem,
eya si ke mweek;
inu ya ìre iluluk me Uwu Mbuban Okumugwem
otutuuk usen ugwem n̄a,
mè ikimun̄ uja Okumugwem,
mè ikiriaak uriaak me Uwu Mbuban kan̄.
5 Mije, me usen uyọrọlek,
Okumugwem môlet emi me irak akpatan̄ kan̄;
môtap emi me ere nlelet me uwu kan̄ ichit,
mè ibene emi itoon̄ me inyọn̄ ewuuk òbebene.
6 Sa me ikeya, mâtim ikpan̄
ebi ochicha ìkana emi okokop;
mgbọ ya, mânenigwa ngwugwa me uwu kan̄,
mè itaan̄ ukpo unwọọn̄;
mâkọt okwa itọn̄ Okumugwem.
7 Okumugwem, nsitaan̄ ukpo igwen owu, nọ;
kaan̄ ata ejit me lek n̄a,
mè rọ ubọk mbeekbe owu.
8 Ejit n̄a ìbe ke owu òbe,
“Ìkiweek emi.”
Eya orọ, jei Okumugwem,
isi kwun̄ si ke nkiweek.
9 Kalet isi kwun̄ ìsan̄a me lek n̄a;
kasa mije unaan̄-ejit ìlap emi ìda ìbọkọ;
owu ore ogwu òkitap ubọk inyi emi;
katọp emi ìfiin̄;
kajit emi ìtele,
jei Awaji ogwu òkinyan̄a emi.
10 Nte n̄a mè nga n̄a mêkọt ijit emi itele,
ire, Okumugwem mômọnọ emi ikpukpo.
11 Okumugwem, jeen̄ emi oniin̄ kwun̄,
mè sa emi je me oniin̄ òrọrọt,
mije, ebi ochicha n̄a mêkikpọ emi.
12 Nyan̄a emi sibi me ubọk ebi ochicha n̄a,
mije ebi ata-ikọ ataak mîsibi ikeke itutumu ikeme emi,
mè iben ejit irọrọ emi afa me lek.
13 Nchieek inye ibe ke mâkup me ògat ugwem
imun̄ nnwọn Okumugwem me ugwem keyi.
14 Ìkup ìkpọ Okumugwem;
ìtet lek ìnye,
mè ìtet ejit ìnye;
iin̄, ìkup ìkpọ Okumugwem.