Ijo irọrọ ebilene mè nnwọn eyi Awaji
Ìkup inyi ogwu òjeen̄ okwa. Okwa kè Debit, gwun̄ ikwaan̄ Okumugwem.
36
Ijo inu òkup me emen emen ejit ogwu ikpakokitọ ikọ inyi ogwu ikpak;
ukpook Awaji ge ikeyi kpunu me emen kan̄.
2 Eya orọ, ọmọ ìkitọtọn̄ lek kan̄;
ìkayaka ìkikọt ìmun̄ nje-nlọ kan̄,
mè ìcha.
3 Ijo usem mè ikọ ofiaan̄ okinan̄a me otu kan̄ isibi;
îyaka iriọọn̄-inu mè irọrọ ata inu ito.
4 Ìkitọt ijo otitọt me inyọn̄ mkpilaak kan̄;
kpunu inu geege îkirọ òkinwọnwọn;
ìkacha ijo inu geege.
5 Jei Okumugwem,
imumechieen̄ kwun̄ òkikup ire mgbọ geelek
îmin ibene me ijọn̄ isi ichak me akpabin inyọn̄;
igbegbe utoon̄-ejit kwun̄
îbene isi ichak me lek oduku inyọn̄.
6 Ata irọrọ okaan̄be ìmin kubọk ikpele ogoon̄;
oyerebet kwun̄ okisibi, ìdọk kubọk ugwuuk okwaan̄,
kpebekọt igobo itet;
Okumugwem, owu okikpọ chieen̄
me lek ebilene mè anam geelek.
7 Jei Awaji, imumechieen̄ mgbọ geelek kwun̄
îkup me unye otu ewe enenen;
bọn ebilene geelek ekilileek me irak uwop kwun̄.
8 Inorie òjojot emen uwu kwun̄ ke ema ekirie ijot owot;
ubelejit okinyi ema, ìkigbuk kubọk mun̄ okwaan̄.
9 Owu ore ogbuuruk ere ugwem okinan̄a isibi;
utoon̄ kwun̄ ke eji ekisa imọọn̄ inu.
10 Kpọkpọ kimun̄ ebi ìriọọn̄ owu me chieen̄ mgbọ geelek,
mè kpọkpọ kirọ ata irọrọ kwun̄ nyi ebi ìtatana me ejit.
11 Kachieek ibe ebi ugumulek ejak emi me ukot;
kachieek si ibe ubọk ebi ikpak isisik emi.
12 Kpọ ubọk Awaji odabe
ebi òkpaka ibot igwook me ijọn̄;
ere ema erurọn̄ọbe inyana, ere ya ke ema ebia;
kpeyaka ikọt inan̄a ikeke.