Okumugwem mitop
Okwa kè Debit mgbọ înwọnọbe me ubọk kè Abimelek ogwu îfiaan̄be irọ me isi kubọk ọmọ ìre iraak, ogwa obebe ifo, ifofo.
34
Mâkitọn̄ Okumugwem mgbọ geelek;otu n̄a ìkporiaan̄ ere ikekitọn̄ ọmọ.
2 Mâsa Okumugwem igugo lek;
ebi ekitutuku mênọ, mè ibele ejit.
3 Ìgọọk emi ìtọn̄ Okumugwem;
ìna eji egbaan̄ otu etumu erieen̄ kan̄ emin.
4 Nriaak ọmọ, inọnọ uriaak n̄a,
mè inyan̄a emi me ubọk ebi nkifieek owot me lek.
5 Ebi ìtoon̄ ọmọ ejit me lek ebene chieen̄ ikpọ ọmọ;
utoon̄ kan̄ ototoon̄ ikana ema lek;
esip geege ìkakup me isi kiban̄.
6 Emi ogwu ugbọọn̄ keyi ntaan̄ ukpo igwen Okumugwem,
inọnọ, mè inyan̄a emi isibi me otutuuk uyọrọlek n̄a.
7 Ebi ìkitet ukpook Okumugwem,
ema ke ogwu osat kan̄ okibem,
mè ikinyan̄a isibi me ufialek.
8 Ìroon̄ Okumugwem ìkpọ;
enyi mêmun̄ ibe ke ọmọ înwọn;
kpọ-nu uga ubelejit òkup inyi
ebi geelek ìtap ibot me irak kan̄.
9 Enyi ebi eyi kan̄, ìtet ukpook me lek kan̄;
kpunu inu geege òbonan
ebi ìkaan̄ ukpook kan̄ me emen.
10 Kpọ, ebi kè egbe àtat ekekinan inorie,
mè eran̄ ọfiọọn̄;
ire, ebi ìkinu me lek Okumugwem,
kpunu ata inu geege òbonan ema.
11 Enyi, bọn n̄a, ìna ìnigban̄ utọn̄;
mâjeen̄ enyi oruru òkup me lek
ikakaan̄ ukpook Okumugwem.
12 Ìre owu oweek iluluk ujọn̄ọ ugwem,
mè iweek irerie utop me ugwem kwun̄?
13 Ire oweek, katumu ijo usem,
kakan̄ ataak.
14 San̄a lek me lek ijo inu,
mè rọ inu ònwọnwọn;
me inu geelek, week esuuk me otutuuk ejit kwun̄.
15 Chieen̄ Okumugwem ìkakinan̄a me lek ebi ata irọrọ;
utọn̄ kan̄ si ìkigban̄ ida nto-lek kiban̄.
16 Isi kan̄ ìkakitat me lek ebi ijo irọrọ;
ìbofefieek ema isan̄a,
inyi ene geege ikayaka ìkeek erieen̄ kiban̄ me linyọn̄.
17 Ebi ata irọrọ isitaan̄ ukpo igwen Okumugwem,
Okumugwem ìkekinọ,
mè ònyan̄a ema osibi me ujaralek kiban̄ geelek.
18 Okumugwem òwa me agba lek ebi uga ufieejit;
ìkinyan̄a ebi kpeyaka ikaan̄ ikpọchieen̄ geege.
19 Ufialek ogwu ata irọrọ ìkekiwa enenen,
ire, Okumugwem ore ogwu òkisan̄a ọmọ isibi
me emen otutuuk ufialek cha.
20 Okumugwem ìkikpọkpọ ọmọ chieen̄ me lek,
ìkabochieek ibe ukwuuk kan̄ ge ikeyi
ifan̄a mije ufialek cha.
21 Ebi ìkirọ ijo inu, ijo inu kiban̄ môsa ema ije;
ebi ìkirọ ikeme ebi ata irọrọ, mêbọkọ osusut.
22 Okumugwem okifaka ugwem ebi ikwaan̄ kan̄ isibi;
ene geelek òtap ibot me lek kan̄
ìkakaan̄ mgbọ ibọbọkọ osusut.