Uriaak ibebeek ntap-ubọk
Okwa kè Debit.
35
Jei Okumugwem, je keme ebi ìkije ikeme emi;tim etim me lek ebi ìkitim emi etim.
2 Ben agbọ kwun̄ eyi ilile mè eyi ijija,
mè je kweek ebi ìkililaba emi.
3 Wọọk otunwa kwun̄ sa je kweek ebi ìkililaba emi;
nyi emi ukarajit ibe ke owu mônyan̄a emi.
4 Rọ inyi esip itet ebi ìkiweek ikpakpan̄ emi,
mè rọ inyi ema ekakaan̄ ulibi;
rieen̄ ebi ìkitọt emi ijo kpebe,
mè tap ema welewele.
5 Mgbọ ogwu osat Okumugwem môkiririeen̄ ema,
rọ ema eliliin̄ echieen̄
kubọk mfuun̄ efet okiben iwut ichep.
6 Mgbọ ogwu osat Okumugwem môkililaba ema,
rọ inyi oniin̄ kiban̄ idun, mè ikikwaak ema.
7 Mije, ema mîtip ufe ito inyi emi me nkarọge ema ìlọ,
mè irọkọ si udọn̄ isun̄ ikpọ emi
me nkarọge ema ijo inu geege.
8 Rọ inyi mfiat irọn̄ ikeme ema me òchichini,
mè ema ejeen̄ me lek njin
ema gaalek elileekbe isun̄ iban ebi ofifi ife;
rọ mè ema erọn̄ me lek ufe kiban̄,
mè ekwaan̄ echep.
9 Mgbọ ya, mânwọọn̄ unwọọn̄ mije inu Okumugwem orọbe;
mânwọọn̄ unwọọn̄ bak me lek înyan̄abe emi.
10 Mâtumu me ijọn̄ ijọn̄ ejit n̄a ibe,
“Jei Okumugwem, ìre ekene obet lek kwun̄?
Owu ogwu òkinyan̄a ebi kpekaan̄ unye
isibi me ubọk ebi ìkakaan̄ unye igak ema,
mè ikinyan̄a ebi una-lek isibi
me ubọk ebi ìkitutuku ema.”
11 Ebi afa mîkeke ata-ikọ ataak ikeme emi,
mè itoon̄ emi ikọ nkariọọn̄ge ibot me lek.
12 Ema esa ijo inu ikpe emi mkpukpe ata inu n̄a,
mè itap emi me uga ufieejit.
13 Mgbọ orukan̄ otetbe ema, ofọnti ufieejit ke ntap,
mè ikikpan̄ lek ijin otu;
nriaak uriaak abayaage, ìkaje.
14 Mfieek ejit mije kiban̄ kubọk ema ìre ebi une n̄a,
mè ìyaka ire ebi ngwan̄ n̄a;
ngwuuk ugwuuk
kubọk ǹkigwuuk ifieek ejit inyi nga n̄a.
15 Ire, mgbọ uyọrọlek obonida emi ito,
ema etititiin̄ ikana emi,
mè ikibele ejit;
ebi ìnu emi etim me lek mîtitiin̄ ibak emi me nkariọọn̄ge;
ema ekilo emi, otu ìkakiwọ.
16 Ema egọọk ebi ten̄ten̄ ugwem ekakaan̄ge ukpook Awaji
ikitumu ijo usem ikpak isa ikichak emi,
mè ikiban̄a otu inin̄ emi lek.
17 Jei Ogwukaan̄-ene,
òbokpọ inu chi chieen̄ chieen̄ ire mgbọ owa?
Nyan̄a emi sibi me mkpa ema ekiweek ikpakpan̄ emi;
bọkọ ebek ugwem n̄a san̄a me otu egbe àtat chi.
18 Mgbọ ya, mâtọn̄ owu me emen ntitiin̄ ile ebi eyi kwun̄;
mâtọn̄ owu me ere urum ebi ilile enin̄be ijot.
19 Kachieek ibe ebi ìchacha emi me ikpak
enwọọn̄ unwọọn̄ ibe ema mîgak emi;
kachieek ibe ebi ìchacha emi me ikike ekebe emi.
20 Ema kpekiweek esuuk;
kpan̄asi ikeya, ekikan̄ ataak itoon̄
ebi ìkirọ inu esuuk esuuk me emen ama.
21 Ema ekika otu ibook itumu ikeme emi ibe,
“Buboo! Eji mîmun̄ inu orọbe!”
22 Jei Okumugwem, owu omọọn̄ isan̄a;
kariaan̄ ere, jei Ogwukaan̄-ene;
kakup ìjọn̄ọ emi ere me lek!
23 Sisik lek, mè nan̄a keke na na gbini unen n̄a;
Ogwukaan̄ n̄a mè Awaji n̄a, fieek oyerebet nwọn emi!
24 Jei Okumugwem, Awaji n̄a,
mije owu orebe ogwu ata irọrọ,
fieek oyerebet nwọn emi;
kachieek ibe ife chi esa emi enwọọn̄ unwọọn̄.
25 Kachieek ibe ema eketumu enyi lek kiban̄ ibe,
“Jiaak! Inu eji eweekbe, îre eji ubọk;
eji mîben ọmọ imen!”
26 Rọ inyi esip itet ebi ìkinwọọn̄ unwọọn̄ mije uyọrọlek n̄a;
tap yalayala me etete kiban̄;
rọ mè ema eyaka ubọk echit isi,
mè ulibi ita me lek
ebi ìkimọnọ ibe ema mîgak emi.
27 Tele inyi ebi ìkiweek ibe oyerebet inwọn emi
etaan̄ ukpo enwọọn̄ unwọọn̄,
mè eketumu ebe, “Okumugwem îmin enenen;
ejit kan̄ îbele mije inu ojebe
ijaan̄ me lek gwun̄ ikwaan̄ kan̄.”
28 Mgbọ ya, otu alọm n̄a môkpa ata irọrọ kwun̄ isibi,
mè itọn̄ owu egwe geelek.