Mkpukpe ebi ata irọrọ mè ebi ijo irọrọ
Okwa kè Debit.
37
Kasisaak lek kwun̄ bak me lek ebi ikpak ekije inyi isi;kamimin si ejit me lek ebi ìkirọ ijo irọrọ.
2 Mije, me mgbidim mgbọ,
ema mêchiaak isan̄a kubọk mbubet,
mè igen̄ ita kubọk inwan̄ oron.
3 Toon̄ ejit me lek Okumugwem,
mè rọ inu ònwọnwọn;
owu môluk me utelelek me lek ijọn̄ înyibe owu,
mè ikirie ijot owot.
4 Tele Okumugwem ire ibot ibot inu òkibele owu ejit,
ke mônyi owu inu cha ejit kwun̄ odobe.
5 Yaka lek kwun̄ nyi Okumugwem,
mè toon̄ ọmọ ejit me lek,
ke môtap ubọk inyi owu.
6 Môrọ inyi emun̄ ata irọrọ kwun̄ kubọk ekimun̄ utoon̄ ura,
mè emun̄ si unen ubọk irọ-inu kwun̄
kubọk utoon̄ ejit ikarek.
7 Bieen̄ lek me lek Okumugwem, mè siki efuuk;
kat ejit kup kpọ ọmọ;
kasisaak lek kwun̄ bak me lek inu okije ijaan̄ me lek ebi ijo ife,
ebi ìkitọt ijo otitọt, mè erọ ètet.
8 Kpebe lek me lek unaan̄-ejit,
mè tele uyok uyok unaan̄-ejit;
kasisaak lek kwun̄ bak me lek ebi ìkirọ ijo inu;
ojelek isisisaak lek keya ìkitap ene unan me lek.
9 Awaji môkpan̄ ebi ìkirọ ijo inu isan̄a kpai;
ire, ebi ìtoon̄ ejit me lek Okumugwem
ebekaan̄ ijọn̄ me ìrot.
10 Sọntiik mgbọ, ebi ikpak kpebeyaka ikup;
owu môweek ema igak,
ire, owu òkpoyaka imun̄ ema.
11 Ire, ebi ìkirọ inu esuuk esuuk ebekaan̄ ijọn̄,
mè iluk me esuuk ikirie utop.
12 Ebi òkpaka ibot ekitọt ijo otitọt ibak ebi ata irọrọ,
mè ikiban̄a otu inin̄ ema lek.
13 Ire, Ogwukaan̄-ene okekichak ebi ikpak cha,
mije îriọọn̄ ibe ke usen ọmọ obochep ema òkinu.
14 Ebi òkpaka ibot mîwọọk oge akọn̄ kiban̄ isibi,
mè inwunwuun̄ ogbaan̄ kiban̄ igwook,
isasa ikpan̄ ebi ijo irek mè ebi una,
mè ikpan̄ si ebi ìkirọ inu òtatat.
15 Ire, oge akọn̄ kiban̄ ìbochim ejit kiban̄ itibi;
ogbaan̄ kiban̄ si, ebefafaan̄ ifiin̄.
16 Sọntiik inu ogwu ata irọrọ okaan̄be,
înwọn igak owuwa inu ubọọn̄ ebi òkpaka ibot ekaan̄be.
17 Mije, Okumugwem môfaan̄ ubọk ebi òkpaka ibot,
mè igọọk ebi ata irọrọ ikeke.
18 Okumugwem îriọọn̄ otu ifuk usen ugwem
ebi ìkirọ inu òtatat;
ìrot înyibe ema ìbokup ire mgbọ geelek.
19 Mgbọ inu isiyọt, ema kpebenyinya;
mgbọ akan̄, ema mêkaan̄ inorie ogbogbo.
20 Ire, ebi òkpaka ibot mêkwaan̄ ita kpai;
ebi ochicha Okumugwem mêniniin̄ ichieen̄,
kubọk uja eyi mbubet ukan̄ otakabe iriọk
okininiin̄ ichep me emen oduku.
