Okwa itọn̄
33
Otutuuk kinyi ebi ata irọrọ,ìnwọọn̄ unwọọn̄ bak me lek inu Okumugwem orọbe;
îgbe ibe ebi ejit otanabe etọn̄ ọmọ.
2 Ìkwak uneen̄ eyi sọntiik ìsa ìtọn̄ Okumugwem;
ìsa uneen̄ ile eyi akọp olik ìkọt okwa ìtọn̄ ọmọ.
3 Ìkọt aya okwa ìnyi ọmọ;
ìriọọn̄ ubọk ìkwak uneen̄ ike enyi eriọọn̄be ikwak,
mè ìtaan̄ ukpo unwọọn̄.
4 Ikọ Okumugwem ìkekeke,
inu geelek îrọbe ìre atikọ.
5 Ọmọ ìkima ata irọrọ mè unen oyerebet;
imumechieen̄ mgbọ geelek kan̄ ìsoso otutuuk linyọn̄.
6 Okumugwem ìrom akpabin inyọn̄ sa me ikọ otu kan̄,
mè irom si ura mè onyan̄ mè ntoronyan̄
sa me efet otu kan̄.
7 Înyi mun̄ otutuuk okwaan̄ okike kan̄
kubọk ìchichibi itap me iko isun̄,
mè igbaan̄ mun̄ emen awaji isun̄ me ere ge
kubọk ìsun̄ me uwu isun̄-inu.
8 Otutuuk linyọn̄, ìtet ukpook me lek Okumugwem;
otutuuk ebilene me irak isi ura,
ìfieek owot me lek kan̄.
9 Mije, ìtumu ikọ me otu kan̄, inyọn̄ osisibi;
ìnyinyi ida, inu geelek okukup ibia.
10 Okumugwem îfiat nkeek ebi ido geelek,
mè ijijaka otitọt kiban̄ isan̄a kpai.
11 Ire, nkeek Okumugwem ìkekeke ire mgbọ geelek;
otitọt kan̄ si ìkukup ire ukot geelek.
12 Ikpele ubelejit okup inyi ido geelek
Okumugwem orebe Awaji ema ekiriaak;
ebi îgobobe isun̄ inyi lek kan̄.
13 Okumugwem ìkup me emen inyọn̄
isiki chieen̄ ikpọ linyọn̄,
mè imun̄ bọn ebilene geelek isan̄a kpai.
14 Ìkup me inyọn̄ ogboon̄ ubọọn̄ kan̄
igele chieen̄ isiki ikpọ,
mè imun̄ otutuuk ebi ìluk me linyọn̄.
15 Îre ọmọ orom ejit kiban̄ otutuuk,
mè iriọọn̄ ikwaan̄ ema otutuuk ekirọ.
16 Ìkare ikakaan̄ urum akọn̄ ònyenye
okirọ akọn̄ inwọn ogwu ubọọn̄;
ìkare si unye oguga ogwu akọn̄ okaan̄be
okirọ ọmọ itim ikpan̄.
17 Inyinya akọn̄ ìkare inu òkirọ akọn̄ inwọn ene;
ikpele unye kan̄ ìkpokọt
inyan̄a ogwu akọn̄ òkup me inyọn̄ kan̄.
18 Okumugwem ìkikpọ chieen̄
me lek ebi ìkitet ọmọ ukpook me lek;
ebi ìtotoon̄ ejit me lek
imumechieen̄ mgbọ geelek kan̄.
19 Ọmọ okinyan̄a ema me mkpa,
mè ikisun̄ ema me ògat ugwem me mgbọ akan̄.
20 Utoon̄-ejit kiji ìkup me lek Okumugwem;
ọmọ ore ogwu òkitap ubọk inyi eji,
mè agbọ òkikwek eji lek.
21 Ejit kiji îbele me lek kan̄,
mije eji etoon̄ ejit me lek erieen̄ kan̄ òkup mbuban.
22 Okumugwem, tele imumechieen̄ mgbọ geelek kwun̄
ikup me lek kiji,
mije, eji etoon̄ ejit me lek kwun̄.