Ogwu òbokọt inin̄ Uwu Mbuban
Okwa kè Debit.
24
Linyọn̄ mè inu geelek òkup me emen kan̄ ìre eyi Okumugwem;iin̄, otutuuk linyọn̄
mè otutuuk ebi ìluk me emen kan̄
ìre eyi Okumugwem.
2 Ọmọ osan̄a ijọn̄ isibi me ejit okwaan̄,
mè idọmọ ijọn̄ ito ikana isi mun̄.
3 Ekene mônene ogoon̄ Okumugwem?
Sà ìre ekene mônin̄ emen Uwu Mbuban kan̄
isi itọbọ ebum inyi ọmọ?
4 Îre ogwu òkirọ inu ònenen;
ogwu ikakaan̄ge okpa geege me ejit;
ogwu ìkakitọbọ ebum ìnyi mkpọmfaka,
mè ogwu ìkakinyan̄a ibot ataak.
5 Ogwu òkup ikeya obobọkọ ugbana
me ubọk Okumugwem,
mè ibọkọ unen oyerebet me ubọk Awaji
ogwu òkinyan̄a ọmọ.
6 Ebi ìkup ikeya ere ebi ìkinu me lek Awaji,
mè ebi ìkitọbọ ebum inyi Awaji kè Jekọp.
7 Ìgwuku otunchit ìbook;
ìgwuku isotu akarake akat cha ìmaan̄,
mè ogwu Ubọọn̄ òkaan̄ ujamgbugbo iraka inin̄!
8 Ekene ore ogwu Ubọọn̄ òkaan̄ ujamgbugbo yi?
Îre Okumugwem,
ogwu ònyenye lek, mè iriọọn̄ ukot akọn̄;
îre Okumugwem, ogwu òkiririin̄ oyet akọn̄!
9 Ìgwuku otunchit ìbook;
ìgwuku isotu akarake akat cha ìmaan̄,
mè ogwu Ubọọn̄ òkaan̄ ujamgbugbo iraka inin̄!
10 Ekene ore ogwu Ubọọn̄ òkaan̄ ujamgbugbo yi?
Îre Okumugwem, Ogwukaan̄ Inyọn̄ mè Ijọn̄;
ọmọ ore ogwu Ubọọn̄ òkaan̄ ujamgbugbo ya.