Uriaak mgbọ ufialek onin̄be
Okwa kè Debit.
25
Jei Okumugwem,îre owu ke nkitọbọ ebum inyi.
2 Jei Awaji n̄a, owu ke ntoon̄ ejit me lek;
kachieek ibe ǹrie esip;
kachieek ebi ochicha etim ekpan̄ emi.
3 Kachieek ibe ebi ìtoon̄ owu ejit me lek erie esip;
rọ inyi ebi ukot okifet irọrọ ijo inu erie esip.
4 Jei Okumugwem, rọ mè ǹriọọn̄ oniin̄ kwun̄,
mè jeen̄ emi ubọk mbasa ije me oniin̄ ya.
5 Jeen̄ emi atikọ kwun̄,
mè kisa emi je me emen kan̄,
mije owu ore Awaji ogwu òkinyan̄a emi;
owu si ke nkikpọ chieen̄ mgbọ geelek.
6 Jei, Okumugwem,
kawuuk ejit nsan
mè imumechieen̄ mgbọ geelek
eyi okaan̄be me lek ebi kwun̄ karake ukot ikaan̄.
7 Soso kayaka ìkeek ijo inu nrọbe mgbọ nsabọn irieen̄,
mè nrọ-nlọ geelek nrọbe mgbọ cha;
ire, keek emi, mije nnwọn kwun̄,
sa me lek imumechieen̄ okikaan̄ mgbọ geelek.
8 Okumugwem ìkirọ
inu ònwọnwọn mè inu ònenen;
eya orọ îkiteme ebi ijo ife oniin̄ ògbegbe ibe ema egọọk.
9 Ìkisa ebi ìsisiki lek ije me oniin̄ ònenen,
mè ikirọ ema eriọọn̄ nkeek kan̄.
10 Ebi ìkirọ inyan̄a-ibot Okumugwem,
mè ikigọọk si nteme kan̄,
ebiba ke îkimun̄ me chieen̄ mgbọ geelek,
mè ikisa ije me oniin̄ eyi atikọ.
11 Okumugwem, mije erieen̄ kwun̄,
tele inu nrọbe ilọ nyi emi,
ke îwa enenen.
12 Ebi geelek ìkimin Okumugwem,
ebiba ke ìbojeen̄ oniin̄ ema mêkigọọk.
13 Inu môje ijaan̄ me lek kiban̄;
bọn kiban̄ ebere ebi ìbekaan̄ lek ijọn̄ me ìrot.
14 Okumugwem ìkitumu nlelet inu kan̄ ijeen̄ ebi ìkimin ọmọ,
mè ikirọ ema eriọọn̄ inyan̄a-ibot kan̄.
15 Okumugwem ke nkikpọ chieen̄ mgbọ geelek,
mije môwọọk emi ukot isan̄a me otu ufe.
16 Okumugwem, soso, yaka isi kpọ emi,
mè kaan̄ emi nsan me lek,
mije emi ìre gwun̄ ibot ge,
mè ogwu ekituk.
17 Ufialek îjot emi ejit enenen;
san̄a emi sibi me emen uyọrọlek n̄a geelek.
18 Kpọ sasaak mè kwulukwulu nkibọkọ,
mè ben otutuuk ijo n̄a fiin̄.
19 Raan̄ chieen̄ kpọ ebi ochicha n̄a;
kpọ ubọk ema ewabe iyaka,
mè ubọk ema echabe emi ikpak ikpak!
20 Jei, bem ugwem n̄a, mè nyan̄a emi sibi;
kachieek ibe esip itet emi,
mije, me lek kwun̄ ke nlibi inilet.
21 Bem emi, mije, owu ìre ogwu atikọ mè ogwu unen eru,
bak me lek, owu ke ntoon̄ ejit me lek.
22 Jei Awaji, soso, nyan̄a ebi Ijeren sibi
me otutuuk uyọrọlek kiban̄.