Ugwem ìre mgbidim, mè ire ukpọk ukpọk
Ìkup inyi ogwu òjeen̄ Okwa: Ìkup inyi Jedutun. Okwa kè Debit.
39
Ntumu ibe ke mâgbala chieen̄ me lek inu nkirọ,inyi otu alọm n̄a ikatap emi me ijo inu;
mâkpaak otu n̄a ichit
mgbọ ebi òkpaka ibot ekupbe iriaak emi lek.
2 Nnin̄ mbuuk;
ǹkasasan̄a amọn;
ǹkatutumu ikọ ìbak inu geege ònwọnwọn;
ire, ufiak n̄a ìtatap inu isọkọ me lek.
3 Ejit n̄a ìkare ijọn̄;
ike nkikeek inu ofolek,
ikeya si ke ejit n̄a okima lek iyok ukan̄;
eya orọ ntumube ibe:
4 “Okumugwem, jeen̄ emi mgbọ okputut ugwem n̄a obore;
rọ inyi ǹriọọn̄ mgbọ ugwem n̄a obokup ire;
kpa nyi emi otu ifuk usen ugwem n̄a òsisik!
5 Kpọ, ugwem onyibe emi ìkajọn̄ọ ìgak uwele akajit ubọk;
okike mgbọ ugwem n̄a me isi kwun̄ ìre inu ikike;
me atikọ, ugwem ogwu ebilene geelek ìgbidim
kubọk mgbọ efuuk ge ene ofuukbe.
6 Ebilene ekije kubọk ogugo ikike;
kwulukwulu kiban̄ geelek ìchechep;
ene ìkibọm inu ubọọn̄ ititiin̄ isun̄,
ire, ìkariọọn̄ ogwu òbonikaan̄ inu ya mgbọ ọmọ isikwu.
7 “Okumugwem, mgbọ keyi, keke ke nkup ikikpọ ni?
Utoon̄-ejit n̄a ìbieen̄ me lek kwun̄.
8 Nyan̄a emi sibi me emen ijo inu n̄a;
kachieek ibe ebi burubut erọ emi ochak.
9 Emi ìre mbuuk, ǹkakisan̄a amọn,
mije owu orọ nkibọkọ ufialek.
10 San̄a ubọk osusut kwun̄ me lek n̄a;
akpọ kwun̄ mônikpan̄ emi.
11 Mgbọ okikan̄ inu inyi ene,
mè ikisulu ene osusut me lek ijo inu ene orọbe,
owu òkitaka inu ene omabe ijijaka kubọk nkarankat;
me atikọ, ugwem ogwu ebilene geelek
ìgbidim kubọk mgbọ efuuk ge ene ofuukbe!
12 “Jei Okumugwem, nọ uriaak n̄a,
mè nọ si ida ukpo nkitaan̄ igwen owu;
kariaan̄ ere ìkpọ ito nkito;
emi ìre ogwu ichen kwun̄, ǹnunu;
sọntiik mgbọ mâje inan̄a kubọk ebi nte nte n̄a.
13 Soso, nan̄a emi me lek, inyi ejit n̄a ibele,
sabum ǹkwu ǹnan̄a.”