Uriaak ogwu ata ene
Okwa kè Debit.
26
Jei Okumugwem, sibi oyerebet nwọn emi,mije ǹkirọ inu ònenen;
owu ke ntoon̄ ejit me lek;
ǹkakaan̄ ejit iba.
2 Okumugwem, roon̄ emi kpọ,
mè jeen̄ ibe ke ǹkarọ ìlọ;
wọlọ emen ejit n̄a mè ekiket n̄a si kpọ.
3 Mije, imumechieen̄ okikaan̄ mgbọ geelek
okijeen̄ emi oniin̄;
emi ǹkije si me atikọ kwun̄.
4 Ǹkakigbaan̄ ìrie melek ebi ofiaan̄;
ǹkabagbaan̄ ije si melek ebi isi iba.
5 Ncha igọgọọk ebi ijo irọrọ ije ogbo;
m̀baje si agan̄ agan̄ me lek ebi ikpak.
6 Okumugwem, nra igwọk ubọk n̄a,
isasa ijeen̄ ibe ke kpunu eyi nrọbe ilọ,
mè igọọk ikije ikana me lek ntook kwun̄,
7 ikitaan̄ ukpo ikọt okwa itọn̄ owu,
mè ikitumu otutuuk ikpele inu owu orọbe isibi.
8 Jei Okumugwem, mma Uwu Mbuban kwun̄,
ere ujamgbugbo kwun̄ okupbe.
9 Kagbaan̄ emi melek ebi ijo ìwop ìfiin̄;
kachieek ibe ǹkwu mkpa yaage
ebi ìkpan̄ ene ebekwu.
10 Emen ubọk ife chi îfiat isan̄a inyi ijo inu;
ubọk ulom kiban̄, ikpoko udun̄ ikpoko udun̄ ojot.
11 Ire, eyi n̄a, ǹkirọ inu ònenen;
kaan̄ emi nsan me lek,
mè faka emi sibi.
12 Ukot n̄a înye me ijọn̄;
Okumugwem, mâtọn̄ owu
me emen ntitiin̄ ebi eyi kwun̄.