Uriaak ogwu ijo òkup me ukwook
Ìkup inyi ngwugwa ekisa ikeek inu òrọrọ. Okwa kè Debit.
38
Jei Okumugwem, kakan̄ inu ìnyi emi mgbọ ejit okinaan̄ owu;kasut si emi osusut mgbọ ejit okiyok owu.
2 Oraan̄ kwun̄ înin̄ emi ufuk;
ubọk kwun̄ òtotoon̄ emi me lek îyok emi akpa.
3 Emen lek n̄a îwuwọ isan̄a,
bak me lek onaan̄be ejit inyi emi;
otu ukwuuk n̄a îwọ emi, mije ijo inu n̄a.
4 Ijo inu n̄a îmeen̄ emi ibene iraka ibot;
ema ìre akpan òlolobo igak emi ibebeme.
5 Bak me lek mbubutbe, inya n̄a îjọ,
mè ikisọp mun̄.
6 Ufiak n̄a îmin enenen;
îben emi itọbọ me ijọn̄;
ǹkakọt ìbene isi;
ǹkito mfi egwe geelek.
7 Ebon òkiyok emi ukan̄;
emen lek n̄a îwuwọ isan̄a kpai.
8 Mgbugba îtet emi;
mkpukpuku igwook,
mè ikito mfi, bak me lek ufiak òkup emi me ejit.
9 Jei Ogwukaan̄ n̄a, owu oriọọn̄ inu òkup emi me uyọt;
owu onọ mfi geelek nkito.
10 Ejit òkirimi emi me unye me unye;
efuuk îta emi me emen;
chieen̄ n̄a ìkup emi àdaan̄ àdaan̄.
11 Ebi une n̄a mè ebi òriọọn̄ n̄a ekeke nsọn nsọn,
bak me lek orukan̄ n̄a;
ebi ngwan̄ n̄a si ekeke me ujọn̄ọ ubọk.
12 Ebi ìkiweek ikpakpan̄ emi mîtip ufe ikikpọ emi;
ebi ìkiweek isasak emi unan mîtumu emi ifiat,
mè ikikan̄ ataak itoon̄ emi usen geelek.
13 Ire, emi ǹyaka inikup kubọk ogwu ìnan,
ǹkakinọ ikọ,
ǹkup si kubọk ogwu mbuuk,
ǹkakitumu ikọ.
14 Iin̄, ǹkup kubọk ogwu ìkakinọ ikọ,
ogwu ìkpokọt ibọkọ ene otu.
15 Ire, ǹkup ikikpọ owu, jei Okumugwem,
owu Ogwukaan̄-ene Awaji n̄a obobọkọ ema otu.
16 Ǹkiriaak owu ibe, soso,
kachieek ibe emi ǹnan̄a ǹrọn̄,
inyi ebi ochicha n̄a ekakaan̄ inu ema mêsabe ibele ejit,
mè ikisa igugo lek inyi emi.
17 Mâninan̄a irọn̄;
ufiak n̄a ìkachieek emi ǹsiki efuuk mgbọ geege.
18 Ntumu inu nrọbe owu ilọ isibi;
ejit mifieek emi me lek ijo inu n̄a.
19 Ebi ìchacha emi me ikike enyenye lek igo;
ebi ìchacha emi me ikpak mîwa enenen.
20 Ema esa ijo inu ikpe emi mkpukpe ata inu n̄a,
mè ikije ikeme emi mgbọ nkirọ inu òtatat.
21 Jei Okumugwem, soso, kajit emi ìtele;
Awaji n̄a, kada lek ìbọkọ emi me lek!
22 Jei Okaan̄ n̄a, ogwu unyan̄a n̄a,
gwat lek na tap ubọk nyi emi.