21 Ogwu òkpaka ibot ìkifọọk inu me ubọk ene,
ìkakiyaka ìkpe ìnyi ogwukaan̄;
ire, ogwu ata irọrọ ìkichichili ubọk iche uche inyi ene.
22 Ebi Okumugwem ogbanabe ebekaan̄ ijọn̄ me ìrot,
ire, ebi îchobe ataak inyi,
ìbokpakpan̄ ebiba isan̄a kpai.
23 Okumugwem okijeen̄ ene ere ìbotap ukot;
irọrọ ene ya îra ikineme ọmọ.
24 Ìrere ene ya ìnanan̄a irọn̄,
ìkpobia me ijọn̄,
mije Okumugwem ìtetet ọmọ ubọk ikaan̄.
25 Mwuuk lek ire nsabọn;
mgbọ keyi, nra ikan;
ire, ǹkamun̄-nu Okumugwem ojitbe ogwu ata irọrọ itele,
mè ìre itele ibe bọn ene ya ekebeek inorie.
26 Mgbọ geelek, ogwu ata irọrọ
ìkikakaan̄ njijin me lek ene;
ìkichichili ubọk ifọọk inu inyi ene;
bọn kan̄ ìre ugbana useen̄ ata irọrọ kan̄.
27 San̄a lek me lek ijo inu, mè kirọ inu ònwọnwọn,
inyi owu mè bọn kwun̄ eluk
me lek ijọn̄ ya mgbọ geelek;
28 mije Okumugwem îma irọrọ inu ònenen;
eya orọ, ìkabojit ebi ìkekeke inye me lek kan̄ mgbọ geege;
môkput ema lek ire mgbọ geelek;
ire, môkpan̄ bọn ebi òkpaka ibot isan̄a kpai.
29 Ebi ata irọrọ ebekaan̄ ijọn̄ me ìrot,
mè iluk me lek ijọn̄ ya ire mgbọ geelek.
30 Ikọ otu ogwu ata irọrọ ìre ikọ iriọọn̄-inu;
otu alọm kan̄ si ìkitumu inu ònenen.
31 Ọmọ ìkisusun̄ Ikan Awaji kan̄ me emen ejit kan̄,
ìkakije ìkwala me lek ikan ya.
32 Ogwu òkpaka ibot ìkikiket ikpọ ogwu ata irọrọ,
ikiweek ikpakpan̄;
33 Ire, Okumugwem ìkabotele ogwu ata irọrọ
me ubọk ogwu ochicha kan̄;
ìkabochieek si ibe oyerebet itip ọmọ
mgbọ isitap ọmọ me oyerebet.
34 Kup kpọ Okumugwem,
mè je me oniin̄ kan̄;
ọmọ mônyi owu ijọn̄ me ìrot, isa irọ owu imin;
owu mômun̄ mgbọ môkpan̄be ebi òkpaka ibot isan̄a.
35 Emi nra imun̄ ogwu òkpaka ibot òkirọ nnaan̄,
mè ikikpọk otu agọọk kan̄ isan kubọk akpọọn̄.
36 Ire, mgburudun̄ nrakabe, ìkayaka ikup;
mweek ọmọ igak, ǹkayaka ìmun̄ lek.
37 Tap iman̄ me lek ogwu ata ene;
gbala chieen̄ kpọ ogwu òkirọ unen;
òta mgbọ me ugwem ene ya ìre esuuk.
38 Ire, Awaji môgbaan̄ otutuuk ebi ijo irọrọ ijijaka isan̄a kpai;
òta mgbọ kiban̄ ìre mkpa.
39 Okumugwem okinyan̄a ebi ata irọrọ;
ọmọ ore okwukwek akọn̄ kiban̄ me mgbọ uyọrọlek.
40 Okumugwem okitap ubọk inyi ema,
mè ikitaba ema isibi me uyọrọlek;
ọmọ okirọ ema enwọnọ me ubọk ebi òkpaka ibot,
mè ikinyan̄a ema, mije ema etoon̄be ejit me lek kan̄